【每逢大事講故事】王儲自編自導自演沙特版權力遊戲 隨時玩出火

撰文:
最後更新日期:

如果你知道,沙特阿拉伯除咗石油多,王室成員也如天上繁星咁多,或者不會對有成11個王子被拘捕的消息,覺得出奇。萬幾兩萬個王子,一個招牌跌落嚟可能壓住十個八個,拉幾個有咩咁奇?

奇就奇在,呢11個王子大部分都在權力核心嘅內圍,就算年輕少年也不會笨到真係信「打擊貪污」呢個官方說法吧。

無錯,只要煲劇煲得夠多,就知道搞咁大壇大龍鳳,終極目標只有一個:奪嫡。

沙特阿拉伯國王薩勒曼宣布成立反貪委員會,由王儲穆罕默德領導。當局隨即拘捕11名沙特王子。(網上圖片)

咪住先,有睇過下沙特新聞嘅你,可能會話:Call行馬拉人果個咪係王儲囉,佢咪位已上,等緊做國王啦,仲奪咩嫡啫!當然,世事並唔係咁簡單嘅,不如大家同飛雲一齊惡補下沙特王室係咩一回事先……

仔,全部都係仔

現代沙特王朝,由已故國王阿卜杜勒阿齊茲在1932年創立。即使他在1953年離世,60多年後的今日,仍然深深影響當地,因為佢「生產力」強勁,生咗好多好多好多好多個仔。正確嚟講係45個仔,同大多數有統治力量的王室一樣,總會有部分唔知點解突然死咗嘅,所以得36個養得大捱到成年。

插一句題外話。佢有成22個(枱面上的)老婆咁多,公主一定都有唔少,可惜在沙特這個保守父權社會,根本無人會理會,所以數目不詳。

好喇講返正題。正正因為有咁多個仔,或者順耳啲我地不妨改做阿哥,咁多個阿哥分豬肉咁分晒國家重要職務,各房王子輪流做國王。阿卜杜勒阿齊茲生前認為,36個阿哥之中,有10個有能力繼承王位,然後欽點大阿哥紹德接位,之後三,五,八,十阿哥輪住上,假如無數錯,現任國王薩勒曼已經係廿五阿哥。

《步步驚心》涉及九子奪嫡情節,王字數目遠超的沙特王室如拍成劇集,應該會複雜得多。(網上圖片)

沙特式共識管治

為維持國家穩定,沙特向來都係由呢班王室兄弟幫有商有量達成共識來管治,再由國王一錘定音。不過即使有咁多個仔,王子同叮噹一樣都係會老嘅。薩勒曼佢老人家2015年接棒,今年已經81歲,佢班細佬都有番咁上下,斷估唔會咁風趣傳返俾阿哥啩,於是乎接班成為當前急務。當時佢選擇由侄仔納伊夫做王儲,同時安插親生仔穆罕默德做副王儲。

呢一步以侄仔做幌子,在兩年後的2017年6月再廢侄仔,捧阿仔做王儲,實在巧妙。兜個圈,自己揸返莊話事,既方便又快捷。

話時話,薩勒曼本身假假地都有十幾個仔,穆罕默德又唔係大仔,到底憑咩拔尖做王儲,唔通真係靚仔大晒咩?

MBS王儲1985年出世,比起朝鮮領導人金正恩還要年輕一歲。(Getty Images)

王儲的CV

薩勒曼有三段婚姻,大房有五個仔,二房一個,三房六個。1985年出世的穆罕默德為三房長子,年紀細班哥哥一大截。在沙特國王大學主修法律,據說以第二名的成績畢業。之後上位坐火箭咁快,當然,成功係要靠父幹。

2009年他24歲仔,跟在仍身為利雅德省長的父親身邊,出任地位超然的特助;26歲時父親做國防部長和副王儲,他再做升級版特助;2015年薩勒曼當上國王,他子承父業,以30歲之齡成為國防部長,可能係全世界坐呢個位最後生嘅人。同年4月做副王儲,然後今年6月坐正王儲之位。據悉薩勒曼有意在今年底或明年初退位,換句話說,很快沙特將會由穆罕默德,或者他更常被稱呼的MBS(他名字Mohammad bin Salman簡稱)話事。

