【奇妙電視】「澤女郎」妹頭無得再講波：阿澤又衰格又好人

如果大家有收看有線球彩台的習慣，或者有睇《杜汶澤食住上》，應該對盧頌恩不會陌生，不過就可能只知道她叫妹頭。其實她入行接近八年，在2010年便加入有線電視球彩台講波，之後去過新城做DJ，亦都開始在有線娛樂台做主持，所以你在奇妙電視都會見到佢，化身做「澤女郎」。

專心做主持的她，現在已經好少在球彩台講波，最多都係一個月客串一兩場賽事。點解會咁？妹頭接受《香港01》訪問時就說：「因為我以前做親節目都會開入球大，但呢排成日都無大波（賭波術語），呢一年就無咁準囉，可能因為我唔係持續性做。有線變動其實對我無乜影響，不過無得講波就有啲唔捨得囉，因為公司想我專注做主持，講波只可以係客串性質。其實依家有線易主仲好喇，有新金主嘛，又話唔會改變個架構，我覺得咁樣幾好。」

阿澤就出了名轉數快，講嘢抵死兼搞笑，妹頭第一次同阿澤拍節目，會唔會招架唔住呢？妹頭表示之前經常看他的戲，想不到真的可以合作，她說：「其實佢日日都爆肚，唔爆先至驚，佢講嘢成日都好似衰衰格格咁，同埋佢好鍾意揶揄啲女仔，玩啲女仔。不過你覺得佢玩緊你嘅時候，其實佢都係幫緊你，有時佢講嘅嘢我哋都接唔到落去㗎，因為尷尬嘛，我哋只可以輕輕跳過。雖然佢表面好似好衰格，不過對我哋真係好好，又會俾位我哋講嘢，又會請食飯。（有啲咩衰嘢呀？）好似有一次整焗豬扒飯，乘機係咁話我哋係豬扒，同埋佢好鍾意食字，例如講芫茜，又會話啲芫茜好臭呀，麪包又講吓包皮呀，電視就算我哋接到都出唔到街喇。係咁講啲衰格嘢，不過都ok嘅，我哋都知佢一向係咁。」