羅子溢唔望囡囡小珍珠嗌爸爸？　「不斷叫我就冇好日子喇！」

羅子溢今日（14/7）在書展出席活動。向來大隻的他便笑指最近半年不怎做運動：「用晒啲時間陪小珍珠，去下昆蟲館、去下沙灘、去下咩樂園，成日上網睇『一歲BB十大好去處』。（唔捨得離開佢？）唔係嘅，不過係呢段時間好重要，雖然唔係逼佢學嘢，但係都想趁而家培養佢搵到快樂，等佢將來都可以做到咁。」

問小珍珠識嗌「爸爸」、「媽媽」未？羅子溢說：「識嗌『媽媽』，『爸爸』嗌過一聲，但係都足夠回味！（好感動？）愕然呀直情，全家定晒、靜晒，係我準備出門時佢無啦啦叫咗一聲，跟住就唔想出門。朋友話，將來佢大啲，攬住你隻腳唔畀你出門你仲冧呀，期待下。」又指未來可能會帶女兒去片場睇他工作。

到底囡囡難唔難湊？羅子溢說：「其實我覺得阿女有啲任性，唔知係咪女仔，需要多啲耐性，好似追女仔咁，要畀心機氹佢，佢玩玩具又三分鐘熱度。」他直指自己好怕用錯方法教小朋友，所以常常上網睇育兒資訊：「返唔到轉頭就大鑊！（佢成日叫媽媽會唔會呷醋？）好事嚟，不斷叫『爸爸』我就冇好日子喇！」