【陀槍師姐2021】黃建東做GD返工似行時裝騷 開心同宣萱陳豪合作
撰文：朱奕錦
出版：更新：
藝人黃建東（東東） 在熱播劇集《陀槍師姐2021》中飾演懸案小組警員GD，表現生鬼搞笑，他笑言是他最好玩的角色之一：「因為GD成日發明星夢又煲韓星跳舞片，所以返工會着到好似行時裝騷，日日都唔同look。GD最貪靚係唔單止成日枱頭補妝，仲帶埋個蒸面機返去蒸面敷mask。」另外GD的辦公室寫字枱貼滿了東東時裝同古裝的靚仔相：「因為我個角色好自戀，又成日好享受做臨時演員，所以特登摷返入咗TVB咁多年嘅工作相黏到成張枱都係，連水壺同埋檯燈都黏埋，啲朋友見到大叫攞命。」
東東貼滿自己的照片。
東東話好開心今次拍《陀槍師姐2021》觀眾可以叫到他的角色名GD的同時，還記得他的花名厚切：「厚切呢個名係拍緊嘅時候大家突然諗出嚟覺得好好笑好啱我，咁我嘅身形又真係好厚切，所以都改得幾貼切。」另外東東好多謝宣萱同陳豪帶領得懸案小組呢個團隊好好玩：「拍劇嘅時候已經好好笑，講對白嘅時候又要成日忍笑，鏡頭後大家又會傾得好開心好family，仲會不停食宣萱枱頭嘅零食，我覺得返工就好似放假咁放鬆。」
+8