【毛孩與我】當寵物踏上彩虹橋 過來人分享6件事你要準備

撰文:
最後更新日期:

愛護動物無分國界,《香港01》寵物頻道及其facebook專頁歡迎你投稿。本文是吳小姐的投稿,她分享了與家中狗狗小白走完最後一程的經歷,並分享寵物善終服務的流程,希望這些資訊對寵主有用。

吳小姐,已有17年的養狗經驗,家中的狗狗小白就像親妹妹般,由小學時便一直陪伴左右,但最近小白不幸離世,有感寵物善終的事鮮有人提及,所以希望透過文章,讓更多人初步了解善終服務程序和大約的收費。

好似無咩人分享過狗狗離世後喺善終服務果度嘅細節,想喺度做個分享,希望可以畀各位有需要嘅家長參考,為狗狗做充足嘅準備(如果啲相令大家不安,請見諒)

小白是隻活潑好動,喜歡跑跑跳跳的狗狗。(吳小姐)

事前其實我無仔細分析過各間善終嘅分別,只係簡單地問過吓邊幾間信譽較好,因為我覺得做呢啲research好灰,但無想過一切發生得咁突然...

以下係我光顧情x在服務嘅經過:

【1】 當日通知善終公司上門收走遺體,佢哋喺電話報咗價(我狗狗約6kg,$1800要落$1000訂金,價錢已包骨灰罈)佢哋就用合適嘅膠箱收走遺體,架車喺特製嘅,後面車箱好似雪櫃咁放滿一個個膠盒。

【2】 事後第二日已經安排到火化,間善終公司位於葵涌工廠大廈,位置較偏僻,附近比較雜亂,如果真係講方便可能未必係個好選擇,但入到去環境都算乾淨整潔。

【3】 火化前可以幫狗狗準備食物、玩具、衫、被、狗帶、花等等。要留意如陪同一齊火化嘅食物類,係唔可以有筋或骨,佢呢間有提供紙碗放食物,但以防萬一,建議自備免得放唔到食物畀狗狗。而其他物品有膠質嘅,都唔可以送入去火化,所以被同衫要選100%綿質,衫要剪去鈕扣、拉鏈、魔術貼 (真係入唔入到爐,要由火化師決定)相中紫色布係有陪佢入爐嘅,但我有提到想張被陪佢入爐,但佢哋話張被太大,所以要求剪細啲(我唔清楚佢果度有無提供剪刀,但我自備咗自己嘅剪刀)

(吳小姐)

更多寵物文章:【毛孩與我】張小姐:人鼠關係,只因緣份到來

【4】 當日佢預畀我哋既時間係2.5小時,去到先選中式定西式(可能當日無其他狗),前半小時畀家人靜靜陪伴狗狗。當時狗狗身體仲係柔軟嘅,好似瞓著咗咁,而且身上依舊有佢陣味,無剛去世時咁僵硬,我諗佢哋做咗啲手腳幫佢回溫(我唔清楚如果雪得耐嘅狗狗係咪都可以咁)而我狗狗離開時係開眼嘅,去到見佢合埋咗眼顯得幾安詳。然後半小時後,幫佢過床去個鐵盤度入爐。當日我好匆忙所以無準備花,但佢都畀咗幾朵小花我哋送別狗狗(少少感動)

【5】 入爐後會問你要唔要睇住佢起火,我選擇咗關門,然後㩒制。之後安排我哋喺休息室靜候啲骨灰。喺等候期間,佢會問你要咩骨灰龕同要自己選一張相,用嚟貼喺上面,所以建議事前要儲定啲相喺手機內,方便佢哋做嘢。

【6】 啲骨燒到咁上下佢會問你要唔要睇啲碎骨,即係已經燒完等入骨灰罈,我狗狗骨輕,所以1個小時就完成。

成個過程都幾滿意,完全無sell野,只係問要唔要keep佢啲毛髮用嚟做飾物果啲...去之前我查詢咗想做個腳掌印,但都幾貴下($1xxx)所以預先喺BB店買咗個BB手掌kit,快快手幫佢整咗做留念。

(吳小姐)

更多寵物文章:【毛孩與我】林若曦:因為養狗,整個生命彷彿更完整了

真係好多謝你17年嚟嘅陪伴,你一直好乖好懂性,帶咗好多歡樂畀我哋一家,生前你最愛跑跑跳跳,但臨終前只可以喺輪椅上行。我知道你有啲唔開心,希望你日後喺彩虹橋繼續開開心心,可以好似以前咁自由奔跑。
吳小姐

我們愛護毛孩,支持領養,欣賞所有負責任寵物主人,我們和讀者都有共同信念,矢志為寵物提高生活質素 。因此,我們誠邀你分享飼養心得、寵物成長故事,以至是可愛短片、圖片。投稿經 #毛孩子 編輯部潤飾後,我們將為你開設專欄,於FB及hk01網站、手機App上發佈,讓更多人可以分享到你的心得和見解 。

投稿可電郵到

anistory@hk01.com

主題請寫上「投稿毛孩子」

初次投稿者請提供個人照片、個人簡介(100字以內)用作開設專欄



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。