【開心速遞】KC心儀靚女Anita兼職做金融 梁茵:嗰3年係人生谷底

撰文:
最後更新日期:

在《愛·回家之開心速遞》,KC對梁茵飾演的Anita十分迷戀。(網上圖片)

相信大家一定不會對梁茵(Kiko)這個名字有印象,但如果大家前幾日有睇《愛·回家之開心速遞》,KC在劇集內正追求一個十分漂亮的文員女生,名叫Anita,佢就係梁茵喇!其實Kiko跟《愛·回家》系列十分有緣份,因為佢係做齊四輯,第一輯仲做足七個角色,認真巴閉!不過比較為人留意的卻是第二輯做李淇(Kay)這個角色。其實自從2012在TVB拍劇,之後2013年入讀第26期無綫電視藝員訓練班,這五年間她清一色做跑龍套的角色,可能會間中出吓場,但大家都唔會好太記得佢,唔好話真係,甚至令角色名都叫唔出。

Anita呢個角色,出一集又唔知要隔幾耐先再見到。(網上圖片)

+6
+5
+4

入行幾年都只是得這些雜碎的機會,正常人都會心灰意冷,Kiko在接受《香港01》訪問時說:「緊係氣餒喇,但我因為脫離咗新人約,所以我有另一份工做金融嘅,係支援我生活,如果我剩係靠TVB份人工係生活唔到囉。新人約嗰三年係我人生嘅谷底,每日都唔敢使太多錢,可能只係用五、六十蚊就算。買波仔爐飯當一餐,早餐就食麪包,又唔想問屋企人拎錢,可能因為我好細個就有呢個思想,大個咗係唔可以問屋企人拎錢。」其實TVB一向出名人工低,好多人都要靠出show,登台或者兼職生活,而且Kiko並沒有家底,所以條路真係好難行。

TVB養活唔到自己,唯有出去另覓途徑。(梁恩IG)

當年讀演藝,明顯就係因為喜歡做戲,嗰陣俾TVB睇中,便毅然加入TVB,不過都要作出一些選擇,她說:「嗰時我考入去去藝訓班,但TVB要我簽約,但嗰陣我又未quit演藝,因為嗰邊係degree嚟架嘛,所以會覺得好可惜囉,犧生咁大但結果又未必係自己想像中咁好。不過最終結局係點暫時都未知嘅,好似黎耀祥嗰啲都捱咗成三、四十年先有咁嘅成就,可能我嘅演技未夠爐火純青。公司入面嘅人緣又未係好好,因為好多人都人緣好好架嘛,加上我又係無背景咁入去,我爸爸媽媽又唔係邊個,有時都要講人事關係嘅。」無論係演技、人緣或者關係都好,好多時都要配合彩數,演員窮一生可能就只等一個機會,不過Kiko只有23歲,實在還有大把時間。

當年演藝畢業唔到的確係遺憾,唯有喺劇集到畢業喇!(梁恩IG)

即使在最心灰意冷的時候,Kiko也沒有選擇放棄,因為有好多朋友支持她,她說:「有個人同我講,當初由pa做到導演都捱咗好耐嘅時間,每個人都會有呢段時間,不過長短不一,只有捱過咗就會成功。就係呢返說話鼓舞咗我繼續行落去,即使TVB人工唔夠我生活,咁我咪搵份工一路做一路拍戲囉,我心入面團火仲燒緊架!」除了朋友,連家人都好支持她,即使之前未必可以拎家用返屋企,但Kiko的媽媽都不介意,還說自己可以不做兼職轉做全職,不過Kiko婉拒了媽媽的好意,她不想花屋企的錢她說:「我好草根架,我爸爸做地盤,媽媽做家務助理,所以真係好草根。因為想俾細佬一個好嘅居住環境,由公屋轉做居屋,所以佢地好俾心機儲錢,當時都問咗親戚朋友借錢,因為以前雖然話上車容易,但搵錢都唔易架嘛。」靠自己的確係有志氣,即使在最艱辛的時候也沒有因為種種籍口而放棄自己的理想,上天不負有心人,希望第時會有更好的機會給她發揮喇!

+7
+6
+5

她深信,捱下去就會有出頭天。(梁恩IG)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。