【每逢大事講故事】朝核、貿易 安倍站着如嘍囉 跟錯大佬點算好

撰文:
最後更新日期:

最近好多人去撲飛,首先有五月天、跟住有久石讓、再嚟子華神。不過飛雲最想睇嘅騷,係飛都冇得買嘅,就係之前韓國藝術團去朝鮮平壤嘅表演。嗱嗱嗱飛雲唔係想去睇徐玄或者Red Velvet,其實只係想了解兩韓藝術交流,關注東亞地緣政局,推動兩韓和平統一……唔好話飛雲毒,日本首相安倍晉三應該都好想睇。

▲想要飛?發吓夢先~

睇見韓國總統文在寅百忍成「金」,用冬奧做餌,氹氹吓朝鮮領導人金仔就整咗韓朝交流表演,再加個文金會。唔止咁,全世界都讚文在寅夠忍讓,先成就習金會,之後可能仲有特金會、普金會,文在寅攞晒彩啦。

安倍呢?咩都冇!日本明明搞咗兩次冬奧,韓國先第一次搞,點解金仔只肯去平昌嗰個?明明朝鮮啲導彈全部對住日本海,最受威脅嘅係日本,點解金仔話見中、美、韓領導,都冇提安倍?仲有徐玄同Red Velvet(及其他)表演,點解日本AKB48冇得出場?最重要係安倍冇得睇!公平咩?!

▲睇下Red Velvet幾正!我係講緊佢哋為兩韓和平努力實在係好正呀!

估唔到韓國用K-POP搶咗日本個J-POP市場,仲用冬奧搶埋日本個鏡頭。

一切都要歸咎於安倍跟錯大佬,仲要跟車太貼,大佬一轉軚,真係跟藤原拓海學識飄移都炒車。

▲藤原拓海唔係日本人咩?都係亞洲人不用分那麼細啦!

2012年安倍再出任首相一職,上任後第一個出訪嘅地方就係美國,強調日美同盟非常重要;2017年侵侵上任美國總統,安倍亦第一時間去俾隻手侵侵揸一揸,雖然之後反哂白眼又抖哂大氣,相信安倍都覺得值得嘅,又侵侵打番場友誼波,向世界展示兩國深厚情誼。

 ▲來自侵侵嘅熱情,透過握手傳遞到安倍嘅手中。

唔好以為美日關係係理所當然,其實前幾任日本首相都唔係咁㗎。例如安倍嘅前任野田佳彥2011年上任後係先訪華、後訪美;菅直人2010年上任後,就中、美都未趕得切去訪問就落咗台;鳩山由紀夫亦首次外訪就係訪華,之後更因為未能按照競選承諾,將美國海軍陸戰隊遷出沖繩基地,而辭任首相,與美國關係都唔慌好。

相反安倍就唔單止姿態上向美國示好,連行動上都係顯示出對美國嘅一片丹心。啲人成日講中國買咗幾多美國國債,係美國最大債權人,留意返呀,截至今年1月,中國揸住1.17萬億美元美債,但日本都有1.07萬億美元美債,係美國第二債權人。

▲叫得美國一聲大佬,買美債梗日本當然係OK!

咁侵侵點回應安倍嘅愛?首先,特朗普上任後即刻簽署行政命令退出《跨太平洋夥伴協定》(TPP)。Er......只能夠講,有一種愛叫虐愛。歌仔都有得唱啦,♪ ♩ ♫「喜歡你讓我下沉,喜歡你讓哭」, 更緊要係下一句「能持續獲得糟蹋亦滿足~」♬ ♩ ♫ ♯ 

講返少少歷史,日本防衞上靠美國,就算同美國喺貿易方面有摩擦,都要「大和撫子」上身咁忍讓。不過TPP因為唔止美日,仲包括其他國家,所以日本就唔需要忌諱美國。

誰不知安倍同美國前總統奧巴馬傾好晒上馬,侵侵一個屈尾十就推翻咗。而且分手就分手啦,侵侵又硬係要人研究下係咪要重新加入TPP,攪到安倍以為佢想食回頭草,然後又突然批評TPP不合乎美國利益。呢啲一時一樣嘅態度,令安倍患得患失。

唔止咁,之前中美貿易戰,大家只顧住睇中美,但留意返其實日本都同樣受美國鋼鋁關稅影響。雖然日本成日話係美國一大盟友,但歐盟、巴西、澳洲、阿根廷、加拿大、甚至連韓國,以及要起牆圍住嘅墨西哥,都有得豁免,日本又係冇份。

