【不懂撒嬌的女人】入行得5千 慳妹林秀怡捱到變老闆：我唔買嘢
《不懂撒嬌的女人》除了主角出色，配角亦搶鏡，不少人都有留意劇中當Cherry(唐詩詠飾)的三姊妹，當中CoCo(林秀怡飾)相當搶鏡，將港女特質發揮得淋漓盡致，不過現實中的她是一位很踏實的演員，如果在Google搜尋林秀怡，一定找到一篇寫她悲慘身世的文章，住天水圍公屋，與母親相依為命、在無綫當藝員要在日本餐廳兼職當侍應，月薪得7千元，不過林秀怡一點亦不覺得自己悲慘，她說:「有時好多報導都有講呢樣野，但係我又唔想再提，唔想大家可憐我，同埋我又唔覺自己可憐，好希望有一日觀眾可以將焦點放係我工作上。」
如果用勢利眼光去看林秀怡，用收入去衡量，一定會覺得她好慘，不過林秀怡自己很開心，她說:「千祈唔好覺得我慘，我好開心呀，有幾多人可以做一份自己夢想嘅工作?(𠲖家收入點?)而家好好多，入行咗9年，每年都有加人工，每月都有1萬蚊收入，我好慳㗎，唔買嘢，齋食嘢駛得幾多呀?(吓?夠駛咩?)以前我哋得5千咋，𠵱家咪多咗囉，我好慳㗎，交完租仲儲到錢開鋪，如果俾兩萬蚊我，但做份我好唔鍾意嘅工,我咪仲辛苦，我好易滿足，有得俾我返工就得，就算返去演個office女仔冇對白，我都好開心，因為當你諗到有啲可能連呢個機會都冇，幾個月都冇通告嘅，你會覺得有工返好開心，(妳係咪太易滿足?)可能係...哈哈，但唔係咁諗，可以點呢?我又唔係女神。」
林秀怡性格樂天，亦知道訓練班出身，需要的時間長，但她亦有失意時,她說:「以前見到一啲新人，一入嚟就有一個好好位置，會有唔開心，但而家我睇化左同埋我自己性格上可能太快就無事，即係可能都會唔開心，但係訓醒又一條好漢，所以都無野。同埋都明公司既，市場上的確唔係需要我呢類演員，咁我唯有自己努力，都9年啦，可能去到10年攞埋金牌先再決定走唔走落去，(咁心做一個配角?)唔甘心可以點?哈哈....我覺得生活開心最緊要呢行要靠好多運，咁可能我運未到姐，(最難捱咩時候?)做緊自己鍾意嘅野你唔會覺得係捱，係有時等通告無劇開嘅日子心理壓力最大，不過好多人都要經歷呢個時間，我而家都仲經歷緊，我細細個已經好鍾意表演㗎喇，目標好清楚。」