【每逢大事講故事】點解一個俄羅斯伯伯　可以搞到華府一鑊泡？

近排特朗普新班子因為一個人，搞到好鬼死頭痕。哎～侵侵平日得罪人多，難得咁辛苦先掹掹緊湊齊人，點知呢條友搞一搞，一個已經人頭落地，另一個幾乎墮馬，連侵侵自己都被俾人煩到嘔，成個內閣團隊亂過亂世佳人。到底係何方高人咁勁揪？
點樣睇，呢位肥伯伯都係安西教練失散多年兄弟，唔好以為少副眼鏡同剃咗鬚就呃到我！

登登登凳！無錯，就係佢。唔係妖嬈嘅俄羅斯金絲貓，亦唔係英明神武嘅KGB，果位侵侵團隊差唔多人人都見過嘅俄羅斯大使，就佢呢位叫基斯利亞克嘅阿伯。Sor，基咩咩咩話？Sergey Kislyak，謝爾蓋．基斯利亞克，一個普通而且典型難記嘅俄羅斯人名，聽完100次都未必記到入腦果隻。
 
美國政壇同傳媒一提起呢個人，即刻起晒摃如臨大敵咁，一時話佢係特務，一時仲話佢在美國招兵買馬，控制俄羅斯喺美國嘅特務組織添。不過呢位其貌不揚嘅肥伯伯，個樣咁鬼慈祥敦厚，成個安西教練咁款，點都聯想唔到「壞人」呢兩個字。雖然特務係無樣睇嘅，但呢個阿伯真係一啲都唔似係特務或者情報人員囉，佢至多咪係星爺套零零漆或者零零發入面啲搞笑角色！

不過呢個阿伯最厲害嘅地方，係好似有本「死亡筆記」在手咁，邊個一同佢扯上關係，立即被佢害到雞毛鴨血。唔係淨係指「侵班子」班蛋散，就連民主當黨嘅議員都係咁，今年已經76歲、德高望重嘅眾議院少數黨領袖佩洛西（Nancy Pelosi）都中招呀陰功～
 
飛雲「係咁意」查一下，已經發現：

最搞笑嘅係，個個見完肥伯伯，全部「宮雪花」上身，乜都唔記得晒，無一個認同佢有接觸。好彩「有圖有真相」，一個二個被發現擘大眼講大話，見過肥伯伯而無乜事嘅，暫時只有侵侵個靚仔女婿兼白宮高級顧問庫什納咋。
 
究竟呢個肥伯伯咩來頭，個個都見過佢咁威水呢？今年66歲嘅佢，32年前已經在駐華盛頓大使館工作4年，當時仲係蘇聯年代。蘇聯解體後，佢做咗俄羅斯第一位北約代表，1998到2003年轉做駐比利時大使，然後升職返咗莫斯科做副外長，直到2008年被委任為駐美國大使，時隔20年又回到華盛頓。睇完成份CV，總之佢就係一個好資深嘅俄羅斯外交官。
 
你心諗：「唓，講咗咪等於無講！」

咪咁心急住先，好戲在後頭。唔好睇肥伯伯個樣咁慈祥就以為佢無料到，佢母校係莫斯科工程物理學院，出產過好幾位諾貝爾物理學獎得主，呢間大學近年改咗名，叫做「國立核能研究大學」。飛雲諗嚟諗去都諗唔明，作為堂堂一個理科尖子，點解卅年前有物理科學家咁好路數唔做，要千里迢迢走去萬幾公里外嘅華盛頓幫美國人耷印仔批簽證。仲唔係有陰謀？？？

希拉里舊年競選期間，民主黨總部電腦被黑客入侵，之後爆出嘅「電郵門」醜聞對選情有一定影響，民主黨將矛頭指向俄羅斯黑客組織。到「侵班子」越來越多人被發現同肥伯伯有接觸，「俄羅斯操控美國大選」嘅劇本已經寫好喇。

過去呢9年入面，肥伯伯利用大使身分，瘋狂接觸華府精英。話見就見，乜班精英咁易埋手㗎咩？試幻想一下，如何你係華府精英成個禮拜做到隻狗咁，到星期五下晝有人同你講，「喂有個P你去唔去？有最頂級Volka、魚子醬、金髮靚女」，或者「有個由名廚主理嘅俄羅斯Fusion菜飯局，我、阿邊個、邊個同阿邊個都去」，地點？白宮隔幾座建築物一棟三層高古典建築物。你唔係唔去吖，咪玩啦。
 
