【每逢大事講故事】推理迷慎入 金正男毒殺事件之誰是真兇?

撰文:飛雲
出版:更新:

網上流傳一個故仔,話說朝鮮已故領導人金正日臨終前同即將接替自己嘅金正恩講:「仔呀,我驚我走咗之後,啲人唔聽你支笛呀。」金仔胸有成竹咁話:「唔使驚㗎爸B,佢哋一定會跟我嗰套㗎。」「點解你咁有信心呀?」「因為如果唔跟我,咪送佢地去跟你囉。」
故仔係真係假唔重要,反正朝鮮所有真新聞假故事都係咁奇情。最重要係結果,韓國情報機關估計,2011年金仔正式接任,上場五年來為咗肅清異己,殺咗340人,大概係全部送晒去跟爸B;最近獲送一程嘅就係同父異母嘅大哥金正男。

「金正男毒殺事件」真兇是誰?

知你想講咩,淨係睇埋晒啲美帝媒體,就將又可愛又仁慈嘅偉大領導人,塑造成麻木不仁、弒兄嘅大魔頭,公平咩?

唔准你哋咁惡攪金仔呀!(網上圖片)

的而且確,而家仲未查清係邊個做,只係美國深信係金仔狠下毒手,韓國方面當然都係將矛頭指向佢;朝鮮方面未有回應,不過就算回應你又信唔信?

想知更多金正男毒殺事件資料?入嚟:專頁:女特務毒殺金正男 金正恩長年謀劃殺兄 朝鮮恐怖統治實錄

呢件案撲朔迷離嘅程度,有如密室殺人事件,要解開謎底真係要請柯南上身:「真相永遠只有一個!兇手就晌我哋當中!」

殺人要有動機,而家疑兇有4個。原來2月16日係爸B金正日75歲冥壽,全國上下都有紀念活動,彼德羅夫博士話晌呢個重要日子前,正男哥哥就被殺,凸顯金仔無遠弗屆嘅權力。研究朝鮮問題專家彼德羅夫博士(Leonid Petrov)認為最有嫌疑嘅應該係朝鮮。

係,佢就係姓金!(網上圖片)

4大嫌疑犯...

想知點解朴槿惠要轉移視線?入嚟:【朴槿惠遭彈劾】解讀崔順實干政黑幕:異端教派、神秘的三星

(美聯社/路透社)

身處朝鮮為獻媚殺人,黑幫為商業利益殺人,朴槿惠政府為擾亂視線殺人,呢啲大家都可能明白,但金仔係為咩要殺咗正男哥哥呢?一家人閂埋門有咩唔啱傾到啱囉,不過金仔唔係咁諗。

原來爸B最初都係屬意由正男哥哥接任,朝鮮元老個個當正男哥哥係太子;喺朝鮮,大家都仍然係奉行長幼有序傳統禮數。雖然正男哥哥後嚟因為想去日本迪士尼玩而被爸B視為投敵,又學埋晒啲資本主義邪惡思想,所以降呢為「廢太子」,但大哥始終係大哥,金仔對佢始終有啲忌諱。

🔺正男哥哥因為(個仔)想去迪士尼,而用假護照入境日本被補,迪士尼的確係好吸引嘅。(Youtube)

加上有傳爸B曾經「臨終托孤」,《朝鮮日報》2010年報道,話爸B怕佢兩兄弟權鬥,所以要求當時嘅中國國家主席胡錦濤保護正男哥哥,胡錦濤應承咗。彼德羅夫博士話,中國一直視正男哥哥係潛在接班人,諗住金仔有事就由正男哥哥頂上,又認為正男哥哥會為朝鮮帶來改變同埋改革成市場主導,係中國、甚至日本都樂見嘅;呢幾年中國都有好好錫住正男哥哥。

雖然正男哥哥已經係廢太子,但都有中國撐腰,相反已經登基嘅金仔,不時都要睇中國嘅面色,金仔梗係唔順氣啦,咁父慈子愛呀嗱,送佢去見爸B!

(劇集截圖)

不過呢啲都唔係最根本嘅原因,如果要了解金仔嘅內心世界,首先要回帶睇睇金仔年幼時......

