【亞洲盃外圍賽】港隊兩球不敵朝鮮　無緣出線決賽周

抱着全取三分的決心作客朝鮮，港隊於周二亞洲盃外圍賽B組最後一輪賽事決戰朝鮮，於多員個球員傷停下只能以0：2不敵對手，未能出線2019年的決賽周。
（相片由足總提供）

港隊要晉級2019年亞洲盃決賽周，今仗便許勝不許失分，惟作客朝鮮卻全場捱打，先是8分鐘朝鮮出波後港隊僅僅護空門，11分鐘又有中堅艾里奧受傷，由首次代表大港隊的唐建文換入。惟球隊於18分鐘終於失守，朝鮮前鋒鄭日冠禁區頂遠射，門將葉鴻輝撲到都入網，港隊落後0：1。其後港隊盡力反撲，21分鐘有徐德帥左路攻門被門將沒收。可惜3分鐘後，朝鮮於左路傳中，皮球越過守將，尾柱的朴光龍接應射成2：0。

落後兩球下，港隊控球時間轉多，36分鐘艾力士禁區頂遠射高出，兩分鐘後羅拔圖手榴彈掉入禁區，羅素傳予艾力士射門可惜不中目標。補時階段，鄭日冠快攻突破防線後禁區頂遠射，被阿輝撲出，半場港隊落後0：2。

換邊後港隊即時以林嘉緯入替梁振邦加強攻力，此舉亦令港隊多了放波到兩邊及禁區，56分鐘嘉緯角球開出，港隊第二時間混戰下再搏得角球。其後角球攻門無功而還，兩分鐘後唐建文禁區外窩利起腳又高出。69分鐘港隊作出最後調動，以黃威入替艾力士。

即使有入波決心，惟主場出擊的朝鮮依然有優勢，74分鐘對手單刀僅僅被羅素瓦解，4分鐘後朝鮮右路出波被阿輝撲出，朝鮮球員補頂被羅拔圖護空門。最終港隊以0：2落敗，以6戰1勝2和3負得5分排小組第三位，未能晉級亞洲盃決賽周圓夢。