《踩過界》香港一星期播得兩集 重內地千億點撃率棄本地收視?

最後更新日期:

這套仿超級英雄劇要放在炮灰時段播,又唔係單元劇,會唔會唔太好?(影片截圖)

TVB首套超級英雄劇集《踩過界》未出街已經有好多話題,又話王浩信飾演的盲眼律師,角色設定似足美國Marvel出品《Daredevil》(夜魔俠),咁樣已經先聲奪人喇。不過無綫對這套劇的安排,又係非常曲折離奇。早前的《不懂撒嬌的女人》打算衝出香港,放在內地視頻網站上架,誰知題材不合,改由《踩過界》上陣,仲未完!後來更有消息表示《踩過界》將於6月19日率先在內地愛奇藝上架,咁香港嘅觀眾呢?似乎將之拋諸腦後喎!唔通要上內地網站先可以睇首播的港劇?真係唔明喎。

TVB開始追求網上點撃率,本地觀眾可能要蝕幾日睇《踩過界》。(網上圖片)

近日就有消息指,《踩過界》將在6月24日起,逢星期六、日晚上9點半播放,直到9月14號至9月17日結局篇,就星期四至日晚上9點半播放。《香港01》訪問到《踩過界》監製林志華,他亦確認這個消息。問到何以有這個安排,他說:「咁我就唔清楚,要問返節目部,我係負責製作。」據知《踩過界》拍攝期間,TVB已與愛奇藝洽談好,會率先在內地上架,成為TVB首套與愛奇藝合作的劇集,但就未有進一步講到具體的播放安排,如今落實於星期六、日出街、外界認為是炮灰時段,實在是TVB臨時做法,監製林志華就未有正面回應這種做法:「唔會擔心收視嘅,只要套劇製作好嘅話,效果出嚟OK,我就滿意。」

至於愛奇藝早5日上架,仔細安排係點?愛奇藝出街的版本當然是普通話配音,並有兩個做法,免費用戶每星期收睇兩集,進度與香港無異,只是比較早;至於付費用戶,就可以率先睇到其他未播放的集數。《踩過界》為TVB首套超級英雄劇集,拍攝手法有別以往,用的攝錄機也特別高質,務求有真實感與張力,愛奇藝在題材、製作上看中此點,於是就有首次合作。雖然TVB未有確實回應每星期兩集的安排,但因商業交易的關係,愛奇藝率先播放是不爭的事實。

朱千雪唔擔心《踩過界》變炮灰。(溫菁莉攝)

對於《踩過界》疑似的「炮灰」安排,有份參與的三高港姐朱千雪都得知此事,她說:「又唔會好擔心呢個安排,美劇一星期播一次,都好成功,我對套劇都好有信心。今次我戲分其實都唔多,都係中後段會出現,如果係咁樣安排嘅話,播放日子可以長啲,觀眾可以Keep住見我哋多啲。」提到星期六、日播劇集,必定成為炮灰,又怕觀眾錯過,朱千雪說:「咁又唔會好擔心,myTV SUPER都會有得睇返。」愛奇藝出街先,香港觀眾要靠內地睇返港劇?千雪BB對此都好樂觀:「其實都唔係差好遠,只係幾日,就算有得上網睇,作為香港人當然睇返廣東話原裝版本啦!咁會好啲嘅。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。