74歲婆婆搶MIRROR飛失敗喊足幾日 網民心酸:點解冇關愛座飛賣?

撰文:陳芷穎
出版:更新:

人氣男團MIRROR將在本月底至8月頭舉行12場紅館演唱會,一票難求掀起全城搶飛潮,「搶唔搶到MIRROR飛」就成為了朋友之間熱烈討論的話題。港台音樂節目《騷動音樂》主持之一的彬臣,昨日(30/6)就在大氣電波分享一位74歲婆婆撲MIRROR飛的故事,婆婆最終願望落空令他非常心酸。

男團MIRROR的12場紅館演唱會即將於7月舉行,大會採用實名制方法售票,務求增加鏡粉成功購買的機會。(IG/ @mirror.weare)

彬臣表示與媽媽短訊聊天時,對方突然詢問有沒有方法購買MIRROR演唱會門票,他非常愕然以為媽媽是「貪得意」跟上潮流,後來媽媽解釋是幫公司的清潔嬸嬸購買。彬臣說:「呢位嬸嬸74歲,未退休。你都知道老人家要去接觸科技嘢真係唔簡單,尤其網上買飛唔似我哋有晒攻略,事前已經知道晒啲步驟、準備好晒啲資料,第二朝未夠鐘已經上網F5緊。」

對婆婆來說,現時的買飛程序比起從前更加複雜和困難,而為了增加成功購票的機率,彬臣指婆婆特意以$440加入MIRROR官方歌迷會成為MIRO:「你知老人家都唔係特別捨得使錢,佢都特登join咗fans club,希望可以買到飛。我阿媽話,『佢足足上咗兩日網,最終都撳唔到,仲喊咗幾日,阿仔你有冇方法幫到佢?』」

彬臣(左一)和波盛(右一)主持的《騷動音樂》會邀請不同歌手上節目傾偈。(IG/ @sodun_music)

彬臣聽後愛莫能助,而為他帶來最大的衝擊並非婆婆成功購票與否,而是一位老人家願意花時間和心機學習上網買飛:「我深信佢除咗自己睇之外,背後可能想同孫仔、囝囝女女,一家人開開心心去睇,呢個故仔真係令我印象非常深刻,佢學點樣買飛,聽到佢喊咗幾日,我個心乸乸哋。」他只能叫媽媽安慰婆婆,將來MIRROR演唱會出碟時再送贈對方。有網民留意到事件並在討論區發文表示:「點解演唱會唔可以有關愛座飛賣?難得上咗年紀嘅老人家都咁有心去睇演唱會」,亦有人回應指因為官方要預留門票給尊貴客戶:「都冇預普通人會買到飛」。

網民討論「點解演唱會唔可以有關愛座飛賣?」(網上截圖)
你可能感興趣