(網上圖片)

就算係咁,安倍冇放棄「美日同盟」嘅概念。安倍對美國嘅態度好明顯,要知道喺東亞地區裏面,安倍真係冇咩知心友。一方面忌諱中國成為區內大佬;另方面與韓國關係,則因為慰安婦問題,若即若離。2015年安倍同時任韓國總統朴槿惠政府就慰安婦達成協議,日本撥款10億日圓成立基金協助受害者;點知文在寅上場後一下子就改變主義,由韓國政府出資協助受害者,唔用日本嗰10億日圓,但筆錢又唔係即刻還返俾日本喎……

安倍付出咁多,只係希望侵侵回頭時,關照一下細佬。喺安倍嘅想像中,東亞政局就算唔係由日本主導,但由侵侵駕駛嘅汽車上,安倍起碼都可以坐副駕。不過,幻想雖美好,現實卻殘酷,安倍計嚟計去計漏咗東亞地區有個朝鮮。

安倍喺東亞孤獨嘅感覺,就好似人人盛裝赴宴,得佢一個着錯衫......(網上圖片)

▲「那年十八,母校舞會,站着如嘍囉」

唔係話之前當金仔冇到,而係冇諗過金仔會突然扮乖仔。首先同韓國扮friend,借冬奧之名做咗場「友誼第一,比賽第二」嘅戲,之後仲借啲依去咗中國同習大大打招呼。

最爆係,年初仲同金仔battle緊個核武按鈕邊個大啲嘅侵侵,突然就講句:「好期待5月或者6月同金仔會面。」即係侵侵揸住架車,兜咗文在寅同習大大去同金仔傾計,安倍就連車尾箱都冇得匿。呢幾句夭心夭肺歌詞,好似度身定造比安倍同侵侵講咁:♪ ♩ ♫「喜歡你待我薄情、喜歡你為人冷酷~若是你也發現,你也喜歡虧待我,我就讓你永遠痛愛著我~~~」♬♩ ♫ ♩ ♫ 

▲安倍真係要聽下成龍大哥講,跟車最好保持番兩秒距離喇!

▲兩位突然friend咗,難為跟車嘅安倍喎!

講返轉頭呀,以前安倍唔係咁冇存在感㗎。2002年當時仲係官房長官嘅安倍,跟住當時嘅首相小泉純一郎,去朝鮮同當時仍然健在嘅朝鮮領導人金正日會談,但喺會談前30分鐘,朝鮮方面突然通知8名遭朝方綁架嘅日本人質死亡,但朝方冇用「綁架」字眼,只係話失蹤者,當然亦冇道歉。

當時安倍低調冇表情,邊似而家成個表性包咁呀?(網上圖片)

上午會談結束,安倍就同小泉講:「老細,如果陣間個肥仔唔肯承認綁架同埋道歉,我哋就拍枱走,理鬼咩『朝日平壤宣言』!」日本代表團啲人嚇一嚇,大佬,而家唔係晌你屋企後花園,喺係朝鮮呀!度度都有人監聽㗎嘛!

嚟之前佢哋就商量過,重要嘢唔係要講三次,而係要用紙筆溝通,以免隔牆有耳。因此當安倍大大聲講要反金正日枱時,大家第一下係嚇親嘅,以為就此成為第九、十、十一……個遭綁架日本人。

但係後來佢哋就明白安倍嘅用意,因為下半場一開始,金正日就承認失蹤嘅8個日本人係朝方綁架,甚至肯道歉。而逼到金正日也道歉嘅,當然就係安倍大大聲咁話唔理「朝日平壤宣言」嘅舉動。

「朝日平壤宣言」實現朝日關係正常化、清算日本對朝鮮實行殖民統治歷史和解決兩國間懸而未決的問題等達成共識,係為東北亞地區的和平與穩定而相互合作……一句講晒即係兩國關係「淡淡定、淡淡定,有錢剩」,咁金正日梗係想日本唔好走咗去啦。

呢件事成為都市傳聞,安倍足智多謀嘅形象亦深入民心。邊個諗到而家對住金正日個仔,安倍連同對方遠遠見個面嘅機會都冇呀陰功,想喺朝鮮半島事件上發聲?想講綁架日本人?安倍仲要靠侵侵把口咋。

呢個故事教訓大家,做人都係信自己好,跟大佬如果跟錯邊就好似安倍咁,偷雞唔到蝕渣米。

振作呀安倍!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。