【熱評】從太興上巿看翠華股價下挫路徑 毛利率逾70%咁計出嚟!

撰文:熱評
出版:更新:

文:李聲揚
太興(6811)上市,唔少人寫過。你睇到這篇文時已經截埋飛,所以唔係叫你抽唔抽嘅建議;倒係想講下,冇耐前翠華(1314)就出盈警,講到營運情況好惡劣。而太興就好似越撈越掂條數靚仔上市。係咪平行時空?大家係咪講緊同一個宇宙?兩間公司定位真係咁唔同?定有其他原因?
首先搞清楚,幾時上市,決定權在公司。除非十分危急,否則公司點都揀盤數靚時先上市,盈利亦都唔多唔少有啲水份。呢啲古今中外皆然,佢在暗你在明。翠華當年上市盤數都係靚仔的。

港版Iron man藝人郭偉亮亦有出席太興上市記者會支持。(洪嘉徽攝)
+1

下載「香港01」App ,即睇城中熱話:https://hk01.app.link/qIZYuEC5LO

翠華上巿6年3度發盈警

而翠華今次嘅盈警,絶對預計之中,公司上市6年,今次已經第3次盈警。舊年全年(三月年結)賺8000萬(港紙,下同),今年頭半年先得1440萬,全年唔大跌就假。更唔好講公司全盛時期一年賺成1.6億。

但,係公司個別因素,定成個行業係咁?呢個行業大家日日接觸,係顧客甚至係員工。大家都知年年加價,但舖租人工亦年年加,到底拉勻影響係點?

好彩,呢個中式連鎖快餐店嘅市場,相當成熟,幾間公司都上市(不過美心冇獨立上市,而亦唔止做連鎖快餐),透明度夠晒高。睇太興翠華之餘,可以睇埋佢哋同業。

比個概念大家,講龍頭一定係大家樂(341),市值過100億。同宗嘅細佬大快活(52),近年表現其實仲好過大佬,但講緊未夠40億市值,仍需努力。太興呢?視乎定價同上市後表現,大約同大快活咁上下市值。翠華?就唔好提了。高峰時有大半間大家樂咁大,近80億。而家?10億唔夠。市值蒸發七八成。

呢個行業競爭又激烈,亦唔係有咩專利或好高科技,基本上就係優勝劣敗,股價反映一切。龍頭大家樂,曾經係基金愛股香港傳奇,傳說中嘅十倍股十年股,但近年就麻麻地,股價浮浮沉沉,甚至未必跑得贏恒指(視乎你拎咩時段)。細佬大快活反而後起之秀,好多時跑贏大佬,但近兩年都係麻麻地。肯定個行業,呢兩年都係麻麻地。

翠華集團及太興的毛利率高逾七成,原來是計算準則不同;但純利率則與大家樂和大快活相對接近。(作者提供圖表)

七成毛利率原來未計……

但,拍埋翠華度,就兩間都係大幅跑贏。近5年買翠華,絶大多數位買你都係輸錢。可見行業麻麻地,但個別公司股價表現就更差。

原因係乜?普通人會直覺去諗:啲嘢難食。但,間間都難食㗎啦,實在不見得股價領先嘅大快活就好食過大家樂好多,甚至我有時都未必分到邊間打邊間。正如米芝蓮餐廳一樣執笠,香港高檔餐飲上市公司嘅表現亦不見得好。股東唔係食客,有冇錢賺先係重點,而不見得好食就會好賺,甚至兩者係有啲矛盾嘅,冇睇《食神》咩?

之前有報道比較四間公司嘅毛利率,又係美麗的誤會。講太興翠華毛利70%樓上,大家樂大快活就得10%多啲。不必怪責記者,好忙的,但諗下合唔合乎常識?當然寫稿嘅都係照抄公司年報,而公司年報真係咁寫的!但純係因為用唔同標準,翠華太興就只計食物成本,大家樂大快活就人工舖租之類都計埋,出嚟咪爭咁遠。咁都得?冇話唔得,唔同會計標準啫。咁啱太興同翠華都係安永做核數師。

所以講到尾,要比較,睇純利。一拍埋去,一目了然。大家樂純利就喺4億幾5億幾浮浮沉沉,大快活就明顯好啲,反而翠華純利就一路跌落去,同股價一致,幾咁簡單。

生意呢,其實普遍收入都係越做越大的,好易理解。首先年年加價(冇聽過會減價),間間都係。況且一般都係擴張,多啲分店,開新品牌,甚至做收購。真係要睇核心表現就要睇平均單價呀,同店銷售之類,呢度唔細講。但收入慢慢升,就好基本,幾間都做到,但又係除咗翠華,收入都原地踏步,都幾大鑊。

翠華上巿6年先後3度發盈警。(資料圖片)

收入增長慢兼純利跌,責任誰屬?

但只係收入升唔夠,有幾多利錢落到去純利先緊要。你睇純利率,其實差不多間間都係受壓,特別係近兩三年,只差受壓幅度幾多。例如加埋價都係唔多夠冚成本,人工啦(最低工資特別大影響)、租啦,而太興居然做到純利率升,又睇下之後點。

但真係要比較,你都見到,翠華幾年間,由純利率冠絶同類上巿公司,變成最低嗰間。係咪嘢食成本貴咗但仲要畀好啲你食?梗係唔係(況且,畀好啲你食可以加價啫,人工舖租升?你估剩係佢升咩。

收入增長又差過人,純利又跌得快過人,梗係有啲問題,管理層責無旁貸。之前都有報道講過,翠華多關聯交易。早兩年試過貴價同大股東買工廈,又有納空租畀大股東老婆間舖之類。有披露又有小股東舉手,合法,吹唔脹。只能講其實呢啲東西,好多上市公司都有,但搞還搞,唔好影響到條底數囉。

所以講到尾,都係帶眼識人。原來咖喱牛腩奶油豬易整(大家樂大快活一樣有),人心先難測。睇咁多數字,最緊要都係估下大股東管理層信唔信得過。呢啲就唔係彼德林治式生活投資法,日日食燒味飯飲咖啡奶茶可以知道的了。

翠華內地業務的比重較高。(資料圖片)

大陸人先食?

最後補多樣嘢。講起翠華股價不濟,除咗鬧管理層,以及話成物質素外,仲會有人講:大陸人先食!

「大陸人先食」同純利表現有何關係?我都唔係好知。但我留意到樣嘢:呢三間公司嘅股價表現,好似同內地業務嘅比重成反比。我冇在內地食過大快活,唔講都唔覺有,內地收入佔佢5%左右。大家樂呢?我在深圳成日食,內地收入佢10%多啲。翠華呢?內地收入佔佢超過30%

呢個「內地業務越多,股價越唔掂」嘅關係,照計冇乜科學根據,可能純屬巧合,定因為水土不服地大勿搏(冇打錯字)競爭太大?大家樂之前亦都撤出晒華東,只剩返華南市場(再講遠啲,公司92年已經在北上廣開分店,當然失敗)。

太興呢?內地都佔兩成幾收入。不過勁在開到去瀋陽,我幫襯過!好似冇見到有咩香港餐廳可以開到上東北(滿記例外,但糖水舖易搞好多)。太興亦都開到去台北,目測生意都相當好,台灣人對香港燒味茶餐廳十分受落,信義新光三越間檀島排你幾個鐘。冇記錯的話,大家樂大快活翠華都冇開到去台灣。似乎太興嘅大中華定位又同其他幾間唔同,又睇下之後會點。

作者為證監會持牌人士,並未持有文中提及股票。 

(文章標題由《香港01》編輯所擬。文章純屬作者意見,不代表香港01立場。)