余文樂結婚正式封盤 小儀：都估到你地會搵我問回應啦！
撰文：洪曉璇
出版：更新：
「男神結婚了，新娘不是我」，余文樂喺12月5號下晝正式封盤，上載婚紗照正式迎娶拍拖一年嘅台灣女友王棠云，喺辦公室簡直聽到一地心碎聲。黑白行禮照片中，余生余太笑容一致，喺身後一眾親友嘅掌聲，以及漫天花瓣下，攜手邁向人生新階段。見到呢張相除咗戥佢地感到高興之外，唔少人即時諗起嘅，其實係小儀。小儀得知樂仔婚訊後接受《香港01》訪問時話：「都估到傳媒會問我回應架啦，你地係第一間﹗」
2016年8月，網上曾經瘋傳一篇「報導」，以「傳余文樂、小儀公開戀情、承認相戀」為題，話樂仔同小儀出席活動時承認戀情，雖然係誤傳得啖笑，不過樂仔曾經於社交網站留言承諾：「小儀，如果我過幾年都找不到對象的話，我們就真的在一起吧！！！」有好多網友都等緊呢一日出現，估唔到無幾耐就傳出樂仔同王棠云拍拖，依家仲要結埋婚正式落閘添，咁小儀點算好呀﹗
大家真係曾經非常睇好，終有一日樂仔會迎娶小儀架。（FACEBOOK圖片）
同網友們一樣，我地第一時間都諗起小儀，希望關心下佢依家嘅心情。小儀得知樂仔婚訊後接受《香港01》訪問：「哈哈哈﹗唔好話你即時諗起我，我都即時諗起你地(傳媒)，究竟邊間最快問我回應，你地係最快嘅﹗當然開心啦，單係睇張相都感受到佢地好幸福，啲幸福咇晒出嚟呀，當然要恭喜佢地啦﹗(事前知唔知佢結婚？)我點會知呀，我諗住香港得極少數佢地最CLOSE嘅人會知，我點會知呢﹗恭喜佢地啦，祝佢地幸福美滿，不過我知佢地一定會幸福架啦，睇張相已經FEEL到。」
小儀係出名嘅廚神，仲非常有愛心，不時上載同愛犬嘅合照。(小儀Facebook)
不過樂仔承諾過會娶你架噃，依家余太不是你，小儀又會唔會失落﹗「所謂嘅承諾係話如果我無人要就佢要呀嗎，邊個話我無人要啫﹗都未去到生命最後一日，係咪？做人唔可以咁悲觀嘅﹗」小儀講得好呀﹗希望在明天呀嗎，入得廚房出得廳堂，娶到你一定好幸福﹗