【聖誕打卡】尖沙咀食玩一日遊

撰文:
最後更新日期:

邊個話聖誕就要大費周章諗活動,或者花大錢食大餐?想同愛人過一個深刻又浪漫嘅聖誕節,其實平平地都可以好特別!尤其今個聖誕處處都有好靚嘅聖誕裝飾畀人影相打卡,今次介紹尖沙咀,就有兩大打卡勝地,夠一眾女生影足一日,加上附近有唔少人氣小食店、精緻cafe,邊玩邊食成件事好貼地!

Check Point 1 | 30 呎高Tiffany Blue 聖誕樹

Tiffany Blue 絕對係大多女生鍾意嘅顏色,港威商場今年同Tiffany & Co.合作,喺商場天台擺放咗一棵30呎高Tiffany Blue聖誕樹,旁邊有隻Tiffany機械人爬上樹頂,日頭好天嘅話配埋維港景色加藍天白雲,唔洗用filter都可以影到高質相!

地點:尖沙咀海港城港威商場大堂 I 及「海運觀點」

Check Point 2 | 台灣 ET 鹽水雞

去完Tiffany Blue 聖誕樹正好中午時分,係時候食個午餐醫吓肚,近近地行去尖沙咀誠品店就有間台灣 ET 鹽水雞,用鹽水同上湯浸熟台灣土雞再拆皮去骨,做法夠正宗,仲有多款特式配料揀,好似芭樂、甜不辣、米血糕、蜂巢豆腐等等,加辣就更惹味,用e肚仔落定單就可以影到夠鐘先去攞,拎去尖沙咀鐘樓下食別有一番風味!

地址: 尖沙咀梳士巴利道3號星光行誠品生活2樓L221號舖

Check Point 3 | 置身巨型萬花筒

海運大廈3樓變身全球最大嘅影像萬花筒,LED屏幕同巨型三角鏡折射,感覺好似置身萬花筒,入到去唔洗同人迫可以任你影!

地點:海港城海運大廈3樓

Check Point 4 | LIFETASTIC PATISSERIE

行到攰攰地,下午茶時分食件蛋糕嘆杯茶最好不過。呢間嚟自澳洲嘅草莓西瓜蛋糕,中間夾住一層 1cm厚嘅西瓜,以三層忌廉同兩層杏仁餅底相間而成;蛋糕頂層鋪滿士多啤梨、玫瑰乾花同開心果碎,無論味道同賣相都好受女生歡喜!

地址:尖沙咀彌敦道100號The ONE 4樓L406號舖

Check Point 5 | 海港城聖誕大橋

海港城每年都有華麗聖誕怖置,今年就以尋找聖誕瑰寶為主題,注目打卡位就喺海運大廈露天廣場,有超過40米長嘅聖誕大橋同60呎巨型戶外聖誕樹,情侶可以喺橋上扣上「愛心鎖」,兼影相晒幸福!每晚6點開始,每隔30分鐘就會上演「聖誕音樂燈光匯演」,浪漫燈海之下影相滿有氣氛!

地點:海港城海運大廈露天廣場

Check Point 6 | Sean Cafe

晚餐推介到呢間由80後喺特殊學校任教嘅Fiona同家人開嘅花系cafe,食物主打以食用花製作,食物賣相吸引,仲有淡淡花香更添夢幻!

地址:尖沙咀漆咸道北南29-31號溫莎大廈12A地舖



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。