【每逢大事講故事】邊個蝦我囡囡?怪獸家長普京治國湊女用同一招

撰文:飛雲
出版:更新:

今年元旦,世界的蒼井空老師結婚,飛雲打擊太大,每日宅喺屋企回顧同老師往日嘅溫馨甜蜜片段。2月情人節仲要連住農曆新年,情人節對單身狗已經係折磨,農曆新年又有姨媽姑姐長輩們「關心」一下前途與錢途,飛雲連番受創,一夜白髮,連文都冇寫。
呢個世界就係咁,有人好似飛雲N無咁失敗,但有人就可以攬女兼變億萬富豪。邊個財色兼收?咪就係剛剛連任俄羅斯總統普京個女婿沙馬洛夫(Kirill Shamalov)。

點解要喺普京連任總統嘅日子講普京個女?因為曾經有傳言話普京有意培養佢呢個女成為接班人。雖然係傳聞,但係本住中國人講嘅「修身、齊家、治國、平天下」嘅態度,睇一睇普先生嘅育兒方針,或者可以從中領略一下佢治國嘅思維同格局……

呀,係講故事前,飛雲首先都要喺度,學習大大咁恭喜普京先:我真係恭喜你呀!

關於俄羅斯總統普京個女婿財色兼收呢個說法,飛雲有幾點要澄清番。首先準確啲嚟講,沙馬洛夫已經係普京個「前」女婿,因為今年1月佢已經同普京個女卡捷琳娜(Katerina Tikhonova)離婚。

咁係咪即係沙馬洛夫收唔到色?梗係唔係啦,有傳沙馬洛夫同卡捷琳娜離婚,就係因為同俄羅斯索模沃爾科娃(Zhanna Volkova)有婚外情。睇睇相……

左為普京女兒卡捷琳娜,右為模特兒沃爾科娃......各花入各眼啫!(路透社/沃爾科娃facebook)

沙馬洛夫同卡捷琳娜喺2013年結婚,當年佢哋嘅婚禮夠晒威水。唔係好似香港個「千億新抱」徐子淇當年果個7億世紀夢幻婚禮,亦唔係好似韓國宋宋CP結婚時有豪華明星嘉賓坐陣,威水嘅係個婚禮使咗幾多錢、有幾多達官貴人到賀,咁多年嚟都係冇人知。

曾經係駙馬爺嘅沙馬洛夫。(VCG)

當然,稍為了解二人嘅身份背景,都可以想像到個場面。卡捷琳娜就唔使講啦,佢老豆係普京喎,俄羅斯過去18年、以及未來6年嘅總統吖嘛。卡捷琳娜自己亦好有才學,佢本身係一個科學家兼舞者,係莫斯科國立大學嘅高層。近年普京年紀開始大,外界都好關注佢繼任人會係邊位,有傳普京就有意願畀卡捷琳娜接班。總統個女、又可能會係未來總統,梗係好多人想趁機巴結吓啦。

一睇就知係治國材料。(網上圖片)
沃爾科娃又點可能有得比。(沃爾科娃facebook)

睇多幾個唔同角度:

至於沙馬洛夫就係普京喺前蘇聯的「國家安全委員會」(簡稱KGB)任職時識落嘅老友尼古拉沙馬洛夫(Nikolay Shamalov)嘅囝囝。1996年尼卡沙洛夫同普京,以及其餘6人一齊創辦咗Ozero Copperative,管理佢哋喺列寧格勒嘅物業。隨住普京喺2000年登上俄羅斯總統寶座,亦帶挈各位老友記,Ozero Copperative成為普京親信圈子,各個成員成為巨企高層,或者係政府高官。尼古拉沙馬洛夫係小型銀行Rossiya Bank嘅股東,呢間銀行而家亦成為俄羅斯最具影響力嘅銀行之一。

等飛雲帶大家認識下普京Ozero​啲#BFF先:

▲後嚟普京又識咗呢個friend。

咁嘅背景,可以想像有幾多人仆到想去個婚禮。但二人2013年結婚,2015年先有少少報道講婚禮嘅盛況。據知,當年二人喺聖彼得堡以北嘅伊戈拉滑雪渡假村舉行婚禮,乘坐由3匹白馬拉住嘅傳統俄羅斯雪橇進場。新娘穿上長長嘅珍珠白婚紗,新郎就着深色長大衣,成個童話咁,但係咪公主同王子就……都係各花入各眼啫!