(朝鮮中央電視台截圖)

當年嘅金仔,點睇都只係一個天真可愛嘅小朋友。

朝鮮官方話全能嘅金仔3歲識開槍(唔係水槍)、識揸車(唔係三輪車),6歲識騎馬(唔係木馬),仲要騎得好過騎師,冇運動唔識,特別係籃球,打得好過一般職業選手。好似佢啲咁出色嘅男人,無論晌咩地方,都好似漆黑中嘅螢火蟲一樣,咁鮮明,咁出眾!

🔺金仔的確係有一種獨特嘅氣質。(Youtube)

咁出色嘅人有一份傲氣,唔鍾意輸;金仔身邊嘅人都係咁講。金仔嘅阿姨話金仔12歲去到瑞士,由佢照顧,當時金仔比同齡嘅小朋友矮一截,佢好唔順氣,金仔媽媽就話:「打籃球會長高㗎!」於是金仔就聽媽媽話,自此開始愛上籃球。金仔阿姨仲話,金仔真係好鍾意打籃球,鍾意到要攬住個籃球瞓覺。

金仔喺一眾同學仔之中唔算高,於是想打籃球增高。(網上圖片)

金仔阿姨又話,年少時嘅金仔脾氣差,冇耐性,不過通常唔搞事亦唔多出聲,加上去到外地讀書,語言不通,個人就更加靜。

生於帝王家嘅金仔,一直非常孤獨。不過曹操都有知心友,金仔晌瑞士識到佢個閨密Joao Micaelo。Joao都話金仔份人好靜,不過可能只係大家冇嘗試去了解佢。當年金仔以假身份到瑞士讀書,Joao初時以為佢係朝鮮大使個仔,後嚟金仔可能唔想再瞞住佢嘅好朋友,就同佢坦白:「我唔係大使個仔,我係朝鮮領導人個仔!」

原來佢哋全家人都鍾意玩假身份。

🔺「我老豆係宇宙最強!」(Giphy)

Joao同金仔得閒打吓波,講吓女,係一般年青人嘅生活。Joao話金仔打波都幾叻,對於佢嚟講,籃球就係全世界,除咗打波,打機都要打籃球game。佢話金仔打波唔鍾意輸,完全體現佢自尊心強嘅一面。

🔺金仔閨密爆料話有次金仔珍藏咗本鹹書被人搵咗出嚟,真係年少輕狂。(Giphy)

金家御廚藤本健二,除咗煮餸更係金仔嘅玩伴,佢話金仔真係好鍾意籃球,至今從未錯過一場NBA籃球賽。佢話金仔嘅二哥金正哲好溫柔,打完波會同隊友講:「你哋做得好好,大家返去唞唞啦!」但金仔就好好勝,練得唔好會發火鬧隊友。

藤本話:「有次金仔同親戚玩遊戲,個遊戲係攞愈多棋就會贏。二哥正哲望住佢哋玩,金仔想行一步時,正哲就話:『唔係呢步,係另一步呀。』金仔聽從二哥講,但結果攞唔到嗰隻棋。金仔嬲到即刻睥住二哥,將隻棋一嘢掉去二哥面前。」

咁火爆,唔怪得爸B都話:「正哲成個女人咁,都係金仔先似我。」有傳正哲荷爾蒙異常導致女性化傾向,所以一早俾爸B剔出接班人名單。

好勝嘅金仔長大成為朝鮮嘅領導人,但佢未放棄對籃球嘅熱誠,你睇佢同綽號「變色龍」嘅NBA名宿洛文幾咁識英雄重英雄,就知佢都係識波之人。

「好朋友,來抱抱!」(路透社)

佢甚至鍾意籃球鍾意到重寫籃球規則,令籃球變得更好玩。包括入樽由2分變3分,3分波穿針變4分,球賽最後3分鐘入波計8分,不過罰球射失就減1分。嘩,咁邊夠你玩呀師兄,所以舊年5月中朝籃球賽,朝鮮隊憑住高超嘅技術,力壓中國國家奧運隊,以82:73贏咗場比賽。

嗱,唔准你話朝鮮出怪招先贏到,亦唔准你話中國隊因為驚被人送去見金仔爸B而讓賽呀!學金仔話:「中朝兩國運動員心懷深厚友誼之情,以高超技術進行漂亮比賽,好滿意。」

據報當時戰況激烈,鬥得難分難解!(網上圖片)

