【任噏亂評.賭城群英會】唔計阿叻 套劇其實唔難睇喎!

撰文:
最後更新日期:

相信大家今個星期可以鬆一口氣,因為睇到眼痛嘅《蘭花劫》終於播完,而現時接住播嘅就係差點淪為「倉底劇」並由王晶監製嘅《賭城群英會》。套劇未播出街幾乎已經被人清一色圍攻,就話「又拍賭戲呀?」、「賭城耆英會」、「王晶又食老本啦!」。但老實講睇完頭3集嘅感覺又幾好幾新鮮,因為今次劇集係用全實景拍攝,又用專門拍電影嘅器材,令整部劇都好有電影感,起碼唔似平時TVB劇集嚟嚟去去啲廠景。而首日收視好收得有25點,只能講「橋唔怕舊,最緊要受!」

1999年嘅《賭俠大戰拉斯維加斯》係幾好笑。

劇情膠唔膠就未知,不過睇呢套劇嘅大前提係我想睇下班好耐無拍劇嘅演員,例如四哥謝賢,叻哥及ming sir劉兆銘,對年輕一輩嚟講都算係「新鮮」,所以大家可以當睇新戲咁,起碼唔係老是常出現嘅花旦小生。而一般90後對四哥嘅印象,仲停留係《少林足球》好鍾意跳Cha Cha嘅魔鬼隊教練。但最估唔到係叻哥今次係劇集就好似少咗陣搞笑味,忽然玩老正,唔再好似以前《賭俠大戰拉斯維加斯》咁派膠,對一般觀眾嚟講確實唔知係好事定壞事。但對於班上咗年齡嘅觀眾可能係件好事,可以勾起好多當年嘅回憶, 四哥加Ming sir呢嗰組合其實係36年前曾經合作過《千王之王》及《千王群英會》,都算是唔少觀眾心目中嘅經典作。

《賭城群英會》係麥明詩嘅處女作,唔知大家對佢嘅演技點睇呢?

P.S呢嗰唔係電影《使徒行者》嘅劇照。

除了他們之外,仲有一班未拍過劇嘅演員,首先有10優港姐麥明詩、何浩文及文凱玲等等。當中麥明詩去年聖誕節主演嘅電影《失戀日》被網友指演技浮誇,今次麥明詩在劇中飾演李國麟嘅女兒屠若蘭,雖然仲未出場,希望佢可以難逃網友嘅毒舌一劫啦!BTW成套劇最穩陣一定係男女主角馬國明同佘詩曼,起碼後者是收視保證,但望得太耐阿佘嘅造型,又覺得自己好似睇緊《使徒行者》電影版,因為嗰髮型完全同釘姐一模一樣,但呢套係阿佘在TVB嘅最後一齣劇,唔知要隔幾耐先可以再睇佢嘅劇集。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。