【每逢大事講故事】以港女式向穆加貝咆哮 「你以前都唔係咁嘅」

撰文:
最後更新日期:

只要喺Google搜尋輸入「穆加貝」,你應該會搵到「穆加貝 生日」嘅相關搜尋。每年2月11號穆加貝生日都好大陣仗,豪洗200萬美金開生日party,又巨型蛋糕又全國停課又登24頁廣告乜乜乜。

200萬美金算少?喂陳生,你知唔知穆加貝統治嘅津巴布韋係邊先?非洲啊!全世界最窮嘅國家全部都集中喺呢度啊!你唔係冇聽過喺非洲每60秒就有一分鐘過去.... 吖唔係,係非洲每年有幾多人死於饑荒啊?!

不過依家啲8、90後真係未必知,其實津巴布韋有多到用唔晒嘅煤啦鐵啦礦物。80年代(飛雲我嗰陣未出世),津巴布韋幣1蚊等於1蚊美金,貴過港紙㗎仲笑!

嗰陣津巴布韋有米到就算經歷緊旱災,都出口幾十萬噸粟米去15個非洲國家,養活成個非洲千千萬萬個饑民,畀人叫做「非洲麵包籃」。

做乜搞到依家咁?問下穆生囉。

穆加貝生日點可以冇蛋糕?你睇佢食得幾滋味。(網上圖片)

想當年穆加貝仲係一位解放國家嘅人民英雄,昔日風光史足以比得上南非國父曼德拉。直到佢做咗總統,再娶埋個情婦Grace之後,成個人變晒,唔理國民係生係死、日日過住離地奢侈生活,自甘墮落嘅程度仲誇張過樓下嗰位啲演技,飛雲真係當堂O咀...

啲眼淚"朗" 下 "朗" 下,睇到飛雲都眼濕濕。

話說喺59年前,當時仲叫羅德西亞(Rhodesia)嘅津巴布韋有位老師,佢就係穆加貝,無啦啦飛到無雷公咁遠嘅加納教書。

▲Google話坐車要百幾個鐘頭......

可能上天念在佢出身寒微但仍刻苦讀書,竟然畀佢喺一間中學遇上同樣係教書嘅Sally。

當時嘅穆加貝係一位孤獨精,每日沉迷書海;相反Sally係一個陽光活潑嘅女仔。除咗性格之外,兩人嘅背景都好懸殊。穆加貝出身喺窮家庭,兩個阿哥死咗,10歲阿爸走埋佬,淒涼過啲韓劇主角。Sally?佢從來唔需要為錢而煩惱,佢家族仲同當時加納總理好friend㖭。

窮書生配有錢女,乜咁似大台啲劇集嘅?不過呢次係真人真事。穆加貝同Sally呢對佳人雖然有好多嘢唔夾,但就有一樣共通點──關心政治,唔做「非豬」。

圖左就是被封為聖人的Sally。

喺加納嗰陣,穆加貝見到呢個國家啱啱脫離英國獨立。佢好似突然受到聖靈感動咁,由書蟲變成熱血青年,希望祖國可以學加納一樣脫離英國殖民統治。無耐,穆加貝帶埋Sally飛返去羅德西亞,做咗民主黨嘅秘書長,仲做埋黨報「民主之聲」嘅編輯,喺國內同一班黑人社運人士誓要隊冧當時嘅白人政府。

至於Sally都唔係一個普通嘅非洲女性。結咗婚都拒絕留喺屋企做煮飯婆,落手落腳支持穆加貝參加民主運動。佢試過因為協助丈夫反對政府而被捕,坐咗6個禮拜監。

但係自己坐監都事少,老公坐監先大劑。兩人結婚4年左右,穆加貝因為顛覆國家罪而坐足11年監。就係佢哋被牢獄所隔嘅時候,佢哋個仔出咗世,3年後因瘧疾死亡。當時仲坐緊監嘅穆加貝連親眼睇住個仔落葬嘅機會都冇。

1985年,穆加貝閱軍,當時晌佢身邊仲係Sally。(VCG)

Sally唔單止冇老公喺身邊、冇埋個仔,仲要受政治打壓。為咗逃避羅德西亞嘅政治打壓,Sally逃回祖國加納,再流亡到英國倫敦。之後8年,佢過住流亡日子,爭啲畀英國踢出國,都為穆加貝四出奔走,幫佢買書、借書,等佢喺獄中完成法律學位,仲組織活動要求當權者釋放包括穆加貝在內嘅政治犯。

呢啲高質女人喺邊度搵?!

