關智斌42歲生日「坐枱」成搶手貨 Fans拎廿年前裸照求簽名

撰文:洪曉璇
出版:更新:
關智斌(Kenny)昨日(30日)正日生日。(IG:@KENNYJR)

關智斌(Kenny)昨日(30日)正日生日,已經多年沒與fans舉行聚會的他決定跟fans過生日,過百fans出席,場面墟冚,Kenny更坐勻每張枱跟fans互動,「坐枱」互動頓成搶手貨。

關智斌(Kenny)已經多年沒與fans舉行聚會,決定跟fans過生日,過百fans出席,場面墟冚。
關智斌(Kenny)更坐勻每張枱跟fans互動,「坐枱」互動頓成搶手貨。

生日會於尖沙咀一間餐廳舉行,餐廳負責人林柏希(William)更「臨時拉夫」充當司儀,認真唔話得。Kenny甫到場,先跟現場所有fans來一張大合照,隨後Kenny表示這次生日會及fans聚會十分驚喜,更笑言自己今次「搞大咗」,「因為真係有啲急嘅,大約兩、三個禮拜之前,我同同事講,今年生日我好想同啲fans過,因為之前應承咗佢哋嘅嘢,我乜都冇做過!我話:『今年睇吓有冇人想出席啦,你幫我問吓先啦。』本來好簡單諗住大概二、三十個人,簡單食個飯,諗唔到最後搞咗成一百人出嚟,咁多人坐咗喺度,多謝你哋冇唔記得我。I love you all!Thank you!」

關智斌笑言自己今次「搞大咗」:「諗唔到最後搞咗成一百人出嚟,咁多人坐咗喺度,多謝你哋冇唔記得我。I love you all!Thank you!」

他又向fans真情剖白,「雖然我未必記得晒佢哋個名,不過我真係會睇晒佢哋俾我嘅嘢,我發覺佢哋好有才華,有啲識彈首歌俾我聽、有啲識畫畫。我覺得有人喜歡自己,而佢哋亦都會因為我嘅歌令到佢哋喺某段時間得到治癒,呢個係我最大嘅福氣,因為我做嘅作品可以得到你哋嘅喜愛,我覺得好榮幸。」問到來年工作安排,他表示會繼續拍攝自己喜愛的電影及電視劇,又即場問fans想他做甚麼,在場fans即大叫「開show」,Kenny立即回應:「係喎!開show喎!真係技癢,我都好耐冇唱歌啦。真係好衷心多謝大家,所以我嚟之前已經講:『你哋有乜嘢需求我盡量滿足!之前應承咗幫你哋簽嘅專輯、寫真集、相等等,總之來者不拒!』」隨後一名fans拿出一張Kenny半裸poster要求簽名,Kenny笑謂:「嗰張可以收埋佢!可以收埋佢!呢張已經係廿年前嘅裸照呀!我都真係唔好意思,嗰陣時啱啱出道呀。呢張相應該有廿年,張紙仲未黃嘅?哈哈,你又keep得幾好喎!」

一名fans拿出一張Kenny半裸poster要求簽名,Kenny笑謂:「呢張相應該有廿年,張紙仲未黃嘅?哈哈,你又keep得幾好喎!」

Kenny透露上次fans club聚會已經是十多年前,早幾年推出專輯、寫真集時,曾答應舉辦簽名會,但因為疫情關係,最後甚麼都沒簽過,「我都幾內疚,因為佢哋成日喺IG留言俾我,成日都鬧我,呢度差唔多每個人都鬧過我㗎,哈哈。話我成日走數,跟住我就諗,咦!不如今年生日趁呢個機會俾佢哋當面鬧我啦,哈哈。」為了滿足fans要求,Kenny更坐勻每張fans枱,跟他們簽名、自拍、聊天等等,全部有求必應,「坐完枱」後,Kenny笑言「坐枱」互動成搶手貨,又不忘fans支持。問到生日願望,「我嘅生日願望都送埋俾你哋,希望大家最重要係身體健康、開開心心,I love you all!Happy new year!2023年更精彩。」