【每逢大事講故事】美朝峰會之決戰二世祖 一場CP值爆標的對決

撰文:
最後更新日期:

今次美朝峰會嘅主角侵侵同金仔,其實大家都識啦。雖然佢地嘅成長、文化背景,可謂完全相反,但都有相似嘅地方,就大家都係噸位十足嘅富二!

要講美帝同朝鮮,其實大家都知,離不開兩件事——核彈同錢!金氏三爺孫搞來搞去咁多年,都未有同美國總統正面交手,美國對朝核亦同樣束手無策。今次兩位少爺仔埋身肉搏喎,到底邊個露底,做「敗家仔」,飛雲真係等得好心急。

講呢兩位少爺之前,先回帶返些少韓戰時期,因為呢個,就係朝鮮發展核武嘅嘅前傳。美國扶植韓國親美李承晚政權,當時對陣的,當然係金仔嗰位好威武、抗日遊擊隊出身嘅阿爺金日成。果陣朝鮮仲未有核武,1950年,6月25日,朝鮮大軍在中共同蘇共支持下,越過三八線,三日內佔領首爾。

金日成:侵侵侵侵侵侵!!(我講緊韓文)

當朝鮮半島打到陷陷聲時,就喺太平洋另一端,紐約一戶小康之家,有位得嗰幾歲嘅小朋友叫侵侵。屋企做地產嘅佢,係一位不節不扣嘅少爺仔。唔好以為下面呢個金髮藍眼嘅鬼仔係賣出奇蛋廣告呀,佢就係小侵侵喇,你睇佢幾天真幾傻~~ 如果要用兩隻字形容佢嘅童年,飛雲會話係beautiful同great。(飛雲母語係廣東話,英文詞窮,sorly)

含豐富牛奶內餡,小朋友鍾意,媽媽放心!

不過經歷過韓戰嘅朝鮮半島就好poor,一個民族,從此分裂敵對。戰後朝鮮開始向蘇聯取經,交換核能技術,喺1962年設立寧邊核反應堆喇,養精蓄銳。與此同時,美國已經捲入另一場反共戰事—越戰,美軍70年代節節敗退,金日成嗰下心諗「機會黎喇 飛雲~」,因為越戰可謂已經耗盡駐韓美軍嘅元氣,一於再揮軍南下啦,點知毛大哥家下又唔想朝鮮統一喎。

無左毛大哥撐腰,金日成先發現原來要嬴人,先要贏自己。「我要核核核核武!」呢個從此以後就成為金氏王朝嘅「家訓」,於是往後幾十年,三爺孫就一直謹遵家訓,就是他朝一日,擁有屬於自己嘅一顆小小嘅核彈。為左呢粒核彈,都唔知餓死左幾多人了。

講番另一邊廂嘅侵侵少爺。步入60年代,侵侵已經是個高高青年人喇~老豆老母覺得佢有點反叛,於是送左佢入紐約軍校等佢學下啲紀律啦,估唔到平時完全亂咁黎嘅侵侵,喺軍校裏面係個高材生,又鍾意波,又鍾意搾~~~車,仲有模型學會,摔角,保齡,瓣瓣掂,你睇下佢啲獎

呢張圖早就證明侵侵係Very stable Genius啦,仲要人做IQ Test?有無搞錯呀?

能文能武嘅侵侵,原來仲係軍校裏面嘅校草。雖然選總統輸左Popular Vote,但當年贏左Popularity Poll喎,被封為Ladies' Man(飛雲英文麻麻地,暫譯「女人的男人」)。

我最喜愛電視男角色,「女人的男人」———侵!

頭先講到美國打緊越戰,其實侵侵作為軍校高材生,當國家需要佢嘅時候,佢梗係,生骨刺...... 嗱人地有醫生紙架,飛雲唔係話佢詐病唔上戰場架,真係無架。佢選總統果陣都話:「當年無參與越戰,有少少guilty。」唉~真係好可惜,不過唔緊要啦,正所謂「商場如戰場」,侵侵上唔到果個戰場,咁就專心做好家族生意啦,之後佢咪飛黃騰達,大家都有EYE SEE啦~

侵侵作為紐約嘅地產業鉅子,係咪好靚仔先?

