【每逢大事講故事】特朗普玩轉老朋友 擺耶路撒冷上枱只為金主

撰文:
最後更新日期:

「邊個鍾意通處玩?乒乓!乒乓!每分每刻佢都作反!乒乓!乒乓!」好似電影《玩轉腦朋友》(Inside Out)咁,不少小朋友腦裏面,都住咗一個幻想朋友乒乓(Bing Bong),陪佢上天下海,經歷成長。美國總統特朗普侵侵雖然成71歲人,但喺呢個冷酷無情、爾虞我詐嘅政治世界,佢都需要一個好似乒乓咁陪佢去經歷、安撫佢寂寞心靈嘅朋友。

侵侵嘅乒乓就係以色列總理內塔尼亞胡(Benjamin Netanyahu)Bibi是也。

侵侵同Bibi識咗30幾年。(視覺中國)

侵侵宣布承認耶路撒冷係以色列首都,並會將駐以色列大使館由特拉維夫搬去耶路撒冷。唔少人話佢係咪痴咗線定冇腦(結論都係個腦有問題),其實佢就係個腦無事,仲諗咗好多嘢先會咁做,而乒乓Bibi亦喺侵侵個腦入面有一定角色㗎。

想知更多Bibi嘅故事,誠邀你睇返飛雲前作:

【每逢大事講故事】啞忍野蠻Bibi八年 奧巴馬卸任在即大振夫綱

舊年侵侵走去選總統參政,人哋臨老入花叢,侵侵就臨老玩轉行,一下唔覺意玩大咗當選美國總統。話就話侵侵年紀大,咩風浪未見過,但其實佢喺政治方面真係個零,係一個初哥,宣布當選一刻應該係好怯嘅。

去年宣布大選結果後,侵侵陣營一遍歡樂情緒,惟照片中右下嘅侵侵斯人獨憔悴,心諗:「我做咗咩?點解會當選?」(網上圖片)

要周旋喺不同國內外嘅政客之間,處理內政外交問題,對70歲嘅侵侵嚟講真係好痛苦。雖然有一班顧問(aka佢個女、佢女婿、同佢啲生意朋友)傍住,但侵侵都力不從心,每夜倚窗輕嘆,低頭將無奈透過Twitter訴諸網絡世界。

侵侵打covfefe,應該係心情差打錯字啫,又要同你哋講嘅!(Twitter截圖)

好彩侵侵有個識於微時嘅好朋友、即係乒乓Bibi。時間返到去上世紀80年代,當時兩人都30幾40歲,正值壯年(即係又話侵侵而家唔後生啫),Bibi係以色列駐聯合國大使,經常出席紐約政經場合,識咗侵侵爸爸Fred Trump,而幫爸爸打理地產事業嘅侵侵自然亦同Bibi有來往。

Bibi喺1984至1988年間出任以色列駐聯合國大使,所以同侵侵爸爸都有來往。(UN Photo)

之後幾十年,兩人都各自努力,侵侵就做咗地產大亨,Bibi就慢慢登上權力高峰。去年當侵侵做咗世界大佬美國總統,已成為以色列總理嘅Bibi當然即刻第一時間恭喜呢位青梅竹馬嘅老友啦。美國大選完咗幾個鐘Bibi就發表聲明,恭喜侵侵,話侵侵係「以色列嘅真正朋友」(true friend of the State of Israel),又重提兩人之間「認識多年,雙方談話非常真誠熱情」。

又要請星爺嚟唱番首歌見證友誼。(網上截圖)

所謂「愛屋及烏」,Bibi唔單止支持侵侵,仲支持侵侵個女同佢女婿(aka佢班顧問)。今年2月Bibi去白宮會一會老友侵侵(嗱我唔准你哋再話侵侵老呀吓),喺記者會上有個記者唔識死,話當選後美國國內反猶太、種族主義同埋仇外情緒高漲,問侵侵有咩回應。

