【早霸王】網上識女仔打上電台表白　森美驚青問：又未拍過拖？

森美同小儀今日喺《早霸王》一到咗「你知道唔知道有人掛住你」環節就即刻緊張起嚟，工作人員接咗男聽眾阿Ray電話入直播室，森美立即打斷佢說話：「唔使諗喇！你鍾意嗰個一定有男朋友呀又係。」聽眾Ray都嚟唔切反應，森美又講：「好簡單，而家啲男仔，如果你鍾意一個人，又唔去表白，又唔做任何事去暗示，去到最後乜嘢都冇做過嘅！咁死嘅機會梗係大好多啦！」

森美講完一大輪，Ray終於有機會講自己點識個女仔，但只係講喺網上討論區識咗兩、三個月，森美又插嘴：「時租女友呀？你咪喎！時租女友俾錢喎同你出街，援交網站呀？」不停逼阿Ray解釋係咩討論區，搞到Ray唔知好嬲定好笑。

森美可能驚再遇上「奇難雜症」，直接問Ray；「佢係孤單人嚟嘅？」Ray答：係呀係呀。」聽得出森美、小儀鬆一口氣。

阿Ray原來好浪漫，同心上人出過幾次街，第一次就約睇日落，第二次則去南丫島行山，跟住又係睇日落，仲掂過下手仔，女仔仲挨過佢膊頭添；阿Ray更喺送女仔返屋企嘅時候表白過，不過女仔話未拍過拖要時間考慮下，講到呢度森美又開始淆底：「又未拍過拖？幾緊張下喎。」小儀都驚驚地：「應該冇乜問題喇卦，不過女仔第一次。」

跟住打畀女仔阿Dean，原來阿Dean聽緊節目而且似乎對Ray幾有好感，森美問：「咁點呀？接佢入嚟喇喎！」Dean念羞答答咁話：「ok呀！」森美仲未敢相信：「我唔知乜嘢ok吓！」好明顯仲有心理陰影！不過今次真係成功喇！Ray問女方願唔願意做佢女朋友，Dean答咗句好，安樂晒！森美真係鬆一口氣：「講完喇恭喜你哋，bye bye！」似乎最開心嘅唔只係呢對情侶，森美同小儀終於過關喇！