【 Show 後煙 】 Lo-fi Beebop 快炒旋風 觀眾: 永發是文化地標

撰文:
最後更新日期:

扭耳仔除了聽一眾音樂人去論盡樂壇之外,都好想聽到樂迷的心聲!現帶來【 Show 後煙 】這環節讓大家在聽完 Show 後將感受與我們慢慢分享!這場《 Lo-fi Beebop:快炒旋風 》由音樂人 Tomii Chan 與 Sam Chan 即興舉辦的演出。在這個場地這個圈子的show後煙位,我遇見了什麼人?

油麻地「永發」,一間地道的茶餐廳背後,曾經舉辦過多個小型但非常有趣的派對,一支結他30人輪著用輪著唱;樂隊將整套鼓放在餐廳中間,加上插電樂器演出;DJ舞池、blues 之夜、 hip hop battle ,亦有日劇《戀上香港》在此取景,有意無意地「永發」成為了一個文化地標。 ( 攝影 : Moment Hung )

入夜後 Sam Chan 將家人主理的「永發」變成一個文化展示場所。

「永發太子爺」Sam Chan :「我本來想講不過不失,但佢哋玩得好好!Tomii 玩了我好想聽嘅歌,阿悅玩了一首我有份嘅歌!某程度上,呢場算係幾成功,嚟緊想啲朋友玩多啲show,做多啲音樂,可能不在永發,令到香港不會咁悶。(覺不覺得永發成為了地標?)咁.......呢度係永發呀嘛!」

第一隊演出單位 科學麵 向觀眾派發科學麵。

樂隊 科學麵 成員 (左) 結他手 Martin (右) 主唱 阿悅 。

見到 DJ Dom 時才剛完了第一個演出單位,他不知說什麼。

903 電台節目《 無定向喪煲病狂 》客席主持 DJ Dom  ( Shelf-Index ) :「 第二、三次睇永發gig ,organize得愈來愈好,美中不足係無得現成叫乾炒牛河同無電視睇 《 大帥哥 》。今次最大驚喜係『 金巴利道乜乜乜 』,但佢哋好衰,無 SoundCloud 得個 『 哀豬 』。 」

科學麵 阿悅 不抽煙,但專程問身後朋友借煙來拍照。

樂隊「科學麵」成員 阿悅:「(第一次來永發?) 你講表演呀?第二次。(樂隊為何叫科學麵?)因為去台灣旅行,食咗個科學麵覺得好好食,不如就叫科學麵。(今日覺得怎樣?)第一次喺咁多人面前表演,上次沒有咁多,今次多了十多個。」

Sam 與 阿悅 合唱兩位共同創作的〈 控煙辦 〉。

阿悅:「(剛剛與 Sam Chan 合唱的那首歌是?)嗰首歌因為我成日想身邊嘅朋友唔好食煙,咁我都有首歌叫〈 No Smoking Club 〉,希望啲朋友健康啲,大家可以見耐啲!Sam 就反駁我,作咗首〈 控煙辦 〉就話我好煩,成日叫人唔好食煙。佢求其用〈 Fake Plastic Trees 〉嘅 chord 嚟寫一首歌,兩、三個 chord 咁。(你成功了,你在一個吸煙的專欄去宣揚這個訊息。) 係!但啲朋友都係繼續食煙。」

兩個吸煙者最少一個因吸煙提早死亡,戒煙熱線1833 183。
世界衛生組織

第二隊演出單位 「 金巴利道路真理生命聯合 」 頭帶與咪高峰結合的面罩,成員最後說歡迎大家加入,亦歡迎成員退出。

凱婷 因經常在澳洲,所以很難得可以在永發看到演出。

楊凱婷 :「一位叫 阿Sam 嘅朋友介紹我嚟,但我本身係 Jonathan Yang 嘅fans,之前都miss晒佢啲show,今次有機會到來,咁真係好興奮!(沒有看過又怎樣稱得上粉絲?) 唔係呀!我之前唔喺香港。(其他兩隊怎樣?) 第一隊幾好聽,之後第二隊算唔算係實驗嘢?(我聽完眼濕濕)佢哋係咪浪漫底?聽到覺得好浪漫。 」

