早霸王|男聽眾唔上進遭分手 森美:你要真心想改變而唔係為追女

撰文:
最後更新日期:

男聽眾亞B因為唔上進,所以被分手,他希望藉《早霸王》挽回戀情,之不過,世事嘅嘢(尤其是感情),好多時都難以估計……

男聽眾因女友父母反對 ,所以三年來拍拖都唔可以太光明正大。(影片截圖)

亞B同女友拍拖三年,不過對方父母反對,令佢哋好多嘢都要偷偷地進行,生日或大時大節就更係無可能一齊過。「有時食飯都喺車,又或者喺車同佢吹生日蛋糕。佢最初覺得同我係有將來,但呢三年可能佢太攰,所以選擇分開。」亞B表示為了令女友安心,曾經試過打兩份工,但其後女友將他與友人比較,指對方願為另一半修讀degree,又指他寧將時間用來打機都唔好好為未來作任何打算。「佢呢一年轉咗工,又讀master,佢好努力同時亦有問我『呢一位做過咩』,直到12月分手。」

女友自己報讀了碩士課程 ,男聽眾顯得更唔上進。

分手後,亞B打工之餘亦報讀了課程,希望用行動給予對方信心,又擔心如果當下唔做任何嘢將來會好後悔。森美聞言後表示:「如果一個力求上進嘅人,好多時間唔係為咗人哋做自己要上進嘅事。係要為自己,同埋你有方向,你話為屋企打四份工的話,你總有一日會後悔,呢個你要明白。你而家所做係真心覺得需要,而唔係為咗追女仔,呢個好緊要。」森美又寄語亞B要進化成「better me」,萬一將來有所作為,隨時能有更多選擇。

當男聽眾以為有挽回嘅空間時,原來對方已經有另一半,睇嚟「唔上進」呢個只係分手藉口,而非真正理由。(影片截圖)

電話接通前度亞妹後,談及感情狀況時,亞妹竟然係表示「OK」並透露有拍拖,但由於並唔抗拒與亞B對話,所以森美都將雙方電話接通,當亞B表示願意進步、希望可以有多次機會後,亞妹只係保持沉默,最後先講出「加油做好你而家要做嘅嘢,其他嘢唔好諗住。」係囉,人哋都已經極速展開新戀情,亞B仲有任何空間可言咩?之不過,據亞B所講,二人都只係分手一個月,亞妹「復原」進度都幾快喎。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。