就係咁，肥伯伯9年來見盡華府精英，共和黨的、民主黨的、政府各個部門的，全部通殺！肥伯伯雖然周旋於眾多美國政客之間，但佢行事向來低調，可能再加上佢毫無威脅性嘅外表，一直相安無事。直到侵班子接連出事，美國人先驚覺呢位仁兄相當有可疑。
 
都唔知真係黃咗，定係借題發揮，當美國傳媒追問俄羅斯外交部發言人沙卡洛娃就嬲嬲豬咁講：「爆個軍事機密俾你聽：聯絡派駐國家政治人物，係外交官嘅工作。如果佢哋唔做聯絡工作，唔參與談判，咁佢地就唔係外交官！」
 
哦明晒！即係學明福俠話齋：

既然肥伯伯已經黃咗，佢已經再無利用價值。近排佢已經同班下屬講定，自己好快會離開美國，「升」去聯合國坐一個關於反恐嘅新位。咦，乜啲情節咁熟口熟面嘅？

不過講返轉頭，肥伯伯又好，其他人又好，點解美國一提起俄羅斯就好似貓貓驚果時咁，後頸啲毛豎起晒嘅呢？乜佢哋唔係世界警察，好打得㗎咩？
 
講起呢筆無可避免講返遠少少，話說二次大戰後，歐洲列強全部殘晒，得返地緣關係基本上打風流仗嘅俄羅斯同美國，有力成為戰後僅存超級大國。當時奉行共產主義嘅蘇聯同行民主制度嘅美國，意識形態走向兩極，陷入冷戰年代。一路安安樂樂嘅美國人，唔知點解突然發現身邊總有「疑似」蘇聯間諜，搞到總統杜魯門要落一個好大龍鳳嘅行政院指令：強制所有聯邦政府僱員都要被查家宅，睇下對國家夠唔夠忠誠。

呢單嘢已經搞到政府上下人人自危，疑神疑鬼，美國國會入面仲有個叫做「非美調查委員會」（Un-American Activities Committee）嘅物體，不時走出嚟踢爆埋伏政府內部同荷里活嘅「共產黨」。吓，荷里活又關事？或者美國政府也知道夢工場嘅威力，所以不斷向電影公司施壓，於是乎，業內大佬就整咗份荷里活演藝界黑名單出嚟，共產黨、或者同情共產黨嘅演員、導演、編劇等，全部唔請。其他行業亦有樣學樣。

有一個叫做麥卡錫嘅參議員就醒目喇，當人人「聞蘇色變」，佢老兄自稱手上有份「共產黨同間諜」名單，然後邊個唔聽佢話就話對方係「蘇聯間諜」，令大批名人、學者身敗名裂。果時連黑人民權領袖馬丁路德金，都俾FBI局長胡佛無限上綱，屈佢係共產黨。呢段咁黑暗嘅「麥卡錫年代」，真係好羞家，美國人自己都唔多愿提起。
 
所以你依家明白，點解荷里活電影入面嘅俄羅斯人，唔係黑幫就係衰人啦。呢啲角色定形，根本係當年自我政治審查一路遺留落嚟嘅產物。如果你覺得荷里活成日千篇一律好老套，美國政府其實間接有份造成。

麥卡錫主義喺1950年代中期逐漸消失，點解美國人仲係咁忌俄羅斯？我問你：邊個國家最先成功發射人造衛星？蘇聯。邊個國家最先成功送太空人上外太空？蘇聯。蘇聯太空科研勁，軍事實力強，仲下下食住晒佢哋，美國人梗係唔Like啦，直到成功將太空人送上月球，美國先至扭轉到太空競賽形勢咋，仲一步步成為全球大佬添。之後蘇共倒台，俄羅斯更加不是美國對手，美國人又在可以安安樂樂做全球霸主了，yeah~。

佢哋又點估得到，隔咗幾十年之後，會突然間爆個KGB走出嚟嘅普京，再次激活沉睡多年嘅俄羅斯吖。當時，俄羅斯衰到要賴債，政府員工遲咗成個月先出糧，基建破破落落。寡頭財閥橫行，挖空國家資源，曾經「好打得」嘅軍隊連車臣都打唔贏。誰不知普京上場後，完全變晒，尤其奧巴馬八年，外交軍事交白卷，益咗普京在反恐、中東事務上佔盡上風。
 
「麥卡錫年代」係美國人永恆之痛，連飛雲細細個讀過嘅名作家海倫凱勒，都搞到被FBI監控。所以美國人真係好驚俄羅斯，呢種驚，不單在於各種實力上嘅威脅，而係連敵人在哪裡，敵人是否真實存在，也不知道。所以俄羅斯隨手搵班黑客搞一搞，便輕易令美國人自亂陣腳。