吳肇軒重踏台板開心過中獎　又演大學生

戲劇雙線發展的吳肇軒，去年至今先後接拍與古天樂、劉嘉玲等人合作的《明日戰記》、《以青春的名義》、《逆向誘拐》， 以及Viu TV新劇《身後事務所》，但演藝學院出身的他，其實一直都好想重踏台板，所以對於即將演出舞台劇《家・寶》一事，軒仔真係開心過中獎：「好興奮好期待！好耐無感受過一班人排戲，今次係《家・寶》二度公演，新加入仲有DJ細So、香港舞蹈年獎得獎者陳敏兒、舞台劇界前輩張銘耀，好想知大家會撞到啲咩出嚟。」

《家・寶》去年公演時，獲不俗的反應，故事以每個人的名字做主題，橫跨80年代到現代香港，吳肇軒於劇中飾演的樂智文是文學系大學生，與女主角余家寶拍拖，湊成「樂如家寶」，讓本來討厭自己名字的女主角改觀。對於自己個名，吳肇軒都話有啲搞笑嘢發生過：「試過同人介紹完自己後，對方以為我叫小軒，仲話『嘩你幾十歲人叫小軒？』」吳肇軒指自己個名係爺爺搵睇相師傅改的，雖然細個時會嫌多筆畫，但而家反而覺得夠特別，希望將來更加多人記得吳肇軒的名字。