呢條問題意思係:因為侵侵撐以色列猶太人,令反侵侵人士憎埋以色列猶太人,想問問侵侵點收科。侵侵唔知真傻定假懵,講到自己幾撐猶太人,仲擺佢個女同佢女婿上枱,話佢哋同啲乖孫都係信奉猶太教。

今年2月Bibi去白宮探侵侵,睇佢哋笑得幾開心幾真摯!(路透社)

Bibi就更加係盲撐,插咀話侵侵女婿庫什納細細個時已經識佢:「佢從來都唔細粒,相反一直都很大,一直都很高。」講咩身高呀?Bibi又問侵侵:「我可唔可以講我識咗你幾多年?」冇人想知你哋啲舊屎囉!Bibi話已經認識侵侵、佢嘅家人同佢嘅團隊太耐,知道無人及侵侵咁撐猶太人及猶太國家。人哋而家就話侵侵撐得太過火喎!

Bibi同浩南哥一樣,撐老友係不問理由㗎!(《友情歲月》MV截圖)

「邊個好似粒笑彈?乒乓!乒乓!每日陪住我去玩!乒乓!乒乓!」乒乓Bibi講嘢離晒題咁好笑,完全係為咗侵侵,佢對侵侵無條件支持,令侵侵更有勇氣實行佢喺大選嘅承諾,就係承認耶路撒冷為以色列首都,同埋搬遷大使館。

點解侵侵呢個行動係有guts?飛雲就唔喺呢度多講,大概就係侵侵嘅超破格行動,隨時搞出一場中東大戰。有興趣嘅讀者可以睇吓以下幾篇:

關於耶路撒冷有十萬個為什麼,但5個答案解答晒,抵睇!

美國遷館爭議大 5個問題看懂為什麼大使館絕跡耶路撒冷

點解侵侵今次夠晒特別?

【新聞背後】耶路撒冷定位茲事體大 歷屆總統未遷使館審慎自有因

侵侵咁做有咩後果?

「災難性時刻」出招 特朗普無視全世界玩火 恐引爆中東火藥庫

咁冒險,為咩先?

【耶路撒冷問題】有恃無恐不怕得罪阿拉伯 特朗普用伊朗統戰中東

除咗有個做咩都盲撐你嘅朋友乒乓,都要有阿樂咁正面樂觀嘅態度先可以令你敢狗衝去做傻事……呀唔係,係(自己認為)勇敢嘅事。

福布斯富豪榜第12名、金沙集團行政總裁艾德森(Sheldon Adelson)身為猶太人,即使面對反猶太勢力,多年來無放棄喺美國唱好以色列,夠晒樂觀積極。以佢嘅身分當然關心美國搬大使館議題啦,所以當侵侵2016年3月表明自己係「以色列之友」,公開自己上任後會遷館後,艾德森就變身阿樂,樂觀大叫:「今次實無問題喇!」

咁艾德森點支持侵侵呢?雖然話侵侵本身已經係有錢人,唔使任何人支持選舉經費,但呢個世界有一種人係好L有錢,艾德森就係其中之一。大選前大約十日,艾德森去咗侵侵屋企密會......咁梗係為咗R sponsor啦,兩個麻甩佬仲有咩講。完咗之後艾德森甜絲絲咁打俾佢個朋友、猶太復國團體美國錫安主義組織主席克萊因(Morton A. Klein),話好開心呀,因為侵侵應承佢優先處理遷使館議題。

侵侵咁識做,艾德森當然重重有賞。艾德森捐咗2000萬美金去一個支持侵侵競選總統嘅政治組織,另捐150萬美金去共和黨全國代表大會委員會。艾德森俾侵侵嘅支持就好似吊喺驢仔前面果條紅蘿蔔,係侵侵繼續親以色列路線嘅餌。

(視覺中國)

到侵侵當選,阿樂艾德森就好想掌控侵侵腦裏面總部個控制器,成日同侵侵傾電話,又走去白宮搵侵侵,扭盡六壬就係想侵侵快啲搬使館。據聞艾德森嘅「煩音」,令侵侵今年5月底任內首次簽定遷館豁免時已經不情不願,只係佢最寶貝嘅女婿庫什納話唔得,話未同中東穆斯林國家傾到咩,就一嘢搶咗人哋個耶路撒冷,之後實無計傾。

