【春嬌救志明】余文樂特別的歌唱技巧 夾張新悅《明知故犯》最神
因為甩甩地唱《春嬌救志明》，余文樂成功為電影掀起結局高潮，而當中的另類演繹方法，實在聽到大家好開心，人人都甘願被這首神曲洗腦，一聽再聽。這首歌可謂是樂仔自2002年加盟樂壇後，最高的音樂成就。其實樂仔入行以來，大大話話都出過3張EP兩張大碟，Hit歌都有好幾首。有趣是，當樂仔還是歌手時，歌藝不時備受批評，但自從半退出樂壇，以玩票性質唱歌後，外界反而多正評，就如上次在內地節目唱《突然好想你》和去到五月天大連演唱會唱《春嬌救志明》都獲讚賞。或者余文樂的歌聲就好似他的籃球技巧又和關公顯靈一樣，不能多，久唔久出現一下就會覺得佢好靈好正。
余文樂最先是以模特兒身分入行，直至2000年接拍港台劇《青春@Y2K》，正式涉獵演員範疇，後又接拍台版《愛情白皮書》演歐陽掛居，在台灣紅起來。千禧年後的樂壇，還是以靚仔靚女掛帥，有把口識發聲唔理好聽與否，都可以出唱片，之所以當時出現過一批model歌手如趙頌茹（阿Yu）、王秀琳（Mango）、董敏莉（Monie）等。余文樂算是男方代表，既然有人氣又有靚樣，於是被環球唱片羅致旗下，更安排他跟陳潔靈學唱歌。
無厘神氣版《明知故犯》
簽了唱片公司，未咁快有碟出，先跟當時同門師姐張新悅（當時為張燊悅）翻唱許美靜一首《明知故犯》，小試牛刀，不過試牛刀變成試牛聲，樂仔的重低音獻技跟張新悅把聲格格不入，而且經驗尚淺，演繹得無神無氣好似被人用支槍指住逼唱咁，今日聽番都打冷顫，話時話，仲好笑過首《春嬌救志明》廣東版喎。一句講晒，輸經驗。
長氣過克勤《全面收購》
首《明知故犯》如歌名一樣，犯到錯晒擺明係中伏，所以來到個人第一主打真係不容有失。唱片公司見樂仔咁好動，又見當年R&B大熱，所以就揀首節奏感十足的《全面收購》俾佢唱。節奏明快是其次，歌詞超密集先係重中之重，一句「誰話急需於尋求便有出售 妳對我對我作出收購 失去自由 我未能接受」5秒內要唱完，係咪想挑戰樂壇快槍手李克勤首《Victory》先？值得一提MV有朱茵登場，當中跟樂仔的關係曖曖昧昧，一樣精彩。
至尊極樂金曲《還你門匙》
要你數一首極品余文樂的人生金曲，係邊首？相信九成人會選《還你門匙》。來自樂仔首張專輯《Private Room》的《還你門匙》，歌自然係好聽，就連MV都好睇，因為有最爽口年代的Race@2R做女主角，MV情節仲有少少洋蔥及暖男feel，無得再好。第一張專輯已經造就出一首個人代表作，夫復何求？
的士陳前身《司機》
香港填詞人，可能係全球用最多種方法去比喻一段感情的人，單係關於駕駛，已經有謝霆鋒的《塞車》、陳偉霆的《Taxi》，還有余文樂呢首講保姆車司機愛上明星的《司機》。其實是電影《下一站…天后》的情節縮影，歌詞非常到肉，跟的士那種上上落落的關係，冇得比。
被雷劈中的《晴天行雷》
這首《晴天行雷》是樂仔在環球唱片尾段的作品，未知是歌曲風格影響歌詞，還是歌詞影響了編曲，總之歌曲唱至副歌部分就突然上身，成件事推高兩、三格，樂仔就大喊一句︰「晴天行雷 無論是否因此犯綁架罪 回頭就鎖住你」似要劈中你耳朵一樣，非常震撼又洗腦。TVB版本的MV更見心思，女主角陳法蓉，暪住樂仔出軌，後被樂仔發現，心情正正是歌名那四個字。