🔺「你估我會俾你贏咩?傻豬!」(Giphy/勞動新聞)

金仔除咗晌球場上唔鍾意輸,政治上就更加唔鍾意輸,而且要個個都服從佢。舊年5月至7月期間,金仔去咗視察部隊,其間朝鮮二號人物、行年六十有七嘅人民軍總政治局局長黃炳誓,竟然右膝跪地並用手捂嘴,多次彎腰向金仔講嘢說話,對金仔表現得極度恭敬。

黃炳誓單膝下跪同金仔匯報,隔離徐鴻贊即刻嚇到面青。(網易片段截圖)

坐喺金仔左邊嘅人民武力部第一副部長徐鴻贊即刻驚到想彈起咁款,第二把交椅都跪,徐副部長心諗係咪要趴低呢?呢一幕真係令人不安,同時顯示金仔要下屬完全服從。

大家仲記唔記得,2013年金仔將佢姑丈張成澤,以叛國罪處決?但有人話佢只係遭清算,因為佢同金仔喺治國政策上睇法唔同。人民武裝力量部前部長玄永哲又記唔記得?2015年因為恰眼瞓,兼且妄議金仔嘅命令,表現唔尊重金仔,傳聞被高射炮處決,相信唔少打工仔都俾呢個消息嚇到醒一醒。

大家都見識到金仔幾咁狠,知道佢早已經唔係當年天真可愛嘅小肥仔喇,即使金仔落嘅指令幾咁荒唐專橫,都冇人夠膽挑戰佢啦,咪一味點頭讚好囉,唔係一陣俾佢送咗去見爸B。有咩諫言都係吞返落肚,講句:「冇咩事我出返去做嘢先。」

(電影截圖)

金仔咁後生就掌權,冇咩經驗,爸B又死咗,冇人可以信,只可以信二哥金正哲同妹妹金與正,要定期同佢哋商討治國政策。甚至有人話二哥都係金仔心中一條刺,所以金仔只能同妹妹傾心事。王者都係注定孤獨嘅。

(Whatscap)

喺咁嘅狀況下,朝鮮嘅政策就更難捉摸,好似金仔喺新年賀詞先話要南北對話,改善兩韓關係,但過幾日又威脅射導彈。而且成日要好似黃炳誓咁跪法都好攰㗎,吓吓點頭讚好都會頸痛,金仔專制嘅管治,即係唔啱聽就送你去見爸B嘅政策,已經嚇到好多人脫北,甚至唔少係接近權力核心人士,可能動搖到金仔嘅政權。

講到呢度,金仔弒兄嘅動機似乎非常充足,要穩住政權,阻止正男哥哥喺中國支持下強勢回歸奪權,睇怕都可以搵金田一嚟講句:「兇手就係你!」

(網上圖片)

不過朝鮮媒體報道,話金仔知道正男哥哥被殺消息後,佢嘅反應好似佢都中咗毒咁,忽然癱咗喺梳化上,雙眼無神,臉色蠟黃,嘴角抽搐,好幾個鐘先開始識喊,仲要大喊到第二日聲音沙啞。正男哥哥話過,其實未見過金仔,一個未見過嘅人都令金仔咁傷心,金仔真係性情中人!

有熟悉朝鮮國情,即係網民/口痕友,話金仔絕對唔會係真兇,因為呢個時候殺死正男哥哥,國際間就會有藉口制裁朝鮮,日韓又會攞正牌部署薩德等等......咁即係又返回原點?

呢件案可能最終都係懸案,因為朝鮮2月中進行北極星二號中程地對地彈道導彈試驗,導彈飛行500多公里,跌落日本海,咁樣針對日本,柯南同金田一梗係唔會幫你查啦!唔緊要啦,反正朝鮮不嬲都係真亦假時假亦真,以上分析可能最後全部都係錯。不過頭先講咗咁多真心話,希望唔會有人送飛雲去見金仔爸B啦。

如果下星期見唔到飛雲,可以去呢度回憶吓:【新聞講故事】國際大事一看就懂!中東美俄東亞 趣味養份兼備

🔺諗到呢一點,飛雲真係悲從中來。(Giphy)