三高女生冇嫁期?心穎勸姊妹慢慢揀 朱千雪:溝通緊要過層樓  

撰文:陳浩賢
出版:更新:

學歷高、顏值高、人工高的「三高」女生,齋睇條件都知道是天之驕女,但竟然一樣遇到難搵對象的煩惱?究竟是男仔不敢高攀,見到「三高」女生就已經「縮沙」,還是女生集體搵筍盤,可是被稱為筍盤的男士不少已被人私有化,或是享受拍散拖的單身生活,筍盤變得可遇不可求。被譽為「智慧與美貌」並重的港姐,不少是「三高」女生的必然代表,其中兩位港姐朱千雪及黃心穎,談到本地叻女的苦況,異口同聲叫姊妹們不要降低要求,終有一日等到Mr. Right。

朱千雪未有拖拍,可以同好姊妹岑杏賢、蔣家旻食吓飯。(Instagram圖片)

2012年港姐季軍朱千雪,被譽為「民選冠軍」,她在加拿大西門菲莎大學畢業,在拍過《On Call 36小時》及《EU超時任務》後,卻於2015年下半年,毅然向無綫請假一年,修讀中大的企業傳播社會科學系碩士學位,去年9月再修讀城市大學法律博士學位,人靚聰明,再加上父親送贈的兩個合共2千萬物業,贏在起跑線兼且是人生勝利組,但感情生活卻跟不少「三高」女生一樣暫時空白。

朱千雪拍劇拍廣告都不時着婚紗,幾時先真正有自己的婚禮。(Instagram圖片)

朱千雪接受《香港01》記者訪問,對於「三高」女生搵對象難,她表示:「大部分女仔都想搵個對佢好,夾得嚟嘅人,我啲朋友分開嘅原因都係呢啲嘢,唔係因為冇錢或者冇學歷囉。」有說是港女要求高,令男生卻步,更陷於「妳揀人、人揀妳」的困境。她提醒女生不要為此降低要求,「每個人都應該有自己要求嘅,反而要搞清楚自己想要乜嘢。其實女仔最想個男仔陪下佢、氹下佢,但好多男仔覺得自己冇學歷,高攀唔起。」

朱千雪讀完中大的企業傳播社會科學系碩士學位,去年9月再修讀城市大學法律博士學位。(Instagram圖片)

她表示:「樓同車都係啲物質嘅嘢,兩個人生活,或者結咗婚,有個地方住就得,無論買又好,租又好,生活得開心緊要過住得幾大。若果間屋好大,但兩個人唔溝通,又唔一齊食飯,間屋3萬呎都冇用。」朱千雪更稱連學歷也不是她的擇偶考慮條件,「反而唔好同我太相似,同朋友又好,拍拖又好,都想講啲其他嘢,唔好咁悶。等於演戲又搵演員拍拖,咁咪剩係講戲囉,我要有其他話題,鍾意多姿多采啲囉。」

現年28歲的朱千雪,迎接29+1的年紀,不怕遇不上好男人嗎?「又唔驚嘅,總之遇得啱就會拍拖,順其自然囉。情願等一個啱嘅出現,好過搞錯咗,返唔到轉頭㗎嘛。」

黃心穎正忙於拍攝《深宮計》,工作緊要過拍拖。(Instagram圖片)

同是三高女生的黃心穎,她是2012年的港姐亞軍,於英屬哥倫比亞大學的金融與國際商業學士畢業,在修讀碩士期間參選港姐,隨即入行拍劇。黃心穎接受《香港01》訪問,她認為學歷不代表一切,「唔可以用嚟define一個人嘅。(男女溝通及價值觀會否受學歷影響?)一定有少少,但我又覺得唔係好大問題,學校學嘅嘢,應用喺生活上,唔係人人都得,好似我讀finance,但我都唔係做緊嗰樣嘢,所以我覺得唔會溝通唔到。」

黃心穎曾馬國明曾傳出緋聞,對方更被譽為圈中筍盤。(Instagram圖片)

三高女生要搵對象,是否要接受現實,其至降低擇偶要求?「對我嚟講,唔會因為任何嘢而降低要求,而且學歷對我嚟講從來唔係一個要求,我會覺得冇乜所謂,好多其他因素可以將學歷嗰樣嘢睇得輕啲,可能嗰個人好有毅力,或者佢做其他嘢好叻,佢個人好好嘅,都可以補償返佢學歷唔高囉。其實搵到高學歷同有錢嘅人唔難,但加埋有感覺呢就難過搵個有錢嘅人。」

黃心穎在播映中的《與諜同謀》,跟羅嘉良飾演兩父女。(Instagram圖片)

早前無綫節目《有樓萬事足》,港女Seasun擇偶條件是先有2000呎樓,令不少男士卻步,但對於黃心穎來說,物業從來不是加分或是扣分的原因,「我一定會買自己嘅樓,自己嘅車。你問我介唔介意對方冇樓,我諗我唔會介意,驚佢介意啫。其實搵對象由錢方面去睇,我諗永遠都唔會幸福,同嗰個人相處唔係睇錢㗎嘛,可能係俾妳嘅感覺,係相處得到,如果你真係鍾意嗰個人,即使佢收入好低,我相信一定有辦法令件事work。我相信到某一個位,會遇到啱嘅人,唔會話學歷收入相當先係啱。」朱千雪及黃心穎看來毫不心急,相信緣分總會到來,姊妹們收到未?