直到1975年,穆加貝終於出獄返到Sally身邊。人嚟!可以Set場BBQ大團圓跳起Yeah喇。

更多津巴布韋精彩文章,即點擊進入【津巴布韋變天.專頁】

咪住先。都未講到高潮,唔好咁心急住,返入黎先。

得到Sally嘅支持,穆加貝全心投入民主運動,Lead住游擊隊打一場持久嘅獨立戰爭,話咁快就喺1980年推翻白人領導的殖民政府,成功令國家獨立,佢就變成國家英雄,由總理做到總統。

聽到呢到,係咪以為自己聽梗曼德拉嘅故事呢?穆加貝的確曾經同曼德拉齊名,話佢哋都係非洲英雄。可惜一個做咗諾貝爾和平獎得主,一個就變成津國希特拉。

穆加貝和曼德拉關係緊密到手拖手。

穆加貝做咗總理2年,就開始表露出邪惡嘅性格。批鬥戰友,炒咗當時嘅內政部長恩科莫,仲派咗隊曾經喺朝鮮受訓嘅軍人,去到恩科莫嘅族群大‧開‧殺‧戒,死咗成2萬個人,血流成河、屍橫遍野、人間煉獄、慘絕人寰,穆加貝啊你夜晚瞓得着咩?

最精彩嘅係,穆加貝仲臨老入花草叢。自從仔仔夭折後,Sally冇再懷孕,仲有血壓高,身體唔好成日出入醫院。咁啱總統府嚟咗個又青春又靚女嘅秘書Grace。久旱逢甘露......總之穆加貝就同細佢41年嘅阿Grace搭上,背住Sally搞婚外情。

呢位鼎鼎大名嘅阿Grace,我細細個就聽過佢個名。咪就係嗰位能文能武,又鍾意買嘢又鍾意打人嗰位非洲第一夫人囉。

唏﹗

Grace同穆加貝搭上嗰陣亦都係人妻同人母。只係佢兩個無懼世事變改,還是愈難愈愛,愛到當各自嘅元配唔存在,連BB都有埋,嗰位就係喺城市大學浸過鹹水仲疑似睇中咗一名高登仔嘅津巴布韋公主Bona。

這位巴打講到似層層,如何叫人可以不相信他。(高登截圖)

穆加貝出軌仲有埋私生女,Sally一直都隻眼開隻眼閉,直至1992年因腎病而死,一路以來都從來冇公開講過穆加貝出軌嘅事半句,後來係傳媒爆出嚟咋。Sally為咗穆加貝付出咗大半生,到頭黎都畀穆加貝傷透了心(#押韻)。

Sally死咗之後,Grace將穆加貝體內嘅邪惡分子完全釋放出嚟,唔止搞到穆加貝癲癲地,就連任達華都要走出黎講句:成個津巴布韋都畀佢哋搞彎晒。

(路透社)

穆加貝雖然已經在位多年,但其實佢嘅世界觀真係無咩變過,講嘅都係「津巴布韋嘅經濟問題係西方國家的陰謀」,要推翻佢係因為當年佢充公咗由白人擁有嘅農場…… 批評者話佢完全唔知道咩係「現代經濟學」,成日掛住諗點樣分個餅,而唔係諗點樣造大個餅。穆加貝就話講呢啲嘢嘅就係叛國,要判死罪。

可能穆加貝細個唔畀心機讀數學啦,以為錢唔係喺ATM撳出黎就係print出黎,要萬印萬、要億印億、要兆印兆。佢又真係咁傻豬走去印一疊疊100兆津幣,飛雲數幾多個0都數咗10秒啊。

就係咁畀穆加貝印下印下,就印到由1美金兌1津幣,變成1美金兌35,000,000,000,000,000津幣。香港啲師奶推架車仔落街市裝住啲餸,津巴布韋啲師奶就調返轉,將一幢幢銀紙裝落架車仔到落街買個包。

細路,拎住咁多錢去買包啊?

岩先講到津巴布韋咁多資源,個個爭住要,點解仲係咁印錢?想知啊?咁就要講返歷史先。嗱你迫我講㗎,唔准嫌悶㗎!

因為昔日英國殖民關係,國家好多土地都喺白人手上。穆加貝成功推翻咗白人政府,就當然要做多步,喺白人手上拎返啲資源啦。

一開始國家同英國傾掂數,一齊夾錢向白人地主買地,再分返畀黑人,白人黑人個個有so打和Super。不過到咗90年代(即係識咗阿Grace開始),國家經濟開始差,英國又唔肯再夾錢喎,冇錢畀點算?

