陳瀅加拿大零下4度浸溫泉　高炒Selfie曬事業線

女神陳瀅自從喺7月宣佈同賭王何鴻燊個囝猷亨分手之後，粉絲們都好關心佢嘅感情生活，媒體時不時都會影到佢哋兩個私底下密會。近期大家就好少喺新聞度見到陳瀅，原來佢返咗佢嘅鄉下加拿大探婆婆，同時順便睇吓樓咁話，但女神又點會冷落一班粉絲，陳瀅Keep住更新IG同大家分享佢嘅近照，加拿大落大雪，見到佢著晒雪褸咁，睇到都凍！

冰天雪地大家可能以為陳瀅會匿喺屋企嘆暖爐，但女神點會咁易畀你估到，佢今朝先著住雪褸係雪地同狗仔玩，仲話要帶狗仔返屋企。但隔咗陣佢就Po IG Stories限時動態，原來佢同圈外姊姊一齊去咗浸溫泉，原來當地得零下4度，但都無礙陳瀅嘅放假心情，佢上身著咗白色荷葉邊泳衣，浸溫泉都著衫？當然唔止咁簡單啦，女神都有高炒Show吓事業線，仲整咗啲狗仔特效扮Cute賣萌，估唔到原來浸溫泉都可以咁玩法。