何雁詩勤做gym晒summer body:覺得自己大隻過hanjin

撰文:梁子健
出版:更新:

當陳奐仁成功爆肌,杜汶澤矢言挑機,唐詩詠亦發片晒蜜桃臀嘅時候,何雁詩亦不甘後人,喺IG Post出自己嘅summer body。或者有人會問:「吓!今日開始天氣轉凍喎,仲著泳衣晒身材?」事關何雁詩人在外地,享受陽光與海灘吖嘛。

雖則只係一件頭露背,無事業線,又戴埋黑超遮咗樣,但一直被批腳短嘅佢,相信應該可憑呢張相,暫時脫離「哈比人」呢三個隻字,講真睇落條腿唔算短吖,真係要好好多謝幫佢揸機影相嘅人。另外齋睇相嘅話,佢整體而言係fit嘅,呢點唔靠其他人,純粹係佢自己努力運動keep fit嘅成果,難怪有fans留言話:「好身材,求正面!」

何雁詩始終有運動底,由細開始打golf,加上近年成為健身室常客,深蹲、硬舉樣樣做齊,有時佢仲好自滿咁show下腹肌同人魚線添!喺重複兼苦悶嘅健身過程中,佢亦曾做出鬼馬行為娛人娛己,並直言:「有無人發覺gym入面永遠係好多鏡?因為做gym永遠會見到有人做兩下就覺得自己好大隻咁款,望下鏡再欣賞下自己啲肌肉,暗暗地谷兩野好自滿咁,而我都唔例外,泵兩下就覺得自己大隻過hanjin!你睇我自信滿滿咁樣就知啦。」