【毛孩與我】無裝窗網貓貓墮樓亡 客人紋身紀念 女紋身師動真火

撰文:
最後更新日期:

不少寵主為了紀念亡寵,都會將貓狗的樣子紋在身上,但「符號」中包含的意義可能不止於此。女紋身師Elizabeth接受《香港01》訪問時分享,曾有客人欲紋身記念死去的貓貓,但閒談中發現貓貓的死,是因主人無裝窗網,這時Elizabeth不禁動怒:「如果仲有下次養貓嘅機會,請你裝窗網,否則你唔好再養喇。」

對於Elizabeth而言,紋身的真正意義,其實是提醒自己把握現在,珍惜與在世寵物一同相處的時光。

問到為最喜歡涉獵的紋身題材,Elizabeth二話不說表示是寵物紋身。( 吳嘉俊攝)

熱愛動物 醉心寵物紋身

Elizabeth從小熱愛畫畫,踏出社會後當了一名幼稚園老師,後來發現朝九晚五工作與理想不乎,因此毅然辭職,希望充分發展自身對畫畫的興趣,機緣巧合之下接觸到紋身行業,一做便做了5年。

問及最喜愛的紋身題材。Elizabeth二話不說表示是寵物紋身,「好好彩身邊嘅朋友都係好鍾意小動物,再加上有人係做開獨立義工,成日會幫一班流浪貓狗,咁隨之佢哋就希望將呢啲小動物紋喺身上面,而我對呢方面嘅興趣亦因此萌芽。」

「符號學」的世界可說是非常浩瀚,直線與曲線的交疊往往會令人難以理解。(鄧偉傑攝)

▼▼▼點撃影片!看紋身師故事!▼▼▼

寵物紋身種類廣泛

「符號學」的世界可說是非常浩瀚,直線與曲線的交疊往往會令人難以理解。Elizabeth則指,若要與客人簡單解釋寵物紋身的話,她大致會分成三類,「第一類最簡單嘅就係紋寵物嘅樣;第二類就是紋寵物嘅名再配以一少少嘅設計;第三類就再抽象啲,將愛寵紋成另外一樣嘢,例如你可以加插幾何嘅元素落到一隻臘腸狗嘅樣入面,令到成個紋身變得更型格。」

Elizabeth表示客人若希望令整個紋身變得更型格,可加插幾何嘅元素至作品中。(受訪者提供)

▼▼▼點撃圖片!看更多紋身作品!▼▼▼

客人因狗狗逝世痛哭 禁不住跟著流淚

當了5年紋身師傅,最令Elizabeth深刻忘懷的紋身經歷,離不開「死亡」這二字,「當時我有一隻貓貓好唔好彩離開咗我,咁啱當時就有個客係三姊妹嚟嘅,佢哋嘅狗狗又咁啱走埋,成個紋身嘅過程就好似『同是天涯淪落人』咁,大家就好似失去小朋友嘅家長,每一下紋落去心都好痛。」

而最令Elizabeth觸動情感的是,其中一個妹妹完成紋身後,坐在原處不停痛哭,連本在旁邊等候的姐姐都抵不住情緒,三人一同抱著哭泣,「當時見到呢個情景,我又忍唔住企咗喺到不停咁喊,對我嚟講呢個真係一個好深刻嘅經歷,因為皮肉之痛,點樣都唔會及你嘅心痛。」

Elizabeth表示紋身所帶來的痛楚只是皮肉之痛,卻怎樣也不及你的錐心之痛。(鄧偉傑攝)

客人家中無裝窗網 紋身師斥:你唔好再養喇

基於專業操守,Elizabeth說一般都避免與客人出現磨擦,但有一次一位客人觸動到她的「憤怒線」:「某位客人上嚟我嘅Studio(工作室)話想紋佢死咗嘅貓貓,傾談中發現原來呢位客人係因為屋企無裝窗網,貓緇跳咗落樓死咗,我聽完之後就好傷心同有啲嬲,忍不住同佢講『如果仲有下次養貓嘅機會,請你裝窗網,否則你唔好再養喇。』」

Elizabeth冀主人把握與愛寵相處時光,不要當失去了對方才學懂珍惜。( 吳嘉俊攝)

▼▼▼點撃圖片!看製作紋身過程!▼▼▼

冀主人把握與愛寵相處時光

當上紋身師多年,Elizabeth坦言不少客人總是選擇在愛寵死後才懂得學會珍惜,並希望透過「紋身」找到一絲慰藉,「紋身其實唔單止可以用作懷念故寵,對我嚟講當寵物仍然在世時,你身上嘅寵物紋身正正可以喜歡提醒你把握現在,珍惜同寵物之間嘅相處時光,而唔係等到你嘅愛寵走咗之後,先喺到嬲自己點解唔花多啲時間喺佢身上。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。