【周遊東京】日本房一定細？ 周奕瑋推介三大性價比高住宿
撰文：洪曉璇
出版：更新：
東京酒店好多細到喼都開唔到，呢間可以望住晴空塔又夠晒大，Jarvis都忍唔住即刻跳上床攤下先 。
去旅行除咗食同買，更多人可能只係想離開工作同生活繁瑣，唔使行步路都咁趕，好好休息放鬆一下。日本嘅酒店出名細，細到想兩個行李一齊打開都相當困難，不過只要識搵一樣有好選擇，日本通周奕瑋就喺節目《周遊東京》同大家介紹幾間又大又靚又有特色嘅住宿好選擇，唔係近地標打卡就係高科技，緊有一間啱心水。
周奕瑋曾經於東京留學，又去過不下數十次旅行，呢次就推介三大住宿熱點俾大家。
【周遊東京】神社參拜開運小知識 周奕瑋：御守有期限非keep一世
入到酒店接待處人影都無隻，但有幾隻恐龍，的確有趣。（影片截圖）
日本出名多高科技又貼心嘅設計，真係隨時睇到嘩嘩聲，周奕瑋（Jarvis）走入其中一間酒店，去到接待處就已經被嚇，呢間唔係鬼屋設計，而係店方竟然出動到大大隻恐龍做接待員，協助客人check in，撳制撳得慢啲隻恐龍又會忽然狂吼，嚇破膽之餘又令人難忘。
自助check in之際，隻恐龍其實不時會「開口教路」，不過Jarvis就俾佢連嚇幾次啦。（影片截圖）
呢個你以為係雪櫃咩？其實係一個集合洗衣乾衣消毒功能嘅高科技洗衣櫃。（影片截圖）
酒店房內看似平平無奇，其實充滿高科技嘅驚喜。呢個看似雪櫃嘅銀灰色物體，原來係用嚟掛衫，唔單止係掛咁簡單，仲係一個神奇洗衣櫃，可以蒸氣洗衣仲有乾衣功能。食完燒肉成身BBQ味道呢個櫃一樣幫到手，撳除臭消毒MODE，掛入去20分鐘即刻清新晒。
只要20分鐘，燒肉味速速清，件衫都直埋好似燙過一樣呀。（影片截圖）
鍾意打卡又唔想趕景點，最好就緊係喺房已經望到地標啦。（影片截圖）
另一間位於晴空塔附近嘅新酒店，喺房內已經可以透過落地玻璃望到地標晴空塔，日景夜景都盡收眼底，隨時可以自拍打卡，連浸浴亦能一睹高塔，不過令Jarvis流連忘返的卻是酒店公眾天台開揚風景，放眼望去無邊天際，靜靜地坐喺度已經相當舒服，Hea足一個下晝都無問題。
喺酒店天台曬住日光，望住藍天下嘅晴空塔，真係好寫意。
人多去旅行想住埋一齊以後就方便得多，因為2018年起，日本民宿正式合法化。
除咗酒店之外，2018年起日本民宿合法化，大家去旅行都多咗好多選擇，特別係一家大細或者同朋友多人出遊，想住埋一齊最好就係揀apartment。有設計師顛倒房間四正傳統概念，創造出9間兼備藝術元素嘅有趣民宿。每間民宿設有3房1廳1廚1廁，但不設衣櫃，想掛衫點算？原來房內嘅梯就係俾大家爬上天花板掛衫，呢啲一個個圈仲相當受力，可以掛起吊床瞓上去，真係非常寫意呀。
想掛衫就要爬上天花板，當做運動其實都唔錯。（影片截圖）
地板以類似遊樂場凹凸設計，返到房都可以養生行下石春路。