【蒙面唱將猜猜猜2】疑似天王天后參賽 鐵娘子險自揭面具
做歌手最怕無個人特色，最好一聽就知你係邊個，不過要參加內地節目《蒙面唱將猜猜猜》的話，就反而有機會為成負累，因為俾人估中真正身份，下一集就無得唱架啦。《蒙面唱將猜猜猜》第二季正式播出，第一集已經出現多位疑似天王天后級人馬，令大家驚喜萬分﹗
第二季節目中，巫啟賢、陶晶瑩、ELLA陳嘉樺繼續留任，仲加入香港人熟悉嘅張智霖擔任評審團，估下一眾戴住面具嘅歌手真正身份到底係邊個。而其中一組蒙面唱將「閒不住的鐵娘子」及「沒朋友的球鞋俠」，就令現場觀眾及評審團掀起熱烈競猜。
2人合唱《屋頂》時大曬唱功，令觀眾聽出耳油， 「沒朋友的球鞋俠」一開口，完美轉音幾乎出賣自己，陶晶瑩一聽立刻大叫「太明顯了」，由於把聲太有特色，加上現場演唱實力超強，兩個人互相為對方和音猶如聽CD一樣，一開聲大家已經心中有數，紛紛估計兩位就係林俊傑與張韶涵。
問答環節時張智霖問「請問這個男的是不是有酒窩」，ELLA即刻搭訕話：「而且是小酒窩、長睫毛」，當事人拒絕回答，不過其後獨唱《小幸運》時，唱腔同之前大為不同，究竟係專登改唱腔定佢當真唔係JJ呢？
而「閒不住的鐵娘子」，幾位藝人評審亦似乎肯定佢係張韶涵，故意問「球鞋俠」：「你看得到她的翅膀嗎（暗指張韶涵代表曲《隱形的翅膀》）？」不過節目中鐵娘子舉手時，差點錯手整甩自己嘅面具，如果唔使估就忽然揭曉，應該會令評審們唔知俾咩反應好啦。
呢集仲有兩位參賽者「白著呢」以及「海綿寶寶」疑似係范瑋琪及黃曉明，「海綿寶寶」話自己有演過偶像劇、牒戰劇，CHILAM問有無錫過ANGELABABY，佢仲大方答有﹗當評審團胸有成竹時，巫啟賢自爆同黃生黃太係北京嘅鄰居，即場致電俾曉明居然接通﹗黃曉明聽到「海綿寶寶」話錫過老婆BABY仲話：「直接掉到河餵魚！」令大家都感到好愕然，到底呢幾位參賽者究竟係邊位？要待下回分解啦。