肥媽打高爾夫球憶亡夫　想念老公照顧周到︰以前好似個王后咁

現年68歲的肥媽（Maria Cordero）早前確診新冠肺炎，現在已康復並已復工。日前，她在YouTube個人頻道上載短片，見到她跟好姊妹黑妹（李麗霞）齊齊去打高爾夫球。

肥媽表示要為打高爾夫球慈善賽作準備，所以立即去練習，她笑言︰「大佬我幾耐冇掂過枝高爾夫球棍啊？你估菜刀啊？菜刀我唔使練啦！」肥媽又大呻自己要改善打Golf的姿勢，她說︰「個胸又大，夾住隻手，人哋男人冇呢個問題，我個胸又大，又要夾住隻手，所以我而家叻咗啦，以前用啲女人棍呢，打來打去都打唔到！」她自言要找較長身的高爾夫球棍才打到。

肥媽之後立即示範打高爾夫球，不過卻憶起亡夫Rick，她說︰「我老公喺度嘅時候好好，因為佢冚唪唥整定晒比我，我行埋去一打就得，而家唔係啊嘛，而家又要自己攞呢啲，自己孭嗰啲，自己搞嗰啲。以前唔係㗎嘛，好似個王后咁，我老公擺定個波，叫『老婆』，咁我行埋去打！一下咋嘛！都唔使做咁多嘢㗎！」之後肥媽練習打高爾夫球，睇落都算是有姿勢！