【預算案．來稿】全民報考DSE自私？夠香港當權者自私？

文：黃一恒

自私？有啲人話大量自修生報考DSE影響其他正常考生咁好自私。咁夠香港當權者及一眾富人自私？人人回水1萬，令窮人可以立即解決燃眉之急，雪中送炭，咁叫冇針對性？富人退稅免差餉幾萬，錦上添花，咁又好有針對性地幫助有需要嘅人？

仲有，鼓勵全港市民自我增值，呼召大家齊齊入試場考DSE果位係陳茂波先生呀。誰是始作俑者？大家要搞清楚！如果一名正常DSE考生，連咁簡單嘅邏輯都搞唔清楚，咁佢真係讀屎片。好一個教育局局長，是非不分，仲用教訓人嘅口吻叫人莫貪一時之興影響其他考生！你地一班匪官為官不仁，影響全港市民生計，條數又點計？

陳茂波以及一眾高官，每人每月逗納稅人數以十萬計的俸祿，掌管以天文數字計嘅財政儲備，寫出一份咁垃圾嘅預算案，理應自食惡果，受到懲罰。無差別讓自修生免費報考DSE但冇諗過萬人空巷去報名，咁爛攤子由得佢自己執囉。

香港人太善良，但凡抗爭都驚呢樣果樣，才令政府及大財團有恃無恐，予取予攜。佔中又驚阻街，罷工又怕阻人搵食，叫啲議員拉布癱瘓政府又怕影響施政。任何抗爭都係要影響人，增加政府管治成本，迫對方讓步。所謂自私不自私就要睇抗爭目的和結果，是否單純令參與者得益，還是令眾人受惠。例如交通運輸職員集體罷工，表面上影響所有人上落班，阻住大多數人搵食，但這種工業行動的作用是令政府和大財團不敢有恃無恐地壓榨基層員工，要是成功就可讓全民受惠。

所以話，機會黎喇飛雲。今次大家一定要響應波哥號召，全民增值，所有市民自修報考DSE！叫你斯斯文文做個好學生，一齊自修去考試遮，又唔係叫人佔中阻街同講粗口鬧人，應該沒有任何罪咎感啦掛！

全民報考DSE，至少在輿論上要嚇退政府，收回呢份咁垃圾嘅預算案，即使只能讓佢收回丁小錯誤政策，我們都算對政府有所制衡，香港人踏前一步，才有第二步。今時今日香港立法會已完全變成了垃圾會，冇用架喇，完全冇法子阻截政府劣政。自己香港自己救，呢一刻至少每個香港人都要表達報考DSE嘅心願。如果波哥唔知驚，咁冇法子啦，大家試場見啦！政府樣樣事情都倒行逆施，我地唔想盡辦法玩爛佢以之抗衡，點得呢？再講，自我增值讀書考試遮，係好事黎！政府話要發展創新科技，第一關要睇下DSE 9月13日至10月9日報名日，考評局個Server能否負荷囉。要是過左第一關，接著係考試日個個試場都迫爆考生，土地不足呀！要是收番香港人的粉嶺高爾夫球場改做臨時試場，應該可以容納好多考生嘅。然後Oral場場拉布戰，相信場面幾壯觀下！

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）