森美呻未撲到MIRROR門票畀阿女：考驗江湖地位嘅時候

近日MIRROR紅館演唱會掀起全城撲飛熱潮，森美女兒鍾意MIRROR為人皆知，入行多年竟無奈表示自己都冇演唱會飛，要開始向同事「埋手」：「呢啲係考驗你江湖地位嘅時候，好明顯我就冇啦！我唔敢打擾MIRROR，有時見到佢哋，MIRROR成員啲眼神都閃走咗，你就知佢地都冇飛。我有問小儀有冇，佢大大聲話冇，可能得阿正有飛，我都同佢講，咁多年嚟我待佢都不薄，鬧得佢最少，所以有飛就識做啦！」

森美主持開張NFT藝術畫廊開張活動，表示自己有留意NFT投資，笑言推產品時將降價錢價令Fans不用捱炒價：「出寫真想都好啊，因為胸肌又出兩張、『老鼠仔』又出幾張、股肌都出兩張，但係咁就變咗賣肉，咁就唔適合我，除非我啲肌肉咁有藝術性我就唔介意囉！」森美笑言仔仔比自己更有眼光，想用私己錢買美股的賺零用：「早排佢有筆錢，叫媽咪幫佢買美股，點知老婆都唔知咩嚟冇幫佢入市！幾個月後真係升左成倍，阿仔當時先知冇買！搞到好似中咗六合彩但冇買到咁，真係幾咁尷尬。」