國王之所以挑選他繼任,一個字講晒:夠頑強。國王認為他夠強悍,有需要的時候會毫不猶豫立即拉板機擊倒敵人。呢一點,在剛過去的星期六,他已證明給全世界睇佢可以有幾狠。

♫ ♪由始至終只有你啲仔♪​♫

頭先講過,沙特近數十年都是由一班兄弟和家族成員以默契和共識管治,但不要忘記當上國王的,至今全是開國君主阿卜杜勒阿齊茲的兒子們。如無意外,MBS將會成為首位接棒的第三代。

問題來了。阿卜杜勒阿齊茲有很多兒子,而他的兒子又有很多兒子。正所謂一日未完場,一日仲有價講,同是第三代,同是阿卜杜勒阿齊茲的孫子,到時到候分分鐘像街霸一樣Here Comes A New Challenger,突然有人彈出來挑戰佢個王位繼承權。畢竟佢得果30歲出頭,隨時影響沙特未來半世紀發展方向,涉及利益真係唔止幾百幾千億咁簡單。

如果回帶睇返MBS巡邏影片成長片段,就會明點解佢要先下手為強。2001年佢16歲,長房大阿哥心臟衰竭逝世,年僅47歲;一年後,輪到長房二哥心臟病發遽逝,更只得43歲。是否病死信不信由你,生在帝王之家,每日每分每秒也是跟死神打交道,一刻疏忽不得,否則下場只會跟兩位兄長雷同。

先發制人

前國王阿卜杜拉(即係佢死鬼阿伯)生前最喜歡兩個仔:

1. 米塔布王子,現年65歲,穆罕默德堂兄。被免職前為國家警衛部長,負責保護王室成員、邊境要塞和各處聖地,在今次反貪行動被捕。

2. 納伊夫王子,現年58歲,2015年被現任國王薩勒曼冊封為王儲,原內政部長,今年6月遭罷黜兼免去部長職務。

這兩個王子均是MBS王位最大威脅,近月已被他手起刀落,一一解決。不過今次被捕名單中還有一個人值得注意,他便是沙特首富瓦利德王子。

你有幾何見梅鐸(背對鏡頭)攬仔攬得咁肉緊,瓦利德同佢仲唔係有嘢?(Getty Images)

剷除異己

有「中東股神」之稱的瓦利德,身家達159億美元,在福布斯富豪榜排第45位。他向來被指為新聞集團創辦人梅鐸的幕後金主,亦是花旗銀行、蘋果公司、Twitter等巨企主要股東之一。

他向來開明健談,鼓勵公司女員工在公眾場合不戴頭巾,常常接受外媒訪問,是世人認識神秘的沙特一道重要窗口。由於不在王位繼承順位之上,所以政治上較少被人談論。事實上,跟MBS一樣,他也是阿卜杜勒阿齊茲眾多的孫子之一。

特朗普女婿庫什納據說同瓦利德好老友,轉頭又跟MBS言笑甚歡,到底這個世界還有哪位政界猛人未給他集郵?(網上圖片)

覺得意猶未盡? 鍵入【新聞講故事】專頁,等飛雲將國際大事慢慢講你聽!

他當年接受福布斯訪問時便曾說過,隨父輩一代老去,王室繼位問題將變得複雜,而他本人也有機會登上王位,「能當上這個國家國王的人,離不開阿卜杜勒阿齊茲國王的兒子和孫兒,而我也是其中一份子。」

即使他和父親同樣屬於所謂開明派,能贏得保守王室大老支持登上大位的機會渺茫,但他擁有大量海外人脈和經濟實力,跟特朗普買過遊艇,仲同佢個萬能key女婿庫什納老友鬼鬼,今次忽然以不明罪名被捕,可見有人覺得他是眼中釘。而國王改封MBS做王儲時,王室有三人高調反對,瓦利德的父親正是其一。

《權力遊戲》的「血色婚禮」(Red Wedding)一幕死得人多,同今次沙特王室多人落網異曲同功

血色婚禮

另有說法指,沙特經濟呆滯,國王想找瓦利德科水救國,精明嘅佢當然唔想做水魚,於是便出事,被拿來祭旗示眾富豪:一係俾錢,一係踎監!

