美麗戰場|葉念琛力撐陳瀅演技好 無懼負評惹爭議:好過無聲無息

撰文:林迅景
出版:更新:

無綫(TVB)新劇《美麗戰場》自播出以來反應熱烈,當中有讚亦都有彈,不少觀眾更是看得十分「肉緊」,一邊大鬧蔣家旻賤人、丁子朗是渣男,一邊又為陳瀅、陳曉華的遭遇而心痛,不過另一方面也有不少人覺得劇情實在太狗血難以接受,又有人批評劇本太粗疏、演員演技未夠班等等。

女演員出場。(葉志明攝)

對於陳瀅的演技被彈,編審、導演兼監製葉念琛接受《香港01》訪問時就指責任在於自己:「作為導演我要講返畀觀眾聽,個設計陳瀅個角色同蔣家旻分別太大,一個好強一個弱。你覺得一個人物持續被迫害,被欺負又冇還手之力,係會唔夠痛快,呢個唔關演員事,因為劇本處理已經係咁。」

陳瀅、方力申、蔣家旻。(葉志明攝)

他更透露鍾家寶這個角色在後期會逐漸黑化,觀眾將會有不一樣的觀感:「鍾家寶後面佢會黑化,我可以講嘅係,同鍾家琪(蔣家旻飾)比,佢中間做嘅嘢係有過之而無不及,睇埋落去先評價啦。我仍然覺得陳瀅係做得好嘅,要睇埋落去後面,鍾家寶入咗娛樂圈、入咗豪門嘅變化。」

《美麗戰場》編審、導演兼監製葉念琛。(葉志明攝)

提到有人批評演員的演技,葉念琛就表示:「網民做嘅嘢我覺得無傷大雅,最緊要係有話題性,大家個關注度。我成日覺得劇應該係咁,最多人睇嘅劇先會有個洐生話題,同埋洐生出嚟嘅趣味。演員被批評或者演員被讚賞,所有嘢都來自我,因為係我寫,係我拍,當然我會收貨我會接受。你估我唔知有爭議性咩,因為橫跨18,19年,我最後都覺得,有爭議性都係喺我計算入面,如果冇爭議性又點會有而家嘅熱度,或者而家嘅討論性。」

《美麗戰場》班底。(葉志明攝)

同時,亦有不少人指《美麗戰場》與以往TVB劇不同,甚至有人覺得劇本「俹簁」,不過葉念琛就回應:「我只可以話呢個係我友情客串嘅作品,因為我唔係TVB出身。如果你覺得劇本有粗疏地方或者同以前嘅劇唔同,好尖銳,感情瓜葛關係,或者我寫嘅豪門,都唔係TVB劇睇到,其實冇所謂,因為我拍咗咁多年電影,同埋做影評人,最緊要就係談論,好過拍咗出嚟無聲無息,葉念琛嘅作品從來都係咁爭議性。呢個世界有讚就一定有彈,讚我會睇會接受亦都開心,彈我都會睇我都會接受,下一次就知道有咁嘅批評。」