【周遊東京】日本通周奕瑋帶隊 100円狂掃吞拿魚刺身勁抵食
撰文：洪曉璇
出版：更新：
TVB每年都有幾個去日本嘅旅遊節目，《東京攻略》杜如風嘅瘋狂Shopping、《森美旅行團》森美嘅家庭小品路線、仲有鄭裕玲農夫《Do姐去旅行》知性路線，香港人去日本真係永遠都唔會厭，但拍日本旅遊節目難度亦相應增加，當人人都咁熟悉呢個地方，仲可以拍啲咩無乜人知嘅嘢呢？估唔到新節目《周遊東京》會有驚喜，網友仲大讚係TVB近年最好睇嘅日本旅遊節目添！
Jarvis周奕瑋考獲日本語能力測試N1資格，去拍旅遊節目都唔使翻譯幫手。（周奕瑋Facebook）
主持周奕瑋就咁聽個名未必記得係邊個，見到個樣就會認得，係經常到影展採訪，兼專門訪問日本明星嘅娛樂主播Jarvis。原來佢曾到東京留學一年，考獲日本語能力測試N1資格，故此對當地人先識嘅地道景點活動都瞭如指掌﹗第一集一開始佢就介紹一間餐廳，放低100円可以1分鐘任夾新鮮吞拿魚刺身，Jarvis成功夾到24粒刺身，平均4円一件！
100円就可以1分鐘狂夾吞拿魚刺身，跌落檯面就即刻中止架啦，有得玩又有得食。（影片截圖）
刺身相當新鮮，絕對唔係次貨嚟架！（影片截圖）
【周遊東京】神社參拜開運小知識 周奕瑋：御守有期限非keep一世
單點已經要1000円嘅巴馬火腿Pizza，點杯飲品可以免費食﹗（影片截圖）
另外佢仲介紹咗一間免費食Pizza店，每個月指定3日光顧一杯飲品就免費送8吋Pizza，巴馬火腿貴價款都有得揀，仲有1円利市仔，有得食有得拎。最瘋狂係去到一間時裝店，放低100円就可以100秒極速掃衫！唔係爛溶溶嘅賣剩貨嚟架，連名牌子頸巾都有得搶。經驗豐富嘅師奶就著住上一轉戰利品到場，一件8千幾円嘅外套，佢仲教Jarvis除定身上嘅衫會更得心應手﹗
就係呢位太太，著住戰利品再次參戰，仲好大方咁教Jarvis要除咗身上啲衫再搶呢個秘技。（影片截圖）
唔好睇啲衫放到咁亂，裡面好多寶物架，好多人都特別嚟參與。（影片截圖）
帶埋小朋友做人肉衣架，呢個方法唔錯呀下。（影片截圖）
Jarvis去呢一場大約30人參戰，一開始個個就喺面前埋積如山嘅衣服堆喪搶，規則講明最終要著得晒上身先可以拎走，眼見個個變晒聖誕樹同遊牧民族一樣，唔少女士仲拖埋小朋友做人肉衣架，不過都唔及呢位大叔，搶到23件戰利品，裙都著到3條真係抵佢打破紀錄啦﹗Jarvis都不負眾望，搶到13件當中仲有一條名牌頸巾，總值超過11萬円即係8千幾港幣﹗真係有得玩又有得拎走，正呀！
咁平靚正，Jarvis都暫時放低主持身份，搶完再算。（影片截圖）
最終搶到13件戰利品，仲有條名牌頸巾，成績相當唔錯。（影片截圖）
+9