12月第二次限期屆滿前兩個月,正面L艾德森根本等到唔耐煩,錢俾咗成年,人又當選咗,大使館仍然「得正正」喺特拉維夫,於是又走去白宮食飯兼同侵侵傾心事,今次仲拉埋庫什納;連侵侵最信任、當時白宮首席策略師班農,艾德森都唔放過,催逼佢快啲做嘢。

(視覺中國)

今次終於連庫什納都支持遷館,負責中東和平議題嘅庫什納認為,處理中東和平進程,要置諸死地而後生。其實庫什納處理中東議題咁耐,有出現過「進程」咩?佢呢種狀況,飛雲理解為「反正都搞唔掂咪亂試囉」。

睇住庫什納,飛雲就明白世界就係咁唔公平㗎喇,人靚仔,老婆靚女,仔女可愛,外父仲要係美國總統,欣賞你唔係俾盤生意你幫手打理,係俾個中東你發揮呀!冇咩事飛雲出返去做嘢先。(視覺中國)

因為正面L阿樂霸住咗侵侵腦總部嘅控制台,所以阿愁阿怒阿驚阿憎就只能靠邊站,而侵侵就此決定搬遷大使館。呢個決定嚇親好多人,所以早喺美國落實搬使館計劃前,各國領袖已爭住跑出嚟大叫唔好,同將件事講俾信任嘅人聽;其中包括最驚驚嘅法國總統馬克龍。

馬克龍同侵侵握手擁抱咩都做齊,侵侵又讚馬克龍嗰位64歲老婆身材保養好好,全世界都以為諗住馬克龍同侵侵品味相近,以為佢哋會好傾得埋,點知佢都曾嘗試叫侵侵唔好咁做,當然侵侵最後當成個世界都冇到啦,馬克龍都繼續批評侵侵手法,表示遺憾咁話。

▲馬克龍:「怕咗你喇!」(設計對白)

對遷館最嬲嬲豬梗係巴勒斯坦自治政府主席阿巴斯啦,之前好似講到以巴和談成事,結果轉個頭就郁個耶路撒冷。呢件事亦挑動美國國內穆斯林嘅憎恨情緒,最愁嘅當然係一眾巴勒斯坦人,建國夢又漂遠咗喇......

飛雲之前講過好多故事,埋嚟睇埋嚟揀:

【新聞講故事】國際大事一看就懂!中東美俄東亞 趣味養份兼備

講到侵侵咁多考慮,不過可能對於佢嚟講睇前只有一個問題,就係面子。話咗上台之後要搬大使館㗎嘛,咁梗係搬啦!唔係塊面擺邊度?親以色列支持者,同外國及阿拉伯國家領袖比較,咁梗係fan屎重要啲啦!無fan屎,今日點會喺呢個台呀?多謝我啲fan屎!

值得留意嘅係,Bibi同艾德森其實本身都係老友嚟,不過今年1月Bibi爆出貪污醜聞,其中一項指控係Bibi向《新消息報》老闆Noni Mozes表示,佢可以限制《新消息報》競爭對手《今日以色列報》(Israel Hayom)的發行量,換取《新消息報》報道更多有利佢嘅報道。《今日以色列報》是支持內塔尼亞胡嘅免費報,由Bibi Friend子艾德森持有,因為發行量大影響到《新消息報》嘅廣告收入。

Bibi親證出賣艾德森,請看:

醜聞纏身再洩「地震」錄音 以色列總理涉利誘報章作正面報道

Bibi話自己同艾德森喺2012年至2015年間打電話傾密計100次,力證同艾德森係密友,不過Bibi今次咁反咬艾德森一口,艾德森已經嬲豬咗Bibi,話對Bibi「好失望好嬲」。Bibi國內受醜聞打擊,會唔會最後都好似乒乓咁,陪完侵侵經歷後自己消失㗎?好sad呀個story!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。