玩命真相｜鄧佩儀首次擔正做女一 譚俊彥爆對方執著
撰文：吳子生
出版：更新：
鄧佩儀首次擔正做女一。（吳子生攝）
鄧佩儀（Gloria）和譚俊彥（Shaun）今日（15/10）現身電視城出席無綫台慶劇《玩命真相》宣傳造勢活動。對於首次擔正做女一，劇集下周一首播，Gloria表示沒感到太大壓力:「我成日都畀啲朋友笑我係一個老婆婆心態，因為我睇所有嘢都睇得好化。我真係唔知，由我選美到拍劇，我都可做到一個平常心嘅狀態。」
譚俊彥爆鄧佩儀為人執著。（吳子生攝）
而身邊的Shaun則按耐不住笑指Gloria份人比較執著：「例如佢有啲喊戲個樣未必咁好睇，又或者個角度唔係咁好睇，但佢就會話唔緊要，希望觀眾可以睇佢嘅戲，而唔係睇佢個樣嘅。咁我就會同佢講咁樣唔得喎，兩樣都要。因為過到你個啲戲之餘，都一定要靚咁去吸引人。」
而Gloria接著說：「我而家都睇化咗，我而家完全明。睇返而前我係好執著，係戲行先，唔想靠個樣行先，係因為唔想做花瓶。而我媽咪曾都有話過我，喊到啲成塊都皺晒，成個樣唔好睇，就話人哋啲韓劇，喊得嚟靚都會畀人感覺都係好戲。咁聽落佢咁講又幾有道理喎，咁所以而家慢慢咁改變中。」