全世界估錯英國留歐？都怪「市場最醒論」！

民調由頭到尾都係咬得緊，點解賠率、市場咁老定？因為，有「市場最醒論」。市場最醒論，就係話你知，市場冇死錯人…危險在邊？危險在，今次呢個史上最大型的非體育博彩，投注額都不過係 1 億英鎊多啲。大佬，外匯市場、股票市場賭緊嘅，係百倍千倍呢個數目。博彩公司都有透露，留歐派財大氣粗，有倫敦人一注十萬鎊買落去。但脫歐派，窮人多，最大一注不過係一萬鎊…有心人大可以拎幾千萬鎊去投注，就必定可以郁到賠率，等你以為實留歐……

場內輸少少　場外搵返十倍

講英國脫歐前，先講三個小故事：

 　故事一：江湖傳聞，有做零售嘅上市公司，刻意谷大收入。點谷？唔使造假數。就只係大股東真金白銀買晒啲貨，甚至用超高價買。之但係，上市公司無啦啦多幾億生意，但大股東一樣要比幾億出嚟，有乜着數？

 　故事二：蕭定一在訪問中講過大陸票房的「幽靈場」，冇人入場，但片主真金白銀買，你咪當片主夠豪請朋友囉。但，所為何事？

諗唔到嘅，睇埋下面嘅故事，應該係真人真事。

 　故事三：BBC 拍過紀錄片，指當年 Beatles 一樣「篤數」。點篤？ 當年 Beatles 經理人 Brian Epstein，真金白銀買一萬幾千隻碟，為咗幫隻碟打上流行榜。唔止自己買，仲叫埋旗下其他樂隊，去到邊買到邊。條數點計？好明顯係之後帶嚟嘅收益，遠超過自己買碟嘅成本。

睇到呢度，應該明白三個故事同一道理，關鍵字係「side bet」。「場內」輸少少錢，但「場外」（例如股市）可以搵返 10 倍、20 倍。

「市場最醒論」　留歐是常識吧？

咁，關英國脫歐咩事呢？睇埋落去就知。

每次政經大震盪，都會推翻一啲好多人曾經深信不疑嘅嘢。

98 年俄羅斯國債違約之前，冇人得閒研究俄羅斯國債，因為「核武國唔會違約是常識」。

08 年雷曼爆煲之前，冇人相信咁大間投行會爆煲，因為「 too big to fail 」。

15 年中證監「暴力救市」狼狽不堪前，人人以為「大陸政府要托市實托得住」。今次英國脫歐，就挑戰咗金融人嘅一個共識：「市場最醒論」 。《經濟學人》話齋：

「 Betting markets on politics provide by far the most reliable forecast of future events, easily outclassing both polls and panels of experts.」

公投結果出嚟嗰日，全球金融市場大亂。點解？因為， 根本係冇咁嘅預期。

慎防你失憶，話你知，公投之前，金融市場風平浪靜，甚至係歌舞昇平，英鎊升到 6 個月高位。所有市場訊息都話你知，英國根本唔會脫歐。特別係公投前一個星期，支持留歐嘅國會議員 Jo Cox 被槍殺， 博彩公司留歐賠率亦都即時熱上加熱，去到投票日，留歐機會係 85 %，冇得輸。

後來發生咩事，大家都知。

博彩​賠率同金融市場準過​民調？　曾經以為係

我想探討嘅，唔係點解英國會脫歐。而係點解市場錯得咁交關？點解博彩賠率同金融市場，咁坐定粒六、大安旨意？諗真啲，其實極不尋常。公投之前，各式民調有唔同結果，互有領先，但全部咬得好緊，最多都係 60-40 之開，極不明朗。

但，金融市場同博彩賠率話你知嘅，係另一回事：由頭到尾，留歐機會從冇低過 6 成，好多時係 7、8 成。金融市場自 Jo Cox 被殺後完全冇驚過。公投前星期四，我問十個有九個都話留歐。重覆一次，直到公投前一刻，賠率顯示英國 85% 留歐──直到結果出嚟，大件事，人踩人。

