【人100%靠外表】桐谷美玲示範簡易編髮　5分鐘即成手殘女生救星

無洗頭唔一定要戴帽嘅，編髮一樣得。日劇《人100%靠外表》每集都會進行「美的研究」，3位主角桐谷美玲、水川麻美和搞笑藝人Buruzon Chiemi（ブルゾンちえみ）由scarf、牛仔褲到名牌袋都一一親身試驗，令劇集變成扮靚聖經。而第10集美的研究就以編髮為主題，桐谷美玲就親身示範了幾個簡單造型，夏天將至，不想頭髮黐着頸後的話編髮就幫到你，仲可以令造型更多變化，最重要的是學完聽日可以即編，今晚唔駛洗頭啦！

短髮編髮

編髮不是長髮的專利，雖然短髮鬢唔到辮，一樣有好多玩法。先把頭髮大致分成左右兩部分，用橡筋隨意束起再輕輕扯鬆，將髮束尾端拉起穿過橡筋上方，由上至下扭轉，頸後碎髮則可以捲起，再以髮夾固定。

中長髮編髮

相比短髮，中長髮編髮的花款又更多了。用捲髮棒把頭髮燙捲後，在腦後位綁起一小束頭髮，參考短髮編髮的方法扭轉，增加層次感，再在左右兩側照板煮碗紮起兩束，用髮夾把三束頭髮固定在一起，想再多層次一點，可以把下方的頭髮扭幾扭再夾在中心位置。

長髮編髮

編髮來說，長髮未必最複雜，複雜又未必最好睇。先簡單紮起低馬尾，拉起橡筋的一圈，將整束頭髮穿過一半形成半個髮髻，將髮尾分成兩束，扭成麻花捲，繞在原有的髮髻上，用髮夾固定好即可。

另一個選擇就是把頭髮鬢成一條長辮，用橡筋綁穩後向內捲藏好，隨便加個頭箍已好有造型。

長髮編髮 進階版

如果自問心靈手巧，可以挑戰以上造型。起初的步驟同樣參考中長髮編髮，之後把頭髮分成三份，把三束頭髮分別鬢成長辮，再把三條長辮鬢在一起，最後當然是扯鬆、扯鬆、再扯鬆，就大功告成。

當然，編髮的方法又點止呢幾種，有心研究的話絕對可以千變萬化日日唔同花款，有興趣不妨參考以下圖輯搵靈感。