Netflix買國產網劇《白夜追兇》 男主角潘粵明咸魚翻生
撰文：鄺鈺瑩
出版：更新：
潘粵明一人分飾兩角，加埋過千場戲，不時背背吓劇本訓著咗。（影片截圖）
網劇近年無論喺台灣、香港定大陸都成為新趨勢，愛奇藝、樂視、騰訊、優酷等播放平台亦開始投放大量資源於網劇之上，令去年有200多部網劇上架。競爭如此激烈，要做到叫好又叫座確係唔易。
第一集已經有分屍場面，劇情十分緊湊。（影片截圖）
優酷自制劇《白夜追兇》今年8月開播，雖然導演同主角都名不經傳，但卻意外地大收，網民大讚該劇故事架構、導演手法、演員表現、服飾道具甚至配樂方面均有水準，令《白》一個月已獲40億點擊，「豆瓣」上的觀眾評分亦高達9.0。最後更贏得Netflix青睞，買下海外播放權，成為首部被Netflix購買嘅內地網劇，並於明年於全球190多個國家和地區上線。不過，由於Netflix之前曾購入《甄嬛傳》，並將76集濃縮至6集，更特意補拍了部分老年甄嬛的戲份，但由於過於濃縮，加上台詞翻譯成英文後超級奇怪，令唔少劇迷都十分擔心《白》會否也是同一下場。
潘粵明2012年同董潔結束4年婚姻之後，事業直插谷底，如今憑《白》翻身，連佢自己都話十分意外。
《白》由一場滅門慘案開始，令關宏宇成為通輯犯，其雙胞胎哥哥關宏峰本為刑警隊長，但由於身份尷尬所以未能參與調查。另一方面，關宏峰一直將關宏宇匿藏家中，每到夜晚就因為有黑夜恐惧症而要同佢對調身份去查案……43歲男主角潘粵明一人分飾兩角時，（哥哥係思維能力出神入化的警隊隊長，而弟弟則因為冤案而泥足深陷）絲毫沒有違和感，而早己被列入過氣藝人、無嘢撈嘅佢，亦因而咸魚翻生，片約不斷，綜合節目亦排住隊上，而潘粵明嘅微博粉絲亦係短短數月間，由100萬急升至290萬。唔少網友都認為《白》 嘅成功，導演王偉應記一功，因為04年入行嘅至今只係拍過兩劇，但《白》由構圖到節奏都十分紮實，第二集一鏡到底、第三集窄巷裡追車更係神來一筆。
《白》監製曾透露劇集製作成本有近8千萬人仔，32集共拍了4個多月，平均4日拍一集，比起一般內地電視劇3日一集花更多時間，為的就是將細節部分做得更好。
王瀧正飾演的刑警支隊隊長周巡，為追查宏宇下落，特意安排關宏峰做警隊顧問，二人關係亦敵亦友。