雙胞胎姐姐 阿蕎 與 Hydra ,他們不斷說我像一個朋友叫阿傑。

Hydra :「(你與雙胞胎姐姐在永發相遇嗎?)唔係,佢成日抄我,我去邊都抄我囉!我嚟呢度係支持我嘅偶像阿悅。(他的演出怎樣?)我差不多最後先到,幾好睇。(經常來永發?) 我係支持永發,好支持咁地道嘅show。」

Hydra 亦表示她那麼支持阿悅,是因為他很支持她的「好朋友」那首〈 喜歌 〉,「科學麵」的instagram 只follow了 Hey Joe Trio 。

阿蕎:「你係扭耳仔?我有睇。我好鍾意 Clockenflap ,上年我第一次去。(講返永發好嗎?)今日係我第一次嚟永發,個feel都幾好,大家都坐喺個地下度!最鍾意係見到啲糖紙跌咗喺地下,咁啱同旁邊個pedal同色!大家好投入在音樂入面,見到大家做到專注嘅事,覺得好開心。(你小時候參加朗誦隊?說話那麼字正腔圓和正面。)我係哈姆太郎,希望每天都過得開心。」

正修讀電影的阿蕎,想法非常正面,是發言人的材料:「睇show有好多嘢可以做,當然第一樣係尊重音樂,第二樣係識到鍾意音樂嘅朋友。(你做什麼工作?)我讀緊電影,但我拍啲片好垃圾。(看了《 G殺 》沒有?)《 G殺 》未睇但係想睇,聽人講好...... 」

Underdog 同時是 Die ChiwawaDie 以及 Noah To Nowhere 鼓手

Underdog  :「(今晚如何?)好好睇,嚟過幾次。睇facebook,睇宣傳見到今晚場show。(有沒有在這裡演出過?)沒有。(對新一年有什麼期望?)多啲show睇,希望有唔同類型嘅show,唔同地方嘅show。(同Sam的友情?)佢有時會嚟睇 Die ChiwawaDie ,跟住就識咗,留意一下佢搞嘅show。 」

問到 Underdog 何時有演出?隔日後,她傳了這張圖給我:

Pmq 擁有自己的一人樂隊 Luther’s Sister ,以及與 Underdog 都是 Noah To Nowhere 的隊友。

Pmq :「今日非常之正!(之前有沒有在永發演出過?)有,好像是上年八月的事,三十人每人唱一首歌。今日少人咗,之前多人會迫到好焗。(覺得這個場地怎樣?)這個場好 chill 好貼地又親切嘅感覺,可以人哋唱唱吓,我鳩叫都ok。(有什麼與Sam講?)搞多啲 show , 多謝你喺度搞 show ,次次都好撚正。(新一年有什麼期望?)秘密。」

壓軸由Tomii Chan 與 Jonathan Yang 兩個單位互換的演出。

Mandy (左) 與 肥狗 (右) 都遲到了,錯過了一半的演出。

肥狗:「(為何你會遲到?)唉......(覺得今晚如何?)氣氛好好,場地好特別,仲可以喺band後面見到蛋撻,呢件事好好。(演出單位如何?)我唔記得咗叫乜名.......哈哈」

Mandy :「(為何帶班朋友來?)佢哋鍾意啲刺激嘢!因為我有得免費睇,所以我就想嚟睇。(同主辦方有什麼關係?)我幫阿Sam整poster。(同Sam的友情?)佢係一個好人,新一年希望佢開開心,希望大家都開開心心。」

這次演出的海報由 Mandy 設計。

一月還有很多演出,我們show後食煙位見:



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。