黎明出月餅硬撼曾志偉？ 賣餅都要拋金句
撰文：陳奕熙
出版：更新：
一年容易又中秋，食過五月糭，街上的廣告就好似變面戲法一樣，馬上就換晒賣月餅，今年仲連黎明（Leon）都撈埋月餅呢瓣呀！Leon在Facebook就post了一張月餅相，並寫住：「對月餅每人有不同口味！冰皮！蓮蓉！豆沙！五仁！我父親的摯愛，有人鍾意老字號新包裝，有人鍾意創新或嘗試新的口味。」
黎明真係多諗頭。（資料圖片）
Leon又話小時候香港的中秋天氣好好，可以坐在天台邊聽收音機，邊食月餅，邊賞月，現在卻總是下雨：「到了今年我希望中秋佳節唔好落雨，可以吃着自創的明福俠紫無花果月餅！」Leon仲拋出金句話：「貴或平唔重要點都唔係天價！」、「好食我話但可能有人話唔好食，我都費事理佢總之我覺得好食健康應該信自己，這才是做人的應有態度！」
Leon出月餅。（Facebook圖片）
講返個明福俠紫無花果月餅，到底係咩嚟呢？Leon都有post個product相，月餅罐上面例牌有個月亮，但似乎就冇嫦娥喇，奔月的應該是明福俠本人，連月餅都用咗明福俠打模，大大個Q版公仔好可愛。Leon話月餅聽日就會開賣，雖然幾錢都未知，但啲粉絲都已經紛紛留言話要買，係黎生嘅魔力啊！
話說用藝人做生招牌嘅月餅品牌都唔少，例如陳慧琳、張智霖代言嘅美心月餅、諗起曾志偉就會諗起嘅奇華月餅，謝霆鋒自創嘅「鋒味月曲奇」等，今年連黎明都加入戰團，唔知可唔可以憑住健康嘅紫無花果月餅跑出呢？
+2