民調由頭到尾都係咬得緊，點解賠率、市場咁老定？因為，有「市場最醒論」。

市場最醒論，就係話你知，市場冇死錯人。外國公司乜都有得賭，奧斯卡、格林美、上帝粒子、宇宙射線、死剩幾多隻北極熊，全部有人買。政治事件更加玩咗好多年，好多學者做過實驗研究，博彩公司嘅「群眾智慧」，比民調更可信，亦完勝大多數專家，當真「三個臭皮匠勝過一個諸葛亮」。1988 至 2008 年 5 次美國總統大選，上千個民調 ，跟博彩賠率去買，砌低 74% 民調。唔止，仲要係 100 日前已經贏晒。果然， 任何智慧在出錯前都係對的，黑天鵝出現前，就梗係隻隻都白色的。

金融人信「市場最醒論」，除咗往績好，亦有哲學原因。民調，就只係民調。但博彩公司，可以知道民調，仲可以知埋有幾多人買，乜嘢人買，買幾多。仲可以分析埋其他資料。例如天氣（對投票率可以好大影響）。 理論上點都準過民調，更準過專家亂估。

賠率同民調打交，金融人會覺得民調唔準，選民口不對心啫，最後選民會理性嘅，大家都係不變應萬變──至少之前次次都係咁。呢 ，之前蘇格蘭公投民調夠咬得緊，最後都係留派大勝嘛──結果今次就係唔係咁。

金融人人云亦云　抑或side bet買脫歐？

我之前有篇文講預測足球賽果，馬會賠率當然比 FIFA 排名準，因為人地真金白銀落注。點解去到脫歐，賠率完全估錯晒？其中一個原因係，博彩彩池雖然大，但同金融市場比， 都仲係太細，太細了。

好多金融人，講真，有幾了解英國？ Leicester 都未識讀啦，都係跟紅頂白、人云亦云。搵食啫。代入吓當日佢角度諗：民調就一半半最多六四開，但市場風平浪靜， 賠率又擺明係留歐帶出晒，似乎人人都估留歐啦。你咁估我，我咁估你。

冇錯，就係 wag the dog，雞先定蛋先。金融市場，反而比博彩賠率牽住走。 因為，參與市場嘅，都係會睇賠率嘅人。

危險在邊？危險在，今次呢個史上最大型的非體育博彩，投注額都不過係 1 億英鎊多啲。大佬，外匯市場、股票市場賭緊嘅，係百倍千倍呢個數目。

博彩公司都有透露，留歐派財大氣粗（講過啦，留歐派收入較高），有倫敦人一注十萬鎊買落去。但脫歐派，窮人多，最大一注不過係一萬鎊。

唔想太陰謀論，亦冇任何證據，唔好講到收買博彩公司咁黑暗。但諗下，有心人大可以拎幾千萬鎊去投注，就必定可以郁到賠率，等你以為實留歐。等於經理人買唱片、片主自己買飛、零售老闆自己買貨。呢度輸一億？我另一個場贏番你十億。

有心定無意郁咗賠率？唔知了。足球賽事冇乜人咁做，冇乜人有誘因重注英格蘭，等你以為冰島輸梗，然後side bet，亦冇得自己落場。但涉及金融市場嘅事件，就有咁可能。

靠「市場智慧」評估　最終出現荒唐結果

荒唐？ 真人真事，美國曾經搞過 Policy Analysis Market，畀人真金白銀買，中東某國會唔會政變、恐襲之類。用意係靠「市場智慧」評估番呢啲事情發生嘅機會，「就唔使特工、間諜去冒險，可以慳番好多錢」。呢啲咁嘅 shitty idea， 當然畀人鬧到九彩。先唔好講道德或法律上有冇問題（保護總統嘅特工落唔落得注？），最大問題係，你可以想像，恐怖分子自己都會玩埋一份，亦係我在幾個月前篇《恐襲經濟學》講嘅。我係恐怖分子，又食又拎「先下注再恐襲」又得，「聲東擊西落注等你，以為係 A 國其實襲擊 B 國」亦得。得咗。結果搞出嚟嗰班天才，全部辭職。

近期我估乜錯乜，估法國奪冠，結果法國技不如人又爭啲運，冇得怨，亦冇乜嘢學到；但早前，我都係白紙黑字估留歐嘅。事實上，由頭到尾民調咁緊，話一早估到脫歐嘅，只係老千，「咁你發咗達未丫？」估錯唔緊要，最緊要學會，教訓就係──真係唔好信晒博彩市場。

而記住！記住！博彩公司而家都係坐定粒六覺得 Donald Trump 唔會當選的。

（本文純屬作者意見，不代表香港01立場。）