【周遊東京】神社參拜開運小知識 周奕瑋：御守有期限非keep一世
去日本大家最鍾意做啲咩？瘋狂食好嘢之餘，賞花行山文青系路線都係唔少人至愛。所謂入屋叫人入廟拜神，特別係日本嘅寺廟神社咁靚，係唔少遊人去打卡嘅熱點，不過原來到神社參拜都有唔少注意事項，好似御守有期限你又知唔知？日本通周奕瑋就喺節目《周遊東京》同大家詳細解說。
所謂入屋叫人入廟拜神，喺日本有分為寺廟同神社，到底點分？寺廟係佛教，而神社就係神道教，認住有個鳥居嘅就係神社。Jarvis周奕瑋喺《周遊東京》就同大家分享「4個神社開運小知識」。
一、行過鳥居要小心？
一去到神社第一件事唔係影相打卡，而係向鳥居鞠躬話俾神明知自己嚟參拜，經由參道入神社時要靠左邊行，因為正中係神明行架。
二、入賽錢要用5円？
其實入5円係因為諧音相關語，Jarvis解釋即係香港嘅「食字」，5円日文諧音係御緣，11円同41円都係代表良緣，不過大家就唔好投10円，因為諧音會係「遙遠的緣份」，唔吉利呀。
三、過期御守要處理？
唔少人都鍾意買御守做手信，又好意頭又靚，但Jarvis就帶大家睇下一個御守回收區，原來御守唔可以擺一世架﹗期限係一年，到期唔可以就咁掉落垃圾桶架，年尾或年頭再去神社時放喺回收區，神社會做完法事再處理。
四、求到籤文要帶走？
去神社時大家應該都會見到，有大量籤文綁喺樹上，咁係咪即係求完籤唔好拎走呢？Jarvis走去問神社負責人，官方答案係籤文無論吉凶都要拎返屋企，然後又係一年後綁返喺神社，唔好自己亂掉呀﹗
除咗去神社參拜，去東京有咩可能唔瘋狂食好嘢，呢一集就啱晒一眾食肉獸啦，除咗有個地方集合多間專食羊、雞、豬等唔同部位嘅餐廳，仲有一間係每晚8點舉行A5和牛拍賣，底價100円，每口價100円，價高者得，Jarvis成功以3400円買到原價7000円嘅靚和牛扒，除咗買到平嘢開心，好重要其實係勝出嘅優越感，食落都和味啲架。
暴龍哥教曉大家邊度叫牛歡喜，Jarvis就帶大家去一間，可以食勻82個牛隻部位嘅餐廳。到底邊個部分最好食？原來日本依家最流行食「幻之部位」Chateaubr，亦即係牛腰脊肉。本身牛脊肉已經相當少，Chateaubr係牛脊肉中心部分，大大隻牛切出嚟都係得幾百克，真係相當稀有架﹗厚切去燒一樣又滑又幼嫩入口即融，食落口無油膩感覺，深受日本女士喜愛。