MBS率領反貪小組一次過拘捕11個沙特王子、14個現任或前任政府部長和多名富豪,被部分傳媒形容為《權力遊戲》中,一次過死咗成半角色的「血色婚禮」(Red Wedding)橋段,但飛雲始終覺得爭王位的戲碼似係幾何級數版的《步步驚心》多啲。

同場加映:消失中的王子......

MBS在2015年6月出任國防部長後,有口多異見王子被消失,也有人死於非命,話巧合喎,你信?

 

呢度就係11個沙特王子、官員和富豪被「囚禁」嘅沙特Ritz Carlton酒店,,所以真係完全唔使擔心佢哋。據講因為佢哋,其他房客已被趕走。(沙特Ritz Carlton)

神級關公Connect新一代?

除咗剷除對他有威脅的人,MBS平時的PR真係做得幾好。首先打擊貪污本身,在沙特是相當受民眾歡迎的政策,尤其是年輕一代。他這招既可打擊潛在競爭者,又可以Connect年輕人,可謂一石二鳥。

過去一年,他在背後發功,大大削減將宗教警察權力,女性在公眾場所不戴頭巾不用再被他們羞辱,鞭打和拘捕,只換來輕輕一句口頭勸籲,又開放讓女性進入運動場館和駕駛。同時放風希望吸引外資,把身為全球最大油企的沙特阿拉伯國營石油公司沙特阿美(Saudi Aramco)上市,計劃集資千億美元。

這些政治、社會和經濟改革,全屬MBS想出來的「願景2030」計劃,目標令沙特到時把經濟多元化,不用再獨沽一味得賣石油一瓣。諷刺的是,盛傳把一班被捕人士囚禁的沙特Ritz Carlton酒店,MBS在打貪事件前兩星期,才高調在那兒舉行過一場投資峰會。

陳奐仁同喬寶寶嚟啫,嚇我唔到嘅!(原圖:Getty Images/VCG)

金仔2.0?

呢個世界,吹水講咩宏圖藍圖乜乜乜可能真係天下無敵嘅,不過做起上嚟咪就係有心無力多囉。

難以得知MBS係咪真係在大學考第二畢業,但一個稍為正常的人,應該不難理解投資者最愛穩定,而這樣大動作對親西方的首富瓦利德又拉又鎖,第一件先咪就係嚇走投資者。佢間公司股價即日跌12%,華爾街班賓架同大堆企業個心真係嚇到離一離呀陰功豬~

可能後生仔年少氣盛啦。認真睇返佢接任國防部長後的「傑作」,中東的未來真係幾大鑊:2015年插手也門內戰,至今仍是一鑊粥,已演變為其中一處最嚴峻人道危機源頭。另外,還有尚未解決的卡塔爾斷交風波。

薩勒曼國王大致希望逐步把沙特發展為政教分離的社會,MBS卻有強力宣告遜尼派大一統之勢,從一單大家都會忽略的蚊型新聞可見一斑──上周六(4日)黎巴嫩總理哈里里突然宣稱受暗殺威脅,宣布劈炮唔撈總理一職,矛頭直指由什葉派領導的伊朗出手,哈里里當時身處沙特首都利雅得,他為金主沙特服務的心,基本上路人皆見。

MBS鑊鑊新鮮鑊鑊金,中東有呢位「好打得」嘅年輕未來領袖坐鎮,加上朝鮮半島有較他年長1歲的金仔,日後地球和平真係多得佢哋唔少喇!

▲英國每日郵報聲稱拍到的獨家照片,指沙特首富瓦利德王子在內的被捕人士,要在酒店內數十人逼在一起打地舖。另有消息指所有王子均在豪華套房單獨被囚,只有平民被捕者才需擠在一起蓆地而睡。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。