【不服來辯】《射鵰英雄傳》收視排第三 無綫情何以堪?

撰文:黃梓恒
出版:更新:
長達49集嘅《射鵰英雄傳》終於播完。(網上圖片)

內地劇《射鵰英雄傳》上星期正式播完,這套劇在內地其實已經播完一段時間,有心睇一早已經上網追晒,而且無大陸一線影星撐場,所以當初無綫買入播其實無人睇好。大家認為此劇只會淪為《女醫.明妃傳》或者《錦繡未央》咁放喺七點鐘無關痛癢時間,得到可有可無嘅十幾點收視就完成任務。

點知無綫大膽地放在八點半黃金時間播放,正當人人恥笑無綫發神經時,Tvbuddy就大巴大巴咁車落各位塊面度,最後拎到平均25點,最高27點的收視。呢啲收視代表啲乜?唔係話好好,不過已經成為TVB 2017上半年的收視第三位(第一、二位是《親親我好媽》和《不懂撒嬌的女人》),撼贏晒同期嘅《蘭花刼》同《賭城群英會》,贏埋上一任嘅《全職沒女》。買套內地劇返嚟就輕輕鬆鬆執收視,咁係咪代表無綫好成功呢?咁諗真係錯得交關,一套已經播完嘅大陸劇可以打沉你自家劇,呢個絕對係警號。

《親親我好媽》sell親情,成功突圍。(網上圖片)
第一套全實鏡4K拍攝,大家唔使再睇TVB嘅廠景。(網上圖片)

高層內鬥顯威風 內亂未平無所從

呢套劇可以上到半年收視第三位,係咪代表套劇真係好?其實可以反轉嚟睇,係比佢打低嘅劇真係好差!先講同期嘅《蘭花刼》,話說當時要播呢套十年前嘅低清劇已經惹起好大嘅回響,一套係舊劇,一套係大陸劇,你TVB係咪玩嘢呀?但原來係有段故。根據消息,某高層買咗《射鵰英雄傳》返嚟擺喺黃金時段播,就惹來另一高層不滿,所以就決定拎返套倉底貨出嚟對撼,如果用《蘭花刼》成功打贏重金禮聘嘅《射鵰英雄傳》,自然就威風八面鬆毛鬆翼。可惜,事與願違,《蘭花刼》平均收視只得可憐嘅18點,18點係一個咩概念嘅數字?係仲低過《東張西望》同《愛·回家》,即係啲觀眾睇完呢兩個節目再熄電視跳過《蘭花刼》嗰一個鐘再開返電視睇九點半呀!能令到觀眾們咁有心機去罷睇呢套劇,硬推《蘭花刼》嗰位高層就緊係面目無光喇。講到尾又係高層嘅權力鬥爭,你TVB本身已經做得愈來愈差,啲平均收視愈來愈低,想當年一套《男親女愛》可以去到最高50點,你而家有30點都話要搞慶功宴?請問係咩功?班高層就好似一堆受晒傷嘅井底之蛙,仲喺度玩蛙打蛙,想逃出生天?難喇!

低清《蘭花刼》成功製造低清嘅收視。(網上圖片)
《男親女愛》最高收視50點,平均都有成47點。(網上圖片)

咁你話TVB係咪真係無心搞落去?又唔一定喎,不過用錯方法囉!好地地你走去搞Big Big Channel,簡稱BBC(當初聽到呢個名我仲以為係真嗰個BBC)。用晒全台資源去搞,港男?Cut!拍劇?削!演員?谷!為嘅就係要搞好呢個BBC,可惜嘅係過咗個幾兩個月,都依然係一潭死水。一來佢初頭個驗證問題搞到好多人都玩唔到,已經係一個敗筆,二來佢呢個開live嘅玩意,已經被Facebook、Instagram、當年嘅17等等社交程式玩到爛晒,你旗下嘅星要開live大可以喺呢啲app度開,我點解要專登開你個app去睇?當然你可以要你啲星力谷BBC,就好似而家嘅情況咁,不過你嘅受眾都係得一班死忠,完全做唔大塊餅,不如俾多啲錢去拍劇好過喇。

一眾藝人力谷BBC,係咪真係有用呢?(網上圖片)

套路已是意料中 舊有佳作已成夢

講完公司問題,講吓TVB本身劇集嘅質素。你話劇本係咪真係好差?其實都偶有佳作,就好似《親親我好媽》同《不懂撒嬌的女人》,不過最高都只係得31點收視。上年認真製作兼久違嘅功夫戲《城寨英雄》最高有35點,玩穿越嘅《EU超時任務》最高都有30點,TVB如果肯認真製作一個好節目,其實係可以交到貨。由其係題材,唔好再拍啲追兇呀,尋仇呀,爭產呀,來來去去都係套路,呢啲觀眾睇到悶嘅劇情。功夫,TVB好少拍;古裝,TVB無錢同大陸爭;穿越呢啲一定收睇嘅又係少拍,《射鵰英雄傳》拍咁過咁多次都收得,TVB有幾可拍小說題材?你話武俠古裝小說拍唔到可以放過你,俾錢買普通小說或者網絡小說都唔肯?美劇風評好,你出套《踩過界》跟風都唔緊要,但你又將佢擺去星期六日播,星期六日有幾多人夜晚坐定定睇電視呀?但佢平均都有接近20點,最高都去到24點,好過你《蘭花刼》。TVB唔係拍唔到好劇本,係唔肯拍,見某一套劇收得,咪繼續拍落去囉,《金枝慾孽》、《巾幗梟雄》、《溏心風暴》、《宮心計》,全部都係翻炒再翻炒,仲要係台慶劇,用晒啲成本都唔肯創新,咪一直故步自封囉!

《城寨英雄》係近年最收得嘅無綫劇集。(網上圖片)
又係爭家產,其實邊有咁多家產爭?(網上圖片)

潛力新人未敢用 大台步向亞視塚

《射鵰英雄傳》成功之處,一來佢用成兩億去拍呢套劇,啲景靚到不得了,呢樣嘢應該等到宇宙滅亡TVB都做唔到,所以唔講。劇本係金庸小說,一定有保證,但TVB亦未必出唔到一個好劇本。接落嚟嘅就係演員,《射鵰英雄傳》導演講過,因為大部分錢都用咗嚟取景,所以無錢請大星,唯有請啲唔紅嘅後生演員,結果係點?個個主角都爆紅。TVB用咩演員?主角來來去去都係嗰一堆當紅小生花旦,完全係唔會起用新人去擔大旗,人哋用兩億都夠敢搏,點解TVB仲可以喺度縛手縛腳?即係如果你話本身都已經好把炮,不求有功但求無過咁就無說話好講,問題係你已經係衰落緊,都仲唔肯去求變?雖然話唔係用新人就一定用好結果,但起碼要去試下,子華神都講過:「唔賭唔知時運高,唔拍唔知票房好。」好彩嘅係而家香港其他嘅免費電視都依然係唔爭氣,所以TVB都仲未聞到陣棺材味,咪繼續hea住先,結果受苦嘅只會係一班觀眾。

《射鵰英雄傳》四個主角都係年青人。(網上圖片)