【LANCÔME事件】香港人冇得唔出聲

Lancôme出聲明澄清何韻詩唔係代言人，連音樂會都以「安全理由」取消埋，引嚟唔少抱打不平嘅人一齊聲討。
成唔成功到而家都未知，但事件就有好多唔同媒體關注，Lancôme全線門市都要休息一天，蘭蔻都變爛扣。

為靠攏中國市場　寧願搞到「公關災難」

我就冇乜錢，又唔會點買化妝品，抵制就唔太關我哋呢啲人嘅事，但作為一個香港人，Lancôme咁做就等於踩上香港人心口，冇乜理由唔撐。而家有好多企業、公司、牌子，都唔敢起用一啲非建制、唔肯擦中國同香港政府鞋嘅公眾人物做代言人，或者出席活動。

客觀效果就係令一啲人收聲，先有得喺中國同香港市場搵食。不過，相比起一啲老闆已經好建制嘅本地或中國品牌，今次呢件事竟然係一間國際品牌引發，雖然預咗，但始終都會有啲失望。

一個國際牌子，為咗個中國市場，寧願做啲咁嘅「公關災難」，都要冒險去落呢個決定，可以見到靠攏中國有幾大問題（唔係第一次講）。我哋成日好羨慕以前嘅明星歌手，佢哋會搞倒「民主歌聲獻中華」，但今日就搵十個好敢言、每事發聲嘅明星歌手都搵唔倒。

一來當然佢哋上咗位嘅諗法變咗好多，另一樣就係因為佢哋要面向十三億人嘅中國市場，唯有揸頸就命，講違心說話。

支持本土品牌　支持香港經濟

今次Lancôme件事，香港人冇得唔出聲，唔出聲只會畀人繼續恰，當我哋係病貓。但更重要嘅教訓係「依賴中國，大家都輸」，真係「係時候改變啦！」

衰啲講句，今日抵制Lancôme，其實未必做到啲咩，第二日可能又有間Mainlancôme再做呢啲嘢。就算冇一間完全唔顧大陸市場，只係服務香港、台灣以至東南亞嘅牌子，但最少搵間受少啲中國因素影響嘅牌子，通過我地幫趁，佢可以養活更多敢言嘅明星歌手，以至請倒一啲敢言、支持民主、本土立場嘅人工作。

其實而家香港已經有好多本地品牌，例如本木序、Kimature等品牌，使用本地材料，亦都係本地製造，支持佢哋代替大牌子，本身都係一個唔錯嘅替代選擇。等佢地喺本土市場唔需要面對咁多壓力。

香港如果要同其他人打過，少不免係要儲住更多唔同方面嘅實力，尤其喺經濟層面上，只有本土企業先可以長遠地支撐香港本身嘅經濟。

（本文純屬作者意見，不代表香港01立場。）