唐詩詠做老闆中環派餅 西裝友爭住試食仲要求合照

撰文:李妍樺
出版:更新:

唐詩詠自劇集《不懂撒嬌的女人》後彈起,廣告接到冇停手,今次再上一層樓,自己做老闆投資人氣一口芝士蛋糕店「Petite Merveille」。雖然詩詠做咗老闆,但依然親自落手落腳做宣傳,日前佢趁著Lunch time「快閃」派餅,仲諗住出絕招「撒嬌」嚟冧暈途人,詩詠驚驚青咁話:「真係好緊張,因為唔知大家反應係點,我會有心理準備,預咗大家會拒絕我。」

唐詩詠自己做老闆投資人氣一口芝士蛋糕店「Petite Merveille」。

當日詩詠捧著自家芝士蛋糕喺中環街頭尋找「芝」音人,點知未出招「撒嬌」,已經引起好多途人圍觀,可能因為之前角色OL「Cherry」嘅關係,唐詩詠好受白領男歡迎,仲主動要求要「集郵」,詩詠當然有求必應,一眾途人都主動上前試食,佢自己都話估唔到:「女士比較怕醜,男士會唔好意思拒絕女士,所以成功叫到佢哋試食。」大家鍾意食嘢就啱喇,因詩詠透露自己嘅擇偶條件係要同佢一樣咁為食,「首要條件真係要鍾意食嘢,呢樣重要過任何性格條件,就算佢有嘢唔食都唔緊要,例如我都唔食牛,但對方一定肯陪我去周圍試新嘢食!」

有得食芝士蛋糕,又有得合照,滿載而歸。