藝員離巢原來冇散水餅? 麥長青:問過李修賢都唔知咩嚟! 

撰文:陳浩賢
出版:更新:

上班族或多或少,都會面對離職的一天,有人是搵到好工,開開心心跳槽,亦有人工作不愉快,想轉換環境,姑勿論那一種情況,在工作的最後一天,慣例是會買些西餅答謝同事們的照顧,俗稱「散水餅」。不過有打工仔在網上稱自己離開時不會派餅,隨即一石擊起千重浪,不少打工仔身同感受,「寧願用買餅錢做善事」、「請食元寶蠟燭」、「食完餅仲嫌唔夠高檔」,也有人說「好來好去,派餅唔慳得」,各有自己睇法。但原來在影視界,根本沒有散水餅這回事,甚至從來未聽過,相當離地。

麥包表示開心走就話派餅,唔開心走仲派就好悽涼。(資料圖片)

在無綫工作29年,去年才離開的麥包,拍過多齣膾炙人口的劇集,為人熟悉的有《茶是故鄉濃》、《樓奴》及《巾幗梟雄之義海豪情》,在圈中有甚多好友,人脈廣闊。麥包接受《香港01》訪問,原來無綫藝人沒有派「散水餅」的傳統,他還是在記者提問下才知道有「散水餅」,他說:「我唔知乜嘢係散水餅呢樣嘢喎,所以都冇請人食餅。」記者向他解釋派餅是用來表示答謝同事上司的照顧,那麼麥包對同事有何心意表示呢?「我走嘅時候都冇乜喎,都係節目嘅人食餐收工飯,冇任何呢啲嘢喎。」

麥包表示未聽過散水餅,更即時問李修賢,他也說從未聽過。(東星圖片)

麥包是公司的老臣子,連他也不知上班族離職派「散水餅」的慣例,可知無綫藝人很少有人會派餅,他還半開玩笑的說:「走嘅時候唔係食無情雞嘅咩?,完全唔知有散水餅呢樣嘢喎,以為係舊嘢啦,我問阿修哥,佢都未聽過,李修賢修哥都話未聽過呢樣嘢。即係走嗰個請大家食餅呀?咁悽涼呀,開心走就話啫,唔開心走仲請人食餅好悽涼喎。真係唔知,我未試過。」

陳敏之表示入行多年,也未收過散水餅,所以不大清楚。(資料圖片)

早前播畢的《親親我好媽》,飾演嘉熙老師的陳敏之,去年尾誕下囝囝雷子樂,宣布減少幕前演出,除了要湊囝囝外,更要花更多時間打理餅店Blesscuit Bakery,他表示:「我都唔係好熟散水餅呢啲嘢。當然有人來舖頭買曲奇當作散水餅,比例上唔夠生日嗰啲咁多。」問到她在無綫拍劇多年,有否吃過「散水餅」呢?「我又冇遇到過喎,我識嘅人都冇呢樣嘢,或者我識嘅人都好後生,所以我冇呢樣經驗。」其實俗語說人走茶涼,派不派餅對在職的同事,也是意義不大。

陳敏之開設Blesscuit Bakery,她表示也有人買曲奇做散水餅。(微博截圖)