搶囉,唔得啊?穆加貝好似當日我地盲搶鹽咁盲搶白人嘅地,話啲地係國家擁有,再分配畀黑人。嘩咁都得,即係當啲白人係戇居啫,唔怪得成班白人衝出嚟又發脾氣又撤資,農業產量跌到阿媽都唔認得,英美呢班國際和事佬都衝埋出嚟,要經濟制裁津巴布韋。

咪就係咁,津巴布韋嘅經濟一落千丈。2000年議會選舉,人民可以用選票懲罰穆加貝所屬嘅執政黨,由反對派領袖茨萬吉拉伊(Morgan Tsvangirai)領導嘅民主改革運動(MDC)贏到開巷。

議會入面一下子冇咗一堆自己人,穆加貝冇自我反省不特止,仲要懲罰選民,繼續搶地、打壓異己。

8年後嘅總統大選,茨萬吉拉伊原本可以取代穆加貝成為總統,但一輪暴力事件發生之後,茨萬吉拉伊就將總統之位拱手讓返畀穆加貝,自己屈就做總理。盲嘅都知,係穆加貝出手喺茨萬吉拉伊手上搶返總統呢個位啦!

穆加貝懲罰選民,同香港立法會議員梁美芬博士懲罰選民說法情況相似,估不到梁博士甚具國際視野。(網上圖片)

枉佢喺一代英雄,選唔到總統仲要磨爛席,你話佢醜唔醜?嗰年就職典禮,成個非洲冇一個領導人肯出嚟賀佢,大學收返佢嘅榮譽學位,連英女王都頂佢唔順,褫奪佢嘅爵位。真係醜到飛雲都唔敢睇。

▲​一講到_到唔敢睇,點可以唔回帶?

係津巴布韋咁嘅經濟環境下,Grace的存在真在造成太大對比。身為非洲人嘅Grace可能鬼妹仔性格啦,最鍾意「鳩嗚」,對佢黎講每日最大難題唔係lunch食乜,而係買Gucci定burberry。去一次歐洲旅行,Grace一日可以洗成7.5萬英鎊(75萬港元)Shopping,去新加坡掃貨更加要15架手推車先裝得晒啲戰利品。

#名牌 #GucciGrace #津巴布韋第一夫人 #Burberry #Gucci #廣東道嗰排所有牌子啦總之

佢仲疑似有躁狂症,成日撩交打。2009年喺香港Shopping就試過打傷個攝影師,今年又試過打到一位廿歲𡃁模爆缸。呢位野蠻老婆恃住自己係津巴布韋第一夫人,一句外交豁免權就拍拍屁股甩身。咁都得,飛雲真係黑人問號。

呢位傳心師望住布歐呢個樣,十足十我聽到外交豁免權呢5隻字嘅反應。

一向都胸無大志嘅Grace,幾年前忽然醒起,穆加貝都九張嘢,已經係人生嘅盡頭。佢用黎諗今日買乜名牌嘅個腦,終於發育到諗到其他嘢。

佢拎部計數機出黎計下,冇咗穆加貝,等於冇得做第一夫人,等於冇得用公帑,等於冇.錢.Shopping。Grace計到呢點,簡直就晴天霹靂,嚇到三魂唔見七魄,腎上腺指數爆升,直程變咗隻樹熊一樣叼住塊樹葉呆咗。

樹熊(右)表示:「唔係呀?抄我?」

為咗Keep住「Gucci Grace」呢個「美譽」,Grace諗到條橋,決定鋪路等自己做總統「賺錢」。嘩~咁難諗都畀佢諗到,欽敬欽敬!

嗱阿Grace絕對唔係得個諗字,仲有做嘢㗎。點解識做就自行參透啦。首先佢用光速3個月"R"到個津巴布韋大學博士學位,話自己研究社會結構和家庭功能的轉變乜乜乜。之後仲叉隻腳落政治,做咗執政黨女性聯盟主席,躋身黨內最高決策組織。

上位就是咁上的。愛妻心切嘅穆加貝為咗阿Grace,仲炒埋副總統捧老婆上位。我真係恭喜你啊Grace。

說謊的人要吞一千根針,出軌的人要吞一隻「老虎乸」,嗰隻昔日又Young又索嘅Grace已經變成極具野心的政客,仲講到名「我都係津巴布韋人啦,點解我唔可以選總統」。

呢隻乸穆加貝一個啃就夠了,要全津巴布韋人一齊啃就No Way!

覺得意猶未盡? 鍵入【新聞講故事】專頁,等飛雲將國際大事慢慢講你聽!

穆加貝曾經講過,只有上帝先可以炒佢,點知上帝又真係聽穆加貝話,炒咗佢。

難怪嘅,好地地一個國家英雄,搞到成個國家又窮又廢,仲養埋個拜金老婆,依家仲話畀老婆做總統?!係咪搞笑啊穆加貝?抵你臨老畀國民唾棄,激到軍方都唔gur要反枱迫你落台。一路好走喇穆加貝。

嗱嗱嗱,仆親喇係咪呢?行路帶眼穆加貝。

PK中的穆加貝,引爆網民P圖無限創意,係節目完結前帶大家欣賞下:

+4
+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。