中國好聲音 | 五強佔兩席 李克勤《聲夢》到《好聲音》繼續發威
撰文：朱奕錦
出版：更新：
內地音樂選秀節目《中國好聲音2021》7日進行五強爭霸戰，雖然早前在十一強的淘汰戰中，導師李克勤因組內隊員被淘汰而忍不住落淚，但在五強爭奪戰中，三位導師各有一名學員入圍，而克勤是唯一有兩位學員躋身五強的一隊，從香港《聲夢傳奇》的「奶爸」主理人，殺到任《中國好聲音》的欽點導師，克勤所帶領的學員均得到好成績，認真威水。
五強學員中，有兩位都是克勤隊。
克勤入圍五強的兩位學員分別是伍珂玥、賀三，當中伍珂玥更獲得全場最高分。克勤為學員們高興之餘，亦非常滿意她們的表現，特別是伍珂玥，五強之戰是以往多場賽事中最好的一場；至於賀三的歌路則帶點搖滾，比較小眾，克勤坦言對此十分緊張，問致勝關鍵，他自認四位導師中資歷最淺，唯有將勤補拙：「我絕大部份時間都係俾咗『好聲音』，冇離開過戰場，可能因為咁樣，所以多咗時間同學員相處，大家多咗溝通。最重要嘅一環係贏在運氣，我覺得運氣喺呢啲比賽裏面，尤其去到最後階段係好重要，每一位學員嘅實力大家有目共睹，或者整體嚟講每個學員嘅表現啱唔啱五十一位評判嘅胃口，同幾百個現場觀眾嘅胃口，呢樣嘢係冇人可以控制得到，所以多多少少都係要有運氣，可能今晚我哋嘅運氣係特別好。」
克勤認真威水。
對於下星期的決賽，克勤雖然有信心，但亦謂用平常心對待：「五個席位入面我哋佔咗兩個亦都唔見得有特別大嘅優勢，其實都係個別嘅比賽，所以盡做啦，盡量㨂啲大家喜歡嘅歌。因為決賽係現場直播，所以亦都好睇臨場發揮，希望兩位學員下個禮拜嘅發揮會係佢哋嘅水準，因為始終直播嘅時候，大家嘅心理壓力又會大啲，緊張啲，乜嘢事情都可以發生。所以分分鐘可能邊個失誤比較少就贏㗎啦，臨場發揮啦，天時地利人和，平常心去面對。」
克勤對決賽信心十足。