▲史力加同費安娜公主嘅故事就係教曉大家咪以貌取人。(真心)

沙馬洛夫雖然都已經係富二代,但自從娶咗卡捷琳娜之後,身家扶搖直上。佢2008年26歲,就喺俄羅斯油氣公司Sibur做高層,當時佢透過期權計劃買入該公司4.3%股權;2013年2月佢同普京個女結婚,年半後就透過向Gazprombank融資,從普京另一個老友季姆琴科(Gennady Timchenko)手上大手收購Sibur嘅17%股權,合共就持有21%股權。

普京老友季姆琴科同普京女婿都因為同普京關係,俾美國制裁。(路透社)

Gazprombank又係邊個話事?當年係尼古拉沙馬洛夫,而家就係佢另一個仔、沙馬洛夫嘅哥哥尤拉沙馬洛夫(Yuriy Shamalov)。即係老豆借錢俾個仔買個friend啲股權,一切都係圍威喂。

之後2015年沙馬洛夫睇中咗一個石化項目,Sibur就即刻收到政府17.5億美元優惠息率融資。呢幾年不斷有公司睇中Sibur,中國國企中國石化都以13億美元收購咗10%嘅Sibur股權。沙馬洛夫嘅身家一大部份都係多得Sibur嘅貢獻,福布斯估計截至2018年3月約有14億美元。

2013年5月,普京(左紅圈)同當時的女婿沙馬洛夫(右紅圈)一齊參觀Sibur的一個廠房。

國際調查記者同盟(ICIJ)去年發布嘅「天堂文件」(Paradise Papers)都有講美國商務部長羅斯同沙馬洛夫等人嘅關係:

【天堂文件】普京女婿是美商務部長羅斯大客 申報不清涉利益衝突

由買股到融資發展到售股等等,涉及多方全部係普京嘅人(當然除咗中國石化),咁你話從中變咗億萬富豪嘅沙馬洛夫,娶咗普京個女有冇財運?直頭可以話呢啲都係卡捷琳娜嘅嫁妝。

不過沙馬洛夫最勁嘅係,佢竟然夠膽離婚。同樣都係「第一女婿」,美國嘅庫什納如果要同第一千金伊萬卡離婚,頂多都係俾外父特朗普家族、特朗普集團封殺;但沙馬洛夫同卡捷琳娜離婚就冇咁簡單。雖然大家外父都係國家總統,但卡捷琳娜老豆係俄羅斯總統。

▲同樣有個總統外父,庫什納就輕鬆得多。

如果普京只係喺內政外交等治國層面上面咁強勢還好,至弊佢對家人嘅保護都一樣咁強,亦都一樣咁神秘莫測,治國同湊女都係「怪獸家長」!

後生時抱住兩個女嘅普京。

唔記得普京點解係史上最強總統?睇下飛雲舊作:

【每逢大事講故事】普京親身示範 君子報仇如何廿年未晚

又或者睇睇相:

網上流傳普京赤身騎熊嘅圖,普京自認係假嘅,但飛雲唔信,飛雲嘅偶像一定係可以駕馭黑熊㗎!(網上圖片)

普京2000年成為俄羅斯總統,外界對佢嘅私生活可以話一無所知,除咗知道佢係男人,有個老婆。到後來先知原來佢仲有兩個女,仲要係咩樣做咩完全係唔知。關於卡捷琳娜係普京個女嘅事,2015年先有記者踢爆卡捷琳娜嘅身份,不過有關方面一直話唔知佢咁多個人資料。咁多年嚟先後有卡捷琳娜嘅同事同運動舞蹈相關人士確認佢係真‧第一千金,不過之後講講吓又反口話唔係,令件事更撲索迷離。

關於卡捷琳娜的照片可以話勁難搵,大部份都鬆郁朦,讀者可考考眼力,看看她是否有普京的影子。(VCG)

有報道話卡捷琳娜姓氏Tikhonova係自佢外婆,所以完全睇唔出同普京有關。據知佢1986年8月31日晌當時嘅東德出世,又據知佢係跳運動舞蹈。雖然網上流傳佢跳舞嘅片,睇落佢個樣都與普京有幾分相似,但如果又有一日有人走出嚟話佢唔係普京個女,都唔需要驚訝,因為佢嘅一切都係咁神秘。

大女Marina(左一)相都唔多,但2007年俄羅斯國會選舉時,反而曾帶同佢一齊亮相。

佢家姐就更加係神隱級,好似係大卡捷琳娜一年,好似係做醫生,又好似搬咗去荷蘭,佢老公好似係Gazprom高層。關於佢嘅報道有唔少,但始終只係停留喺「好似係」嘅階段,確實資料欠奉,連相都只係疑似。對於兩個囡,普京之係講過一次話二人都喺俄羅斯生活。

▲睇下卡捷琳娜踢腿幾有力,果然係普京個女,真係替沙馬洛夫擔心。

普京咁做最主要當然係護女心切,你睇佢點樣保護卡捷琳娜嘅婚禮,就知道呢位爸爸係會好似香港啲怪獸家長,會打電話去個女間公司問人:「點解要我個囡囡OT?」

即係好似呢位港媽咁:

【怪獸家長】可以有幾盡?打去公司問「點解要我個仔晚晚OT」

據當年喺渡假村打工嘅人講,婚禮每個位都有保安人員,唔俾任何人接近個婚禮。有員工仲話:「我哋唔可以講呢件事,我可能會俾人炒,你知道嗰個係邊個個女。」可惜外媒連呢句都登埋……

今年1月外媒爆出沙馬洛夫同卡捷琳娜離婚,話沙馬洛夫會被人分咗一半身家,但分咗一半都仲有7億美元,然後仲可以同索模雙宿雙棲,咁仲唔係名符其實嘅「財色兼收」?

不過飛雲就會奉勸想保住小命,就唔好學沙馬洛夫咁玩法……