【任噏亂評】周柏豪正式變TVBuddy 年尾橫掃無綫頒獎禮大局已定

撰文:洪曉璇
出版:更新:

踏入年尾,見到歌手又係時候問吓:「對年尾頒獎禮有無信心呀?」其實仲有乜好問呀,每個頒獎禮其實不過係場遊戲,要跟主辦方遊戲規則去玩,好似TVB勁歌金曲頒獎禮,自家藝人曝光率高D,唱嘅歌播多D,有獎拎可謂理所當然。要有新鮮感?得,有個勁多FANS嘅加盟咗,可以肯肯定話俾大家知,今年跑出嘅,100%係周柏豪﹗有獎攞固然開心,但前車可鑑,會唔會愛你變成害你?

無論開電視定上網,都瘋狂LOOP呢隻歌,無得避。(周柏豪Facebook)

由2013年起,十大金曲一個唔該整多一倍獎座,頒夠20隻金曲,當中又有一堆係電視劇主題曲,包括王菀之嘅《哥歌》(老表你好嘢插曲)、胡鴻鈞嘅《明白了》(師父明白了主題曲),仲有無乜邊個香港人未聽過嘅《越難越愛》&《眼淚的秘密》。咁今年呢?雖然《陪著你走》之前走勢凌厲,喺劇中集集瘋狂播,但都不及柏豪BB獻唱嘅《使徒行者2》主題曲《天網》。事關呢套戲,截至呢一刻嚟計,係仲未開始播架﹗不過歌就已經瘋狂LOOP完再LOOP,柏豪低音演繹配合角色沉重心情,「再沒有我的檔案」,識唱嘅一齊唱。

自柏豪加盟星夢之後,嚴如TVB半邊仔,即刻加盟劇組拍台慶劇《使徒行者2》,宜家仲拍緊另一套巨製《再創世紀》,呢次新歌《天網》TVB更落重本拍攝音樂微電影,足足11分20秒講述《使徒行者2》前傳,舖路介紹柏豪嘅出現,真係錫到出晒面。根據前星夢一哥許廷鏗嘅紀錄,2015年勁歌金曲頒獎禮,20首金曲一人獨佔2.5首(《真相》同胡鴻鈞合唱),柏豪有龐大粉絲團撐腰下,要刷新紀錄應該係毫無難度可言。

落重本拍音樂微電影,搵嚟張寶兒做女主角。(周柏豪Facebook)

仲有個開心大發現,柏豪出道十年,連叱吒男歌手金獎都拎過啦,偏偏喺TVB年度十大勁歌金曲頒獎典禮,十年來只拎過半個獎,無錯係半個,2008年同鄭融嘅《一事無成》,拎最受歡迎合唱歌曲金獎,就係咁,無啦。不過都好難怪佢嘅,出道無耐就遇上舊公司華納同TVB爆發版權糾紛,有年幾時間直情唔會喺TVB見到柏豪,更加唔好諗攞獎,其實柏豪都好慘豬豬。

加盟星夢後,以後有更多機會見到柏豪BB啦。(周柏豪Facebook)

星夢同TVB基本上已經不可分割,俾多D機會自家藝人,站在佢地立場實屬正常,如果唔係俾咁多錢簽佢地番嚟做咩喎。簽得星夢好似吳若希、菊梓喬,唔拍劇都有得唱劇集歌曲。煲劇時係咁LOOP,上音樂節目又係咁唱,大家先會覺得「使唔使播到咁密呀」。有人話今年如果柏豪橫掃勁歌總選會俾人鬧,其實有獎無獎邊到佢自己決定呀,以前華納同TVB交惡時佢無得揀,宜家如果公司要頒獎俾佢,唔通佢又可以SAY NO咩?

奇妙電視嘅音樂節目《同SING同戲》,你有無睇過?(資料圖片)

撇除TVB去其他電視台,又係咪更海闊天空?先唔講佢地無所謂音樂頒獎禮,淨係數下佢地有咩音樂節目:ViuTV《音樂密密報》每集得5分鐘,仲有《歌度有…音樂微電影》同埋《本地薑》;奇妙電視就有《同SING同戲》同《歲月如歌》,不過老實講句,幾多人知道又睇過有呢幾個節目?對香港歌手幫助又有幾多?大台獨大扼殺歌手機會?不如話其他台唔爭氣,明明有一大班因為唱片公司同tvb交惡,恨曝光恨到發燒嘅歌手可以用,點解都冇音樂節目突圍到呢?呢一抽問題,各位不妨思考下。

+1