講到80年代,終於到金仔出場喇!侵侵那時事業已經如日方中,望住呢啲人生贏家,飛雲就覺得自己係零。1987年,特朗普仲威到同蘇聯領袖戈爾巴喬夫握手,金仔果陣得嗰三歲咋。雖然人生比侵侵遲左三十八年起步,不過金仔作為神之子,輸在起跑線都追得返啦。根據朝鮮嘅教科書,佢三歲已經識駕車,開始接受射擊訓練,可以三秒鐘射十發子彈,六歲開始騎馬,九歲識駕遊艇...... 呢啲咪叫人外有人,天外有天囉,侵侵碎料啦。

比起順風順水嘅侵侵,金仔可能知道阿爺同老豆嘅江山好辛苦打返來,佢要守業的確好艱難。三十歲未夠嘅佢上台,每一步棋都真係行得好小心,頭幾年一直唔肯踏出國際舞台。睇番2011年嗰陣嘅國際大環境,中國當時就黎換屆,習大大都未上台;美國奧巴馬似乎係個唔多友善嘅左膠,都係敵不動我不動;韓國又有個超敵意嘅女人——朴槿惠。

定啲黎!金仔於是就決定跟返阿爺老豆嘅「先軍政治」,而且明顯係「先安內,後攘外」,靜靜地專心開發核武。

上年就話成功試爆氫彈,經過多次導彈試射後,導彈射程已經覆蓋美國全境。到左上年年底,金仔終於完成祖輩五十年來嘅核武大業。阿爸,我得左喇!!!今次金仔飛去新加坡見侵侵,先發現佢架專機「蒼鷹一號」可能太殘舊,飛咁遠有危險,要問中國借飛機。佢啲導彈,原來飛得遠過佢啲飛機,呢啲咪正宗嘅孝子賢孫囉。

其實今次歴史性美朝峰會之所以搞得成,係天時地利,但飛雲覺得最重要係人和。侵侵做左美國總統之後,對住金仔就好似細路哥咁,互改花名,鍾意鬥大。終於搵到一個同我鬥嘴嘅人了。(心心眼)

兩個大男最鍾意鬥大,連粒制都要鬥大,金仔話「我個核按鈕已經準備好」,侵侵話「我們核按鈕大過你喎」。不過金仔都識玩,送個大信封比你,你睇侵侵個樣,冧到好似收到情信咁。(心心眼X2)

侵侵同金金或者隔著個太空,但將愛慕天天入進信封。

侵侵,你咪得戚住呀,你以為金仔只係一隻肥嘍囉呀?睇返歷任美國總統,從來都未有一位在任期間同朝鮮領導人會面,最接近成事嘅係克林頓,上任之後曾經諗過同金正日見面,不過諗諗下,都係唔想打一場無把握嘅杖。結果只係派左國務卿出馬,卸任之後先去平壤見金正日。

克林頓:氣氛好似有點ODD,早知唔黎啦.......(設計對白)

跟住上場嘅小布殊就話人地係邪惡軸心,淨係寫封信叫金正日棄核,你估你封信鑲金架咩?對上嗰位奧巴馬,其實好積極想重啟六方會談,仲都有諗過同金仔見面,不過似乎經過一輪盤算後,都係覺得「姓金嘅,信唔過」!

世事嘅嘢話唔埋,上年金仔仲成個狠樣咁射導彈,今年轉身射個三分波,變左「親切的金仔」。短短半年間,又參與平昌冬奧,仲見埋韓國總統文在寅,話咁快仲搞場大龍鳯,炸埋豐溪里核試驗場。

沙冷嘿唷,Moon jae-in Oppa!(設計對白)

Well,如果歷史係會repeat itself,侵侵就要小心了,因為朝鮮2008年都喺國際傳媒見證下,炸毁寧邊核反應堆冷卻塔,只係2013年又重啟番啫。一句到尾,你話呢個會係侵侵認真啲,定金仔認真啲?飛雲覺得聰明嘅讀者一定心裏有數啦。而且,金仔其實絕對唔簡單,係虛係實,都未睇透,侵侵今次去見金仔,係攞彩,定係衝出來七,聽日就有分曉喇!

緊貼01特金